Read Phom Naga JOB 18 Bible Online

JOB 18 - Phom Naga bible

JOB 18

¹Hapheikü Shuh am Bildadi jangei e:

²Nüngi henüng shahthü epü mechem dohhenang? Hami deihpü ephanüng banghümao.

³Hamphongü mohoh kei hatü ngapa kei nüngi mehekei deihnya?

⁴Nüng mongshihpai laophü-üng khih mü shaaktükteke. Nüng nangkü shennyakthü kahdok tuhphonghen je? Nüng monghamhühen nangkü Kahvangi kahshangthü shintükkemhen je?

⁵Hingmei-üng, nemeipü amei vangngai metdainyeih, hatü büpalei aw nebah-i dohdainyeih.

⁶Büpalei ashakshem leiyü vangngaiyao manghdainyeih, hatü büpa toueipü awdük metdainyeih.

⁷Büpalei lateen wong nekoh-i leidainyeih; laophülei küpjani-üng laophü lomohnyeih.

⁸Büpalei la-i tai kü mannyüpeih, hatü banghsha kü damnyüpeih.

⁹Taikami büpalei la-üng kü hinnyüpeih; hatü aethitai-i büpa shonglangnyeih.

¹⁰Kahdokei büpa shing vülok, hatü lem kü tai joei haenshi nyüke.

¹¹Peü philei nyempü vüngpai büpa nyemhünyüke, hatü büpalei laphei kü müshi changnyüke.

¹²Aeipülepai büpalei wong laaidainyüke, Mechem büpa dohenshang, büpa shingvaishi shanghah vongshüh temei nyüke.

¹³Dinteni büpalei hangshuw hahtüknyüke, hatü hapai büpalei lakhila hahtüknyüke.

¹⁴Büpayü laophüi mongyangpü ngamshem kübü mülanghen, hatü nyempühanpü ongpa mü ponghen deinyüke.

¹⁵Büpalei shem mongei meheyao nenyuhen; büpa nyushingei awkaong yaong nyüke.

¹⁶Büpalei tünglang kahmongei sheyei nyüke, hatü kaothü shangei vanei nyüke.

¹⁷Kahdoknyüi sheyü büpa deih-ei nedangnyu, hatü büpalei men thitei yaktükteke.

¹⁸Büpayü vangngai kübü vangnyak touei müei lüdaiteke, hatü kahdoknyü kübü changtükteke.

¹⁹Büpayü laophülei nanglakthü khongkü laophülei li nevaijü hühiha netuhnyu; büpa nyupü shingei lihila netuhnyu.

²⁰Heong heshü kübü shennyakthüi büpa ponghahpü danei thamahen hatü nyemhen.

²¹Hingmei-üng nemeipü shennyakei shahishem kü henüng vamnyeih, hatü Kahvang nenyingpü amei nyushingei hapakei hetnyeih.