Read Phom Naga JOB 1 Bible Online

JOB 1 - Phom Naga bible

JOB 1

¹Chem hepak kü Uz kahdokei shennyak hük Job shei mentü nyu. Hapa shennyakü eela neshiü hatü kangshangi nyu, hatü büpai Kahvang nyem hatü mang nedükhen kenhingpü shennyak nyuteke.

²Büpalei yeshang jom nyet, yiükha jom jem thahshi nyu.

³Büpai mi haja nyet, ut haja jem, mohohbaong jora haja nga, gadu haja nga hatü aathü longi nyu. Hanangkü hapa shennyakü heongphi kübü nanglakthü khongkü peü mü longpü shemmeipa nyuteke.

⁴Büpalei yeshangthüi jeijeilei-i shemshemei mo hahhamteke, hatü jomphongi chenaüthü jom jemao hahhen yinghen nyükhamteke.

⁵Mechem jom mopü temhenshang Jobi jomphong daütük, hatü büpai dhom mü lomi paoei jomphong pabüm ieyei shing jakpü moila shuoh; mehenangkü Jobi, “Ngelei hapeüthüi mang thah-ei shiühen aokpeih, hatü jomei mongei Kahvang thaüvaüei shiühen aokpeih” shei e. Jobi düngei hapakei dükteke.

⁶Nyih hük vangsho phongshanthü SHEMBÜPA mü pongteinüng pei, hatü Satanao jomphong mü omshi pei.

⁷SHEMBÜPAi Satan kü, “Nüng meleipü peiküpa?” shei phe. Satani SHEMBÜPA kü, “Kahdoknyü kü shüaong shülei longteiyei nyupü kübü peiküpeih” shei e.

⁸SHEMBÜPAi Satan kü, “Nüngi ngei chongphopü Job kü mük shahnyu je? Kahdoknyü kü büpa kei eelashing neshiüpü, kangshangpü shennyak, Kahvang nyempü hatü mang nedükhen kenhingpü neshiüpih” shei e.

⁹Hahepak kü Satani SHEMBÜPA kü jangei, “Jobi Kahvang nyemnyu je?

¹⁰Nüngi büpalei shem shinei büpai angpü shinei peü lemei pe neshowangpü je? Nüngi büpai dükpü lemphüli kü moihimanteke, hanangkü büpalei mi hatü mohohthü kahdok maei nyüke.

¹¹Shejao shaang nüngei lak noei büpai angpü peü kü hongeishuoh, hatü büpai nüngei dhe kü nyeanshi thaüvaüphahen hih” shei e.

¹²SHEMBÜPAi Satan kü, “Meiteke, büpai angpü lemphüli nüngei lakmongei yahphünyeih; nüngi büpalei büm kü mon laki tehong” shei e. Hanangkü Satan lüdai.

¹³Mechem nyih hük büpalei hapeüthüi chejei bahhepalei shemei mo hah-ei nyupa,

¹⁴phongmokbü hük Job touei peiyei, “Mohohthü han hokei, hatü gaduthü het hah-ei nyushingkü,

¹⁵Sabea am peiyei kemei yah-ei lüdaiteke hatü aathü peü jütükteke; ngei mon nüng kü hapa ehen yangpü khih” shei e.

¹⁶Mechem büpai ha shah eyei nyupa, shao lebü phongmokbü hük peiyei, “Vangsho leipü Kahvang aw vüei mi hatü mi yombüthü peü hahtükteke; ngei mon nüng kü hapa ehen yangpü khih” shei e.

¹⁷Mechem büpa ha shah eyei nyupa, shao lebü hük peiyei, “Kaldea am khong jem vaishi hantü peiyei utthü peü yah-ei lüdaiteke; hatü aathü peü jütükteke; ngei mon nüng kü ha ehen yangpü khih” shei e.

¹⁸Mechem büpa ha shah eyei nyupa, shao lebü phongmokbü hük peiyei, “Nüngei yeshangthü hatü yiükhathü chejei bahhepa am shemei mo hah-ei, yiü yingei nyushingkü,

¹⁹ngangahük kü yingnyü leipü yinglükleisho longpü heih-ei shem vaungjung aliphen kü lükei hapa shem laamei jomphong kü chettü peü jütük; ngei mon nüng kü ha ehen yangpü khih” shei e.

²⁰Hahepak kü Job yaong hatü büpalei ashak shaaktük, sho chaei kuptük hatü kahdokei aümei shaei khüm,

²¹hatü eteke: “Nyüei vom mongeipü ngei bümkong pei, hatü ngei bümkong haleipü daihen. SHEMBÜPAi shuohteke, hatü SHEMBÜPAi yahlangteke; SHEMBÜPAlei men longtuh.”

²²Hathü peü pongjao Jobi mang nethah hatü Kahvang kü nejiüi dükpü khih shei ne-e.