Read Phom Naga MÜLANGPÜ 33 Bible Online

MÜLANGPÜ 33 - Phom Naga bible

MÜLANGPÜ 33

¹SHEMBÜPAi Mosa kü, “Nüng hatü nüngi Ijip leipü müei daipü nanglakthü peü hapa shing tuhphongtuh, hatü layaongei ngei Abraham, Isak, hatü Jakob kü, ‘Ammei hühihathü kü shuohhen’ shei lahpü kahdokei daituh.

²Ngei am shekü vangsho phongshan hük shomhen hatü Kanan am, Amor am, Hit am, Perizz am, Hiv am, hatü Jebus am peü changtükhen.

³Amma hatü nyahjiü yenpü kahdokei daituh; shejao ngei am mü nedaikahen, hei nevaijema ngei lem jiamei am mahtükhen hih; mehenangkü amphongü mong vaanpü nanglakthü khih” shei eshuohteke.

⁴Mechem nanglakthüi hapa shahwong epü danpa, üpaiyao owhiai ne-owi thepteke.

⁵Mehenangkü SHEMBÜPAi Mosa kü, “Amphongü mong vaanpü nanglakthü khih. Kansho hük dangkao ngei am mü daijema, ngei am jütükkemhen khih. Shaang ammei owhiai nyiuktüktuh, hatü ngei am kü mehe dükhen ngei baong hanpü yahhen shei eyeishuoh” shei eteke.

⁶Hanangkü Israel ami Sinai Kahshang hompheikü jomei owhiai nyiuktük.

⁷Shaang Mosai düngei vaishi baümtap shelei baümtap kübü kanja yanei ashakshem vehamteke; büpai hapa kü thaishing ashakshem shei men, hatü shennyak hanei-i SHEMBÜPA mü shah eteihüjema halei peihamteke.

⁸Mechem Mosa hapa ashakshemei peihenshang, büpai hapa ashakshem mongei mangshüdai thahshi nanglakthüi laophü laophülei ashakshem shelei yaongshi veihamteke.

⁹Mechem Mosa ashakshem mongei shüdaihenshang phum shemnyü yiüei ashakshem shadenei yaonghamteke, hatü SHEMBÜPAi Mosa mü etei.

¹⁰Mechem nanglakthü ashakshem shadenei phum shemnyü yiüei yaongpü eehenshang, nanglakthü peü aümei shaei laophü laophülei ashakshem shatüngei khümhamteke.

¹¹Küphü hüki hük mü eteipükei SHEMBÜPAi Mosa mü dhe dhe gongei etei. Hapheikü büpa baümtapei leihamteke; shejao büpa mü sheühteipü nethepa, Nunei cheha Joshua ashakshem leipü mechemao nelüdai.

¹²Mosai SHEMBÜPA kü, “Veituh, nüngi ngei kü, ‘Ha nanglakthü müei daituh’ shei ephüteke, shejao nüngi üpa ngei mü shomhen nüngi ngei kü nenyinghü. ‘Nüngi ngei meishi nyingnyüpeih hatü ngei kü monghahnyeih’ shei eteke.

¹³Shaang nüngi ngei kü monghahjema, nüngei lemthü ngei kü nyuhshih; shejüang ngei nüng chongphohen hatü nedoh-i ngei nüng monghahhühen. Hapa jatliyü nüngei nanglakthü shei deihtuh” shei eteke.

¹⁴SHEMBÜPAi, “Ngei am mü omshi daihen hatü ngei am kü aokpü shuohhen” shei eteke.

¹⁵Mosai büpa kü, “Nüng ham mü omshi nedaihen vaijema, nüngi ham hatou kübü müei tedai.

¹⁶Nüng ham mü omshi nedaipü thahshi ngei hatü nüngei nanglakthü kü nüngi monghahnyüke shei mekei nyinghen? Hapakei vaijü mon kahdok shak kübü hangkuli mü ngei hatü nüngei nanglakthüyü hayaoha khih shei nyingaokhen” shei eteke.

¹⁷SHEMBÜPAi Mosa kü, “Nüngi phepükei ngei dükhen; mehenangkü ngei nüng kü monghahnyeih hatü ngei nüngei men lekei nyingnyüpeih” shei e.

¹⁸Mosai, “Nüngei müknyinshekhang ngei kü hushih” shei khümei e.

¹⁹hatü SHEMBÜPAi, “Ngei nüng touei ngei meipü peü peih-ei deiphahen, hatü nüng touei ngelei menü, ‘SHEMBÜPA’ shei baonghen, hatü ngei am kü phahjihen hatü shinshanghen.

²⁰Shejao büpai, ‘Nüng kü ngelei dhe nehuphapih; mehenangkü üpaiyao ngei eetü yemmü nenyuaokpih’ ” shei eteke.

²¹Hatü SHEMBÜPAi nedoh-i, “Veituh, ngei touei nüng yaongshang kü yaonghen shing hük nyüke.

²²Mechem ngelei müknyinshekhang peih-ei daihenshang ngei nüng yaong bhaokdaipü sha hükei tuhshah, hatü ngei peih-ei mangdai thahshi ngei nüng kü ngelei laki jümshah.

²³Hapheikü ngei ngelei lak nolanghen, hatü nüngi ngelei ngaümphei eehen, shejao ngelei dhe ne-eehen” shei eteke.