Read Phom Naga MÜLANGPÜ 32 Bible Online

MÜLANGPÜ 32 - Phom Naga bible

MÜLANGPÜ 32

¹Mechem nanglakthüi Mosa kahshang leipü nelei-i longi pheidaiteke shei veiaokpa, jomi Aaron shonei thaiyei büpa kü, “Ham Ijip leipü müei daipü hapa Mosa naühayü mehe heühahpa nenyingang. Peikei, ham kü lem müphahen shingvaishi kahvang hük lingshih” shei eteke.

²Aaroni jomphong kü, “Ammei nyühathü, ammei yeshangthü hatü yiükhathülei dhaongei chüpü hon dhaongchüthü peü ngei touei yah-ei peikei” shei e.

³Hanangkü nanglakthü peüi jomei hon dhaongchü bhüh-ei Aaron touei yah-ei pei.

⁴Jomi yahshuohpü hon peü büpai yah-ei mohoh cheha kei lajei hük shükei ling, hatü jomi, “Oh Israel am, hapayü Ijip kahdok leipü am müei daipü kahvang khih” shei eteke.

⁵Mechem Aaroni hapa eepa, büpai hapa touei moidü hük lingtü lenei, “Ngenyih-ü SHEMBÜPA kü mo hük mohen” shei e.

⁶Hanangkü nyihphei nanglakthü lomi paoei jakpü moila hatü mongjempü moila shuoh. Hapheikü nanglakthüi hah-ei yingei ngeteicheüei mongongteke.

⁷Hahepak kü SHEMBÜPAi Mosa kü, “Nüng chem leituh! Mehenangkü nüngi Ijip leipü müei daipü nüngei nanglakthüi ngei khüei mang thahteke;

⁸Ngei jom kü dükhen eshuohpü peü yakphongtü lembienei lüdaikemteke; jomi jom shingvaishi mohoh cheha lajei hük lingtü ha kü khümei jakpü moila shuoh-ei, ‘Oh Israel am, hapayü am Ijip kahdok leipü müei daipü ammei kahvang khih’ shei enyüke” shei eteke.

⁹SHEMBÜPAi Mosa kü, “Ngei hapa nanglakthüyü longi mong vaanshi eenyüke.

¹⁰Shaang ngei ngelei mongshih vamhen hatü jom mahtükkemhen. Ngei nüng kübü jat longpü hük linghen” shei eteke.

¹¹Shejao Mosai SHEMBÜPA, büpalei Kahvang kü khümei eteke, “Oh SHEMBÜPA, nüngei laklu wong longpai Ijip kahdok leipü nüngi müei leipü nüngei nanglakthü khüei mehekei mongshih vamnya?

¹²Mehekei Ijip ami, ‘Jomü kahshangei jütükkemhen, hatü kahdok shak kübü li hümtükhen nangkü nemeipü küpjani müei deipeih’ shei ehühenang? Nüng mongshih anpü kübü, hatü nüngei nanglakthü kü shanghah koei peihen nyupü kübü mong leituh.

¹³Nüng chongphopü Abraham, Isak hatü Jakob hathü kü mekei nüngi lah-ei, ‘Ngei ammei hühihathü vangsho lithilen kei dahühen, hatü ngei lahpü kahdok peü ammei hühihathü kü shuohhen hatü jomi denden kü hapa jomei mükjüp vaihen shei epü deih-ei dangtuh’ ” shei eteke.

¹⁴Hahepak kü SHEMBÜPAi laophülei nanglakthü kü koei peihen shei tempü shanghah neshuohhen mong leiteke.

¹⁵Hahepak kü Mosai kahshang leipü Shahkungnyü Yaongshung nyi dangpong phenkü nyangtükpü noei leiteke.

¹⁶Hapa yaongshungü Kahvangi lingpü nyuteke, hatü laknyangü Kahvangei laknyang yaong kukei nyangpü nyuteke.

¹⁷Mechem Joshua-i nanglakthüi leneiwongpü danpa, büpai Mosa kü, “Baümtapei vehok ngeü dannyüke” shei e.

