Read Phom Naga JOB 14 Bible Online

JOB 14 - Phom Naga bible

JOB 14

¹Nyü-i bühpü hangkuliyü nyih kanja mon, hatü shanghah-i maei nyüke.

²Chü hük leshi pungnyüke, hatü laaidainyüke; vangdhüm laang kei lüdainyüke, hatü kansho hükao nenyunyu.

³Oh Kahvang, henüng keipü shennyak kü nüngei mük chinyu je? Nüngi büpa nüng touei shahphennüng deihen je?

⁴Nedaünelangpü kübü üpai daülangpü ngaiaokhen? Üpaiyao neaokpih!

⁵Hangkulilei nyihthüyü ittüktü nyüke; büpa len meshük nyuhen temtüktü nyüke: hatü hapa mü lenei nedaiaokhen mü nyih itteitü nyüke.

⁶Hanangkü büpa kü tevei, büpa monha tuhphongtuh; büpalei nyihthü nang shapü am kei nyemnyunüng tuhphongtuh.

⁷Agtükpü püchong hük kü pünien vamkahen shei monglemhen nyüke, hatü nienja shao neenkahen.

⁸Hapalei tünglang viüei hapa pütüng didaihen aok.

⁹Shejao yung nyupai hapa neenhen aok, hatü pübhao ja kei kao phaakei longkahen.

¹⁰Shejao hangkuli didainyüke hatü mahng vütüknyüke. Büpa didainyüke, hatü büpa hajük kü melei nyunya?

¹¹Shemyung üdaipü keiha, hatü yungnyü jepdaipü keiha,

¹²hangku hük kahmongei shüdaipheikü, haleipü yangei neleinyu. Vangshothü neshiüi manglei thahshi, hangkuli haleipü nevamhen, nevaijü shipü kübü nepaokahen.

¹³Nüngi ngei Sheolei nüng mongshihpü mangdoh thahshi jophonglangmeyü, hatü hepak ittü ngei deihlangmeyü meihah shepeih.

¹⁴Shennyak hük didaijü büpa shao yangaokhen je? Ngei hapa shangpongpü nyihthü mangpeihkem thahshi nyihmeihema danei nyuhen.

¹⁵Hapheiküang nüngi ngei kü nyükphahen, hatü ngei nüng kü janghen; hatü nüngei laki lingpü yem kü nüngi mongmeihen.

¹⁶Hapheikü nüngi ngelei lakham iehen; shejao nüngi ngelei mang ne-iepih.

¹⁷Ngei pungpüshaipü kemei nüngi tüktükhen, hatü ngelei mang peü nüngi küpei lintükhen.

¹⁸Shejao kahshang laamdaipükei, hatü yaongnyü shing chaidaipükei,

¹⁹Yungi yaong, hatü vangi kahcheü paülangpükei, nüngi hangkui monglempü mahtüknyüke.

²⁰Nüngi büpa kü düngei wongmü nonyüke, hatü büpa didainyüke; nüngi büpalei hangbong yeiyahütü shomtüknyüke.

²¹Büpalei hapeüthü menmei dangjao büpai ha nenyingnyu; jom bhihhah yungyingjao büpai ha ne-eenyu.

²²Büpai laophülei büm kü tüngpü mon nyingnyüke, hatü laophü shing mon youngnyüke.