Read Phom Naga JOB 16 Bible Online

JOB 16 - Phom Naga bible

JOB 16

¹Hapheikü Jobi jangei e:

²Hapa keipü douthü jung ngei longi dantepih; am peü yahlak neshiüpü nyiushem meibüthü khih.

³Yahlak neshiüpü shah vapvappü nedohhen je? Hapakei shah dakteiyei nyuhen mü amphong kü mehe vamküpa?

⁴Ngelei laphen kei amphongao nyukülangmeyü, ngeiyao amphong kei ehah shepeih.

⁵Ngeiyao am khüei shah longi ehah shepeih, hatü amphong kü ngaüm dhihah shepeih, hatü ngelei ju kübü nyiushemmei shah-i am nyiumeihühah shepeih.

⁶Shejao ngei shah epai shei ngei kü tüngpü nemeidai, hatü ngei hapa nenei nyujao, ngei kübü ha nelüdaipha.

⁷Hingmei, Oh Kahvang, nüngi ngei shaaktükteke, nüngi ngelei shem am peüli hümtükteke.

⁸Nüngi ngei yepei shatükteke, hatü hapayü peüi eeshi denpü leidaiteke; ngei koihdaipeyü ngei nang denpü khih.

⁹Kahvang mongshihpai ngei la laishi shaaktükteke, hatü ngei kü jiühitnyüke; ngelei vepai ngei kü mük shahnyüke.

¹⁰Shennyakthüi ju kaei ngei kü nyinyüke; jomphongi ngelei dhe kü apnyüke, hatü ngei khüei jom mongjemnyüke.

¹¹Kahvangi ngei shennyak tenthü kü lanei shuohtükteke, hatü mangthülei lak kü chingtükteke.

¹²Ngeiyü meheyao nevai-i meishi nyuhampeih, shejao büpai ngei nyi vaishi antükpeih; büpai ngelei üng kü yumei düktü khih mü ngümtükpeih. Büpai ngeiyü büpalei phuo nyingteipü pü leitükpeih;

¹³Büpalei lahhan ngei shinei nyüke. Phahji neshiüi büpai ngelei she kü peipeileiyei kapnyüke, hatü yiü bhaoei kahdokei yentüknyüke.

¹⁴Leiyei leiyei büpai ngei ma yahhünyüke; hampa-i keiha büpai ngei kü changnyüke.

¹⁵Ngei ngelei büm kü dhoila ashak thüngei ümpeih, hatü bhihla kü ngelei wong dungtükpeih.

¹⁶Theppai ngelei dhe hakdaiteke, hatü ngelei mük poukei vangdhümi shinlangteke,

¹⁷shejao ngelei laki ten düktükpü neshiü, hatü ngei phoppü daülangi nyüpeih.

¹⁸Oh kahdok, ngei kü nemei-i dükpü teküplang! Shahhing shingvaishi ngei lenpü kü nenmü tenyudai!

¹⁹Shaangao ngelei denpü vangsholei nyüke; ngei khüambakhen shangei nyüke.

²⁰Ngelei küphüthüi ngei nyonghünyüke; ngelei mükphi Kahvang kü yennyüpeih.

²¹Küphü hük shingvaishi shennyak hanei khümpükei, ngei nang Kahvang kü etükkahen ngei hanei am nanyüke.

²²Vangbong kansho hük pheikü shao nyokei neleihen lemshong kü ngei daihen.