Read Phom Naga MÜLANGPÜ 26 Bible Online

MÜLANGPÜ 26 - Phom Naga bible

MÜLANGPÜ 26

¹Ammi ashakshem hük vetuh hatü mongei haenpü nyemin ashak pha an thüngshingpü ow, manghshempü ow, hakla ow shihtü dakpü, ha kü cherubim lajei hoitü lingtuh.

²Hapa haenpü ashakthü yangkü meter anpünyi, ba kü meter nyi; hatü hapa ashakthü kemei bahiyang hükkeikei nyuhen vongbong.

³Ashak pha nga chem kü hapteiyei thüngtuh, hatü hapakei lebü pha nga-ao hapteiyei thüngtuh.

⁴Ashak thüngla yah-ei pha nga pha nga hapteiyei nyiphen kü haoleipü ashak kü vülok shihtuh.

⁵Shongpü ashak pha nga hapteipü shongpüpa pha kü vülok pinyipüan shihtuh; hapakei ashak pha nga hapteipü nyipabü dohpü ashak kao jiüteiyei vülok pinyipüan shihtuh.

⁶Ashak pha nyiphen chemi shenteihühen shingvaishi hon bakshang pinyipüan shihtuh.

⁷Yum mum yah-ei lingpü ashak pha anpühük ashakshem shangkü jümhen lingtuh.

⁸Haenhen ashak ieyei kü yang kü meter anpüjem, ba kü meter nyi shei aihük mü ashak pha anpühük lingtuh.

⁹Ashak pha nga yah-ei chemi shepei thüngtuh, hatü aopü vokao hapakei thüngtuh, hatü vokpabü ashaki ashakshem shemshe philei nyi vaishi abtuh.

¹⁰Ashak pha nga hapteipü dohpü ashakjung kü vülok pinyipüan, hatü nyipabülei ashakjung kao vülok pinyipüan shihtuh.

¹¹Melangnyiami nyiamkam pinyipüan lingtuh, hatü ashak pha hük kei leihen shingvaishi hapa vülem kü shütü loktuh.

¹²Ashak hükkei shing aopeyü ashakshem ngaümpheilei shüei shantuh.

¹³Dangpongei centimeter pinyipüan baong aopeyü hapa ashakshem kü jümhen shingvaishi dangpongei sheüei shantuh.

¹⁴Ashakshem kü jümhen shingvaishi mishuw hakpüh-i lingtükpü hük hatü ha shangkü jümhen meipü phaishuw hük lingtuh.

¹⁵Ashakshem vehen akacia pü yah-ei haongei shem yeütuh.

¹⁶Hapa pü yangkü meter 4, hatü ba kü centimeter 66 yahtuh.

¹⁷Pü jung nyiphen ai jiüei hapteihen shingvaishi püju kahtüktuh; hapakei ashakshem vehen pü kemei lingtuh.

¹⁸Heong lemei shihhen pü kukha lingtuh,

¹⁹hatü ngini ha kü lebenüng pinyi lingtuh; shongpü pü jung dangpongei hükbaong lehen, hatü hükpa pü jung dangpongei hükbaong lehen.

²⁰Ashakshem heshü lemei shihhen pü kukha lingtuh,

²¹hatü pü jung ieyei kü phangei lehen ngin pinyi lingtuh,

²²hatü heshüphi lemei ashakshem kü shihhen vok lingtuh,

²³hatü ashakshem shouk philei shihhen pü nyi yahtuh.

²⁴Ha shoukei shihpü püyü chongei laolao nyuhen, shejao shangeiyü bakshang hük kü khaaiteiyei nyiphen aihük mü linghen; hapakei shouk nyi vamhühen vongbong.

²⁵Hanangkü halei pü shet nyuhen, hatü pü ieyei kü phangei lehen ngin anpüvok nyuhen.

²⁶Akacia pü yah-ei pü hi pü aiteiyei anpünga lingtuh, ngayü ashakshem hük lemei,

²⁷pü ngayü hükpa lemei, hatü ngayü ngaümphei lemei heshüphi kü shihhen lingtuh,

²⁸hatü jiam kübü püyü hükkeishing noei antü jung hük kübü jung hük dohpüphi thahshi vaihen vongbong.

²⁹Püthü kü honi jümtuh hatü lebü püthü yephen shingvaishi honi bakshang lingtuh, hatü aiteipü pü kao honi jümhütuh.

³⁰Kahshangei ngei am kü huphopü küpjan aimü ammi ashakshem vetuh.

³¹Ammi nyemin ashak thüngla ow, manghshempü ow, hatü iyshüm kei hakpü ow kohpü ashak hük lingtuh, hatü hapa kü lahhinei dükaokhen shennyak hüki cherubim hiuei shihtuh.

³²Hapayü honi jümtüktü, honi bakshang lingtü ngin ali yah-ei phangei leshi nyupü akacia püi lingpü shemnyü ali kü sheüeishuoh.

³³Ashakshem mongei ashakü bakshang kü shenei tuhtuh, hatü hapa ashak mongei Vangpüshuwpü Pela shüei tuhtuh, hatü hapa ashaki am shingvaishi Daülangpü Shing hatü Nyeinya Daülangpü Shing baong hanphahen.

³⁴Vangpüshuwpü Pela kü shaküp küptuh.

³⁵Nyeinya Daülangpü Shing shelei apshaphi kü haüdü hük haütuh, hatü pehephi kü awdük shemshing hük haütuh.

³⁶Ashakshem kü shaden shühen lemei thüngla ow, manghshempü ow, hatü iyshüm kei hakpü nyemin ashak kü hiuei ow shihtü ashak hük lingtuh.

³⁷Hapa ashak sheühen shingvaishi akacia pü nga yah-ei honi jümei honi bakshang shihtü lingtuh; hathü shemnyü kü phangei lehen melangnyiam nga lingtuh.