Read Phom Naga JOB 13 Bible Online

JOB 13 - Phom Naga bible

JOB 13

¹“Veituh, ngelei müki hathü kemei eetepih, hatü ngelei dhaongi hathü peü dantepih.

²Nüngi mehe nying ngeiyao nyingnyüpeih, ngei nüng mü maanpü nevai.

³Shejao ngei Jeiyong Kahvang mü eteihünyüke, hatü Kahvang mü ngei ponghahpü nang shah shükteihünyüke.

⁴Shejao amphongü shahshemi hangei yahtü nyüke; am peü yahlak neshiüpü dinbüthü khih.

⁵Amphong shingvaishiyü ju kü shah nevami nendaijüang kon kohpü vaikahen!

⁶Shaang ngei epü bangtuh, hatü ngelei jui phepü kü banghümao.

⁷Kahvang nangjei amphongi shahshem ehen je? hatü büpa men kü lawlüpei ehen je?

⁸Amphongi büpa kü baong hanei hushuohhen je? amphongi Kahvang leimao shahvang eaokhen je?

⁹Kahvangi amphong dokei veijü lemhük dangkao meikohshi eeaokhen je? Hangku kü lawlüpükei amphongi büpa kü lawlüp-aokhen je?

¹⁰Amphongi joei baong hanei hujema, büpai hingmei amphong kü lohphahen.

¹¹Büpalei nganhilongi am nenyemhühen je? Büpalei nyempühanpü wong am touei nepeikahen je?

¹²Amphongei kandok shah-ü depla kei mon, hatü amphongi dah shakei epeyü ashem kei mon.

¹³Nenmü chongkei, hatü ngei eküshah; hatü mehe vamhenshang ngei kü nyemvamkei.

¹⁴Ngei ngelei phai bhalei maashah, hatü ngelei yangnyu ngelei lakei noshah.

¹⁵Büpai ngei jütükshasha khih; ngei monglemhen neshiü. Shejao ngei büpa touei ngei dah shakei ehen.

¹⁶Ngei monglongei hapakei ejüang ngei yemleihen aok, mehenangkü Kahvang nenyingpü üpayao büpa touei nepeinyih.

¹⁷Ngelei shahthü kü meishi banghümao; hatü ngei epü ammei dhaongei shühahtuh.

¹⁸Shaang ngei ngelei shahthü temei nyüpeih; ngei dah shakpü danghen shei nyingnyüpeih.

¹⁹Ngei khüei ehen hanei am nyüpü hiang? Nyujema, ngei nenmü nyudaihen hatü didaihen.

²⁰Oh Kahvang, ngei kü hapa doulem nyi mon uwshih, shejüang ngei nüng toueipü nejodaipih:

²¹Nüngei lak ngei toueipü yahlangshih, hatü nüngei nyempühanpai ngei tenyemhü.

²²Shejüang nüngi ngei kü nyüktuh, hatü ngei jangphahen, nevaijü ngei ephüjü nüngi jangshih.

²³Ngei pungpü hatü mang meshük thahpa? Ngei pungpü mang ngei kü hushih.

²⁴Mehekei nüngei dhe ngei toueipü jodaitü ngei kü vepa kü kei deihnya?

²⁵Vanglüki piyei deipü phenlak kü nüngi shüveihen je? Hahbhang kü nüngi changteihen je?

²⁶Nüngi ngei khüei shahyaki deihpü peü nyangtuh, hatü nethe hepak kübü thahpü mang lat ngei vetshah.

²⁷Nüngi ngelei la kü nyiamvüi shateke, ngelei lakham ieyei nüngi veishi nyuteke, hatü ngelei lameenao dokei nyuteke.

²⁸Hanangkü shedaipü dou keiha, dhaüpi hahtükpü ashak keiha hangkunyü mahdainyeih.”