Read Phom Naga JOB 10 Bible Online

JOB 10 - Phom Naga bible

JOB 10

¹“Ngei ngelei yangnyu kü tengangke; ngei eelahüpüshük eelaei ehen hih. Ngei ngelei laanghai shahyaki ehen hih.

²Ngei Kahvang kü ngei tenyonghü; nüngi mehekei ngei khüei dokteinya shei eshuohhen.

³Nüngei laki lingpü dou kü shüveihen, hatü ne-ienelemhen, hatü nemeipü amei küpjan meiangke je?

⁴Nüng kü phai mük nyüpü je? Nüngi hangkui eepükei eenyu je?

⁵Nüngei nyihthü hangkulei nyihthü kei nyupü je? Nevaijü nüngei vangbongthü hangkulei vangbongthü kei nyupü je?

⁶Mehekei nüngi ngei shaipü mang yepei ngelei mangthü yemnya?

⁷Ngei pungei neshiü shei nüngi nyingei nyüke, hatü nüngei lak kübü üpaiyao ngei neyangaokpih shei nüngi nyingei nyüke.

⁸Nüngei laki shükpeih hatü lingpeih; shejema shaang nüngi ha nyokei mangtükhen je?

⁹Nüngi ngei ashemi lingpeih shei deih-ei dangtuh, shaang nüngi ngei bhihla leitükhen je?

¹⁰Nüngi ngei amma kei yenhü, hatü gheu kei netheanhüangpü je?

¹¹Nüngi ngelei büm vang hatü phai yah-ei ling, hatü vang hatü phai kü shuwi jümei lingteke.

¹²Nüngi ngei kü yangnyu hatü bampü shuoh, hatü nüngi jungei ngelei laangha yaongei tuhteke.

¹³Shejao hathü nüngi nüngei mongei joei tuhlang. Hapayü nüngei mükhong khih shei ngei nyingpeih.

¹⁴Ngei mang thahjema nüngi ha kü veishi nyüke, hatü nüngi ngei kü hanghi neshuoh-i netuhnyu.

¹⁵Ngei nemeijema ngeiyü onyükei! Ngei daülangi nyujoong ngei dhe ngangei neveiaoknyu; mehenangkü ngei veüpai hatü shangpongi jümlangteke.

¹⁶Ngei lemhük kü-üng aokpü dangjema, nüngi ngei kü mailangi kei shükphünyüke, hatü ngei khüei nüngei ngan huphünyüke.

¹⁷Ngei khüei nüngi denbü jathü müei peinyüke, hatü ngei khüei nüngei mongshih nyeinya vamnyüke; hatü ngei khüei nüngi veshanthü khong khong shomnyüke.

¹⁸Mehekei nüngi ngei nyüei vom mongeipü bühhüpa? Üpalei mükiyao ne-ee-i didailangmeyü meihah shepeih.

¹⁹Ngei yemmü nebühlangmeyü meihen, nevaijü vom leipü jiüshangi mahngchongei deitüklangmeyü meihen vaipeih.

²⁰Ngelei yangnyu nyih maani mon nevaipü je?

²¹Nyokei neleihen kahdokei manglüdai shekü, manghtangi nyupü hatü shangmang kahdokei,

²²Shangmang vangnyak vangdhüm, hatü bukpüshaanpai maei, vangngaiyao vangnyak kei nyupü kahdokei manglüdai shekü nyiumei maani dangkao danghen shangmü ngei monha tuhphongtuh.”