Read Phom Naga MÜLANGPÜ 3 Bible Online

MÜLANGPÜ 3 - Phom Naga bible

MÜLANGPÜ 3

¹Shaang, Mosai cheko Jethro, Midian am ngongpalei mi yomei nyu; büpai mithü müei yingnyü homei Kahvangei daülangpü Horeb Kahshangei aong.

²Halei SHEMBÜPAlei phongshan pünien kübü awlom kei büpa touei vamteke. Mosai pünien kü aw bahlangmao hapa pünien aw-i nehah-i ee.

³Hahepak kü Mosai, “Hapa pünien mehekei aw-i nehahtüknya; hapa yashanpü dou kü ngei yopailei heih-ei hingei veihen khih” shei deih.

⁴Mechem SHEMBÜPAi Mosa hapa yopailei heihdaiyei eepa, Kahvangi pünien kübü vamei, “Mosa, Mosa!” shei nyük, hatü Mosai, “Ngei hammü nyüpeih” shei jang.

⁵“Nüng yopailei teheihkei. Nüngei lathuh bhühtüktuh; mehenangkü nüng yaongpü shingü daülangpü shing khih” shei Kahvangi e.

⁶“Ngeiyü ammei bühipa Kahvang, Abraham Kahvang, Isak Kahvang, hatü Jakob Kahvang hih” shei Kahvangi e, hatü Mosai büpalei dhe jolang; mehenangkü büpai Kahvang kü veihen nyemteke.

⁷Hahepak kü SHEMBÜPAi, “Ijip kahdokei nyupü ngelei nanglakthü ponghahpü ngei eeteke; dou kü hienbüthüi shüveipü nangkü lenpüwongpü ngei danteke. Ngei jom ponghahpü nyingteke,

⁸hatü ngei Ijip amei lak kübü am yanglanghen peiküpeih, hatü meipü hatü bhashahpü kahdok, amma hatü nyahjiü mon yenpü kahdok, Kanan am, Hit am, Amor am, Perizz am, Hiv am, hatü Jebus am nyupü kahmükei ngei jom müei leilanghen.

⁹Shaang Israel am lenpüwongpü ngei ngoiteke hatü Ijip ami mekei jom kü shüveinya ngei eeteke.

¹⁰Hanangkü ngelei nanglak Israel am Ijip kahdok leipü mülanghen ngei nüng Pharaoh touei shomhen” shei e.

¹¹Shejao Mosai Kahvang kü, “Pharaoh touei peiyei Ijip leipü Israel am müei daihen ngei üpaang?” shei e.

¹²Kahvangi, “Ngei nüng mü nyukahen; hatü ngei nüng shompü denpü hapa nyukahen: Mechem nüngi ngelei nanglakthü Ijip leipü müei daihen, ammi hapa kahshangei ngei kü khümhen” shei e.

¹³Shejao Mosai Kahvang kü, “Ngei Israel am touei peiyei ammei bühipa Kahvangi am touei ngei shompü khih shei eshuohjü, ‘Büpalei men üpaang?’ shei ngei kü phephüjü ngei jom kü mehe eshuohhenang?

¹⁴Kahvangi Mosa kü e, ‘NGEIYÜ NGEI HIH.’ Israel am kü, ‘NGEI’ shei epübai am touei ngei shompü khih shei etuh” shei eteke.

¹⁵Kahvangi Mosa kü, “Nüngi Israel am kü hapakei etuh, SHEMBÜPA, ammei Kahvang, Abraham Kahvang, Isak Kahvang, Jakob Kahvangi am touei ngei shompü khih shei eyeishuoh” shei eteke. Hapayü denden shing ngelei men; hüdenhalenshi ngei deih-ei danghen men nyüke.

¹⁶Layaongtuh hatü Israel am behethü nyükei thaihütü jom kü, “SHEMBÜPA, ammei bühipa Kahvang, Abraham Kahvang, Isak Kahvang, hatü Jakob Kahvang ngei touei vamei ephopeih shei eyeishuoh: Ngei am kü veishi nyüpeih hatü am kü Ijip ami mehe dükpa ngei nyingei nyüpeih.

¹⁷Ngei am Ijip kahdokei shangpong yakyingpü kübü amma hatü nyahjiü yenpü Kanan, Hit, Amor, Perizz, Hiv, hatü Jebus amei kahdokei mülanghen ngei temtepih.”

¹⁸Nüngi mehe enya ngelei nanglakthüi ha bangkahen; nüng hatü Israel behethü Ijip ongpa touei peiyei büpa kü, “SHEMBÜPA, Hebrew amei Kahvang ham touei shakei vamküteke. SHEMBÜPA, hamei Kahvang kü jahpanei nyih jem lem kü daiyei jakpü moila shuohhen ham kü mongshih” shei eyeishuoh.

¹⁹Shejoongpa, wong longpü lak hüki büpa kü manghong thahshi Ijip ongpai amphong nedeishihshasha shei ngei nyingteke.

²⁰Hanangkü ngei ngelei lak noei ngelei yashanyale dou peü dükei Ijip am kü bheihen; hapheikü büpai am deishihhen.

²¹“Am mechem layaongei daihen, am lakkong nedaihen shingvaishi Ijip ami am kü yahyang shinshang thentoimongdang vamhühen.

²²Israel nyühathüi laophülei chingyow kü hatü jomei shemei loiyei nyupü nyühathü peüi hon hi ngin hatü ashakviha yütuh, hatü ammi hathü yah-ei laophülei hapeüthü kü owhütuh; hapa keiha ammi Ijip am kü aetpüshepü dou dükhen” shei eteke.