Read Phom Naga MÜLANGPÜ 27 Bible Online

MÜLANGPÜ 27 - Phom Naga bible

MÜLANGPÜ 27

¹Akacia pü yah-ei ammi moidü hük yangkü meter 2.2 hatü ba kü meter 2.2, hatü shaopü kü meter 1.3 lingtuh.

²Ammi hapa vaungjung ali kü vaung lingtuh, hatü vaungü hapa kübü-üng phaakei linghen vongbong, hatü hapa kü melangnyiami jümtuh.

³Depla thaiyei shihteihen dükthü, nyüphokshung, chilimji, haolak hatü ajap lingtuh; ammi nükdük haodük kemei melangnyiami lingtuh.

⁴Melangnyiami lüng hük lingtuh, hatü ha kü lütü paihen shingvaishi melangnyiami vaungjung ali kü bakshang lingtuh.

⁵Hapa moidü hükkeishing shang lemei aonghen mü hapa nyiamlüng kharila phangei shütuh.

⁶Akacia pü yah-ei moidü paihen lüng lingtuh, hatü ha kü melangnyiami jümtuh,

⁷hatü mechem paihenshang moidü dangpongei lüng nyuhen shingvaishi bakshang kü lüng lüei shüshihtuh.

⁸Ammi moidüyü taukta yah-ei sha kohshi lingtuh; kahshangei ngei am kü hupü aimü jiüshi lingtuh.

⁹Ami ashakshem kü chingshe bantuh. Pehephi chingshe lemei nyemin ashak nyiükei lingpü meter 44 lushi lingtuh;

¹⁰Hapalei shemnyü kukha, hatü ha phangei lehen pülu-ü melangnyiami lingtuh, shejao shemnyü kübü bakshang hatü ha yepei shahenü ngini lingtuh.

¹¹Hapa keiha apshaphi lemeiyao lingtuh.

¹²Heshüphi chingshe kao ashak meter 22 shüei shantuh, hatü shemnyü an hatü ha kü lehen an lingtuh.

¹³Heongphi chingshe ba kü meter 22 lingtuh.

¹⁴Hük lemei ashak meter 6.6 sheüei shanshihtuh, hatü shemnyü jem mü phangei lehen jem lingtuh.

¹⁵Hükpa lemeiyao ashak meter 6.6 sheüei shanshihtuh, hatü shemnyü jem mü phangei lehen jem lingtuh.

¹⁶Hapa chingshe shaden kü thüngla, manghshempü hatü iyshüm kei hakpü meishi nyiüktükpü nyemin ashak meter 9 lushi shihtuh; hapa kü shemnyü ali hatü ha kü phangei lehen ali lingtuh.

¹⁷Chingshe shinpülei haongpü shemnyüthü kü ngini hatü hathü kü phangei lehenü melangnyiami lingtuh.

¹⁸Chingshe yangkü meter 44, ba kü meter 22, hatü shaopü kü meter 2.2, ha kü nyiüktükpü nyemin ashak hatü ha phangkü lehen melangnyiami lingtuh.

¹⁹Ashakshemei noteihen dükhi-üm kemei, halei haonghen hatü chingshelei haonghen peü melangnyiami lingtuh.

²⁰Nedoh-i aw bah-ei nyuhen shingvaishi Israel am kü peü mü meipü mainga yah-ei peikahen ngeükhüam shuohtuh.

²¹Ashakshemei Aaron hatü chehathüi Vangpüshuwpü Pela touei haenpü ashak haolei om kübü dhom thahshi aw jakei tuhhen. Hapayü Israel ami hüdenhalenshi noteihen ngeükhüam nyüke.