Read Phom Naga MÜLANGPÜ 31 Bible Online

MÜLANGPÜ 31 - Phom Naga bible

MÜLANGPÜ 31

¹SHEMBÜPAi Mosa kü,

²“Veituh, ngei Hurlei cheha Uri, Urilei cheha Bezalel, Judah am phang kübü jetepih,

³hatü büpa kü lahhinei doumük kohshi lemphü mistri dou dükhen kihikon,

⁴hon, ngin hatü melangnyiam kü lahhinei dükhen,

⁵yaong ai jiüshi bhaokhen, hatü pü dou dükhen hatü lemphü mistri dou yaoei dükhen ngei büpa kü Kahvang laangha mahütepih.

⁶Shao ngei Dan am phang kübü Ahisamakhei cheha Oholiab-ao büpa mü sheühteihen jetepih. Ngei nüng kü epü lemphüli meishi linghen shingvaishi ngei jom kü lahhinlangnyai kon shuohtepih.

⁷Ashakshem, Vangpüshuwpü Pela, ha shangkü shaküp kohtü hatü haleipü douhinang peü omshi,

⁸haüdü hatü haleipü dükhiümthü, hatü hon awshong hatü haleipü douhinangthü, ayingshü jakpü moidü,

⁹hatü jakpü moila jakteipü moidü, hatü haleipü dükhi-üm hatü la kohpü chilimji,

¹⁰hatü meishi dakpü ashak, Aaron hatü chehathüi ngei kü ngongdou dükshingkü owhen daülangpü owhiai,

¹¹hatü phuhen mainga hatü Daülangpü Shing shingvaishi vong meipü meli peü linghen lahhinlangnyai kon peü mistrithü kü shuohtepih.”

¹²SHEMBÜPAi Mosa kü,

¹³“Nüngi Israel am kü etuh, ‘Ammi Sabbath themtuh; mehenangkü hapayü ngei, SHEMBÜPAi am daüeilangei leihüpeih shei ngoikahen denshemthü peü kü nyinghen shingvaishi ngei hatü am aa kü nyangeihepü hük nyüke.

¹⁴Ammi Sabbath themtuh; mehenangkü hapayü am shingvaishi daülangpü nyüke; üami ha sheihtükhenshang jütükhen; üami hapa nyih mangei dou dükhenshang, laophülei nanglak khong kübü katitükhen.

¹⁵Nyih vok ammi dou dükhen, shejao nyih nyetpabü-ü SHEMBÜPA kü daülangshemsheyei themhen Sabbath nyih nyüke; üpai ha Sabbath thempü nyih dou dükhenshang jütükhen.

¹⁶Hanangkü Israel am peüi ngoikahen denshem peü shingvaishi nedohnetenpü shahkungnyü shei hapa Sabbath themtuh.

¹⁷Mehenangkü hapayü ngei hatü Israel am aa kü denshing nyangeihepü hük nyukahen; mehenangkü nyih vok kü SHEMBÜPAi vangsho hatü kahdoknyü lingteke, hatü nyih nyetpabü kü dou nedüki nyiumeiteke.’ ”

¹⁸Mechem Kahvangi Sinai Kahshangei Mosa mü shah eteiyei tempa, büpai büpa kü Kahvangei lakjaangi shüngei nyangpü Shahkungnyü Yaongshung nyi shuohteke.