Read Phom Naga JOB 11 Bible Online

JOB 11 - Phom Naga bible

JOB 11

¹Hapheikü Naamah am Zophar-i jangei e:

²Ha shahthü kü shahnyok nelei-i tuhhen je? hatü hapa shah ahshi epü shennyak dah shakhühen je?

³Nüng vapvappai shah ne-e-i nendaiphahen shei deihnyu je? Nüng eelaei ejü üpaiyao nüng kü nelohphahen sheideihnyu je?

⁴“Ngei vaipü kü daülangi nyüpeih, hatü Kahvang touei daülangi nyüpeih” shei nüngi eteke.

⁵Shejao Oh Kahvangi büpalei ju kaei nüng kü elangmeyü,

⁶büpai nüng kü jopü kihikon jung ephahen vaipeih, mehenangkü kihikonü lem longi nyüpeih. Hanangkü Kahvangi nüngei mang kü shangpü aimü nevai, maani mon hanghihünyu khih shei nyingtuh.

⁷Nüngi Kahvangei doujo nyingaokhen je? Nüngi Jeiyong Kahvangi neaokbenüng yemaokhen je?

⁸Hapayü vangshothü mao shaoshi, nüngi mehe dükaokhen? Hathüyü Sheol mao chüpüba, nüngi mehe nyingaokhen?

⁹Hapayü kahdoknyü kü shetpü mao taipüba, hatü yungching ba mao longpüpa.

¹⁰Büpa peiyei nüng yepei khoklatei hüphongtü shahphenhen shahthai nyükjü üpai büpa kü khüamaokhen?

¹¹Hingmei büpai nemeipüthü nyingei nyüpeih, hatü mechem büpai mang eehen, büpai ha nyingei netuhhen je?

¹²Mechem phaü gadu-i shennyak leiyei cheha shaanhen, shejüang ngapai kihikon nyingei chongpanghen.

¹³Nüngi nüngei mongdang jiüshangi büpa kü shuohjema, hatü nüngei lak laülüki büpa philei haongjema,

¹⁴nüngi nüngei lak kübü mang yaktükjema, hatü nüngei shem kü ten nyuhen nehanjema,

¹⁵neveüi nüngi nüngei dhe ngangei shanglemei veiaokhen; nüngi nenyemi wong kohshi yaongaokhen.

¹⁶Mehenangkü nüng shangpongpü bedaihen, hatü yungnyü büng peihdaipü keiha deihkahen.

¹⁷Nüngei yangnyu nyihnüng mao nyapüba nyuhen, hatü vangnyakü vangngai leikahen.

¹⁸Nüng lakbowlayangei monglemshi nyuhen; Kahvangi nüng yangei nyiushem kü tuhhen.

¹⁹Nüng doeile-i lemhen, üpaiyao nüng nenyemhühen; hatü longshi shingi nüng khüambakei yaongkahen.

²⁰Shejao nemeipü amei müki hapa ne-eehen; jom kü yanglem kemei mahdaipükei nyuhen; hatü monglemshing kempeyü dihen mon nyukahen.