Read Phom Naga JOB 12 Bible Online

JOB 12 - Phom Naga bible

JOB 12

¹Hapheikü Jobi jangei e:

²Hingmei, amphongü shennyak meithü khih, hatü ammei kihikon am mü didaihen.

³Shejao amphong kü nyupükei ngei kao danaokpü nyüpeih. Ngei amphong mü phangpa nevaipih. Amphongi epü nenyingpü üpa nyüpa?

⁴Ngeiyü küphüthü toumü mihnyi pü leidaiteke; Ngei Kahvang kü nyükjü büpai janglangmao; ngei kü eela neshiüjao ngeiyü mihnyi pü leidaiteke.

⁵Amphongü shanghah nepongpü nangkü mih lomohpü kü eelanyüke; dodaihen mü nyupü shennyak kü ammi hungshuohteke.

⁶Gühpathülei ashakshemang chingmei kü nyüke; Laophülei lakei Kahvang noshi longteipü, hatü büpa mongshihhüpüthüang denmei chongnyüke.

⁷“Shejao yemhimakthü kü phetuh, hatü jomphongi nüng kü nyuhphahen; shangouthü kü phehümao jomi ephahen.

⁸Kahdoknyü kübü pühivungthü kü phehümao, jomi nüng kü nyuhphahen, hatü yungching kübü nyahthüi nüng kü venphahen.

⁹SHEMBÜPAlei laki hathü peü lingpeih shei nenyingpü hathü khongkü mepa nyüpa?

¹⁰Büpalei lakei yemhimak peüei yangnyu yem, hatü hangkulei ngüan ngülei nyüke.

¹¹Chepjü yei-i hahying nemeipü meipü nyingpükei, dhaongi epü shah dokei neveinyu je?

¹²Pahijei mü kihikon nyüpü je? Den lushi nyupai danaokpü koei peinyu je?

¹³Kihikon hatü wongü Kahvangei; shahnying hatü danaokpeyü büpalei lakei nyüpeih.

¹⁴Kahvangi shaaktükpheikü üpaiyao hapa lingei leihen neaok. Büpai khoklatei küptükpü üpaiyao hapa laihen neaok.

¹⁵Büpai vang nekeihüi shümlangjema, üpüvanpü pongnyüke; büpai vang keihüjema bünghiyangi lümlangnyüke.

¹⁶Wong hatü kihikonü büpalei; lawlüppa hatü lawlüphahpü nyiphen büpalei khan.

¹⁷Büpai vanglem lempüthü kon neshiüi leitüknyeih, hatü shahphenbüthü ngapathü kei leitüknyeih.

¹⁸Büpai ongpalei bhag-ai yükpat bhühtüknyeih, hatü shüng kü shüngshep shephünyeih.

¹⁹Büpai ngongpathü leipü ngong-ow bhühtüknyeih, hatü wong kohpüthü lungei shüktüknyeih.

²⁰Büpai monglempü shennyakthülei ju khüamtüknyeih, hatü behethü leipü kenhingmonghapü yahlangnyeih.

²¹Büpai longhiongthü nyonghünyeih, hatü wong kohpüthülei wong mahtükhünyeih.

²²Büpai vangnyak leipü chüpü douthü shakei ngainyeih, hatü vangngai kü shangmang koei peihünyeih.

²³Büpai jatthü longhünyeih, hatü hathü mangtüknyeih; Büpai jatthü dahünyeih, hatü hathü haitükkemnyeih.

²⁴Büpai kahdoknyü mübüthülei kihikon yahlangnyeih, hatü angsha lem kü paüeiyonei longteihünyeih.

²⁵Jomi vangngai neshiüi vangnyak kü lüteinyeih, hatü yiüi chokpü am kei tüngtüngmüngi longteihünyeih.”