¹⁸Shejao Mosai eteke: “Hapayü hok neüpü ngeü nevai, nevaijü mahngeü nevai; Hapayü ngei danpülei lokei haiyei mongongmonglepü ngeü khih.”

¹⁹Mechem Mosa baümtap yopailei ngoipa, büpai mohoh cheha lingtü oeihoei phaukteipü eeyei büpa longi mongshih, hatü hapa Shahkungnyü Yaongshung noei kahshanglalei shüktü khih mü nihtük,

²⁰hatü jomi linghahpü mohoh cheha yah-ei büpai aw kü jaktük, hatü khih mü ngümtü yungei haitük, hatü Israel am kü ha yingshuohteke.

²¹Mosai Aaron kü, “Nüngi hathü nanglakthü hajükjük longpü mang thahhen mü jomi nüng kü mehe lingphopa?” shei e.

²²Aaroni, “Nüngi ngei kü ahshi mong teshihkei. Hathü nanglakthüi mang dou dükhen monghumpü nüngi nyingdaiphei.

²³Jomi ngei kü, ‘Ham Ijip kahdok leipü müei daipü Mosa naühayü mehe ponghahpa, nenyingang; ham kü lem müphahen shingvaishi kahvang hük lingshih’ shei ephopeih.”

²⁴Hanangkü ngei jom kü, “Üam üami hon angpa ha ngei kü yahshih shei eshuohpeih. Jomi ngei kü hon yahpha-i aw kü jakshuohjü hapai mohoh cheha leiyei vamküpeih” shei e.

²⁵Aaroni nanglakthü ungei neaoki mangtükpü khih shei Mosai eeaokteke, hatü jomi vepathü tou kü mihnyiyangnyai leihüteke.

²⁶Hanangkü Mosai baümtap shadenei yaongtü, “SHEMBÜPA philei üpa nyüpa, ngei touei heihkei” shei e. Hahepak kü Levi am peü büpa shonei thaijateke.

²⁷Büpai jom kü, “SHEMBÜPA, Israel amei Kahvangi, ‘Shennyak peüi laophü laophülei yanlu laaptuh, hatü baümtapthü shaden hük kübü hük thahshi changteiyei am peüi laophülei jeihinaü, laophülei küphü hatü laophülei chingyow jütuh’ shei enyüke” shei eteke.

²⁸Mosai eshuohpükei Levi ami dük, hatü ha nyih shennyak haja jem jüteke.

²⁹Mosai, “Shinnyih, ammi laophülei hapeüthü hatü jeihinaüthü jüpai SHEMBÜPAlei dousho shingvaishi am jeteke, hatü shinnyih büpai am kü moihimanteke” shei e.

³⁰Nyihphei Mosai nanglakthü kü, “Ammi nyembenüng mang longpü thahteke. Shejao shaang ngei kahshangei SHEMBÜPA touei aonghen; üpai nying, ammei mang tükeishuoh shei eshuohhen” shei e.

³¹Hanangkü Mosai SHEMBÜPA touei nyokei leiyei, “Oh hapa nanglakthüi mang longpü thahteke! Jomi jom shingvaishi honi kahvang lingteke.

³²Shejao shaang nüngi jomei mang tükjema — shejao hapakei nevaijema, nüngi nyangpü laitap kübü ngelei men thittüktuh” shei e.

³³SHEMBÜPAi Mosa kü, “Üami ngei khüei mang thahpa, ngei jomei men thittükhen.

³⁴Shaang, nüng leituh, hatü ngei nüng kü epü shingei nanglakthü müei daituh, hatü ngelei vangsho phongshan am shekü shongkahen. Shejoongpa, mechem hepak ngoihenshang ngei khüei mang thahpüthü jomei mang nangkü hanghihühen” shei eteke.

³⁵Aaroni mohoh cheha lingei jomi ha kü khümpü nangkü SHEMBÜPAi nanglakthü kü cham shomei hanghihüteke.