Read Phom Naga JOB 21 Bible Online

JOB 21 - Phom Naga bible

JOB 21

¹Hapheikü Jobi jangei e:

²Ngei epü kü kenhingei banghümao; hatü hapayü nüngi ngei kü ephopü nanghong shah vaihütuh.

³Ngei ekününg chem nenkühümao, hapheikü mon nüngi najema thaüvaütuh.

⁴Ngeiyü hangku khüei langmaannyu je? Mehekei ngei nenteiaokpü neshiüi nyuhenang?

⁵Ngei kü veitü nethamaang je? hatü nüngei laki ju kü dhühlangtuh.

⁶Mechem hapa nang deihhenshang, ngei nyemei büm kheüei peikünyüke.

⁷Mehekei nemeipüthü nedi-i den luei wong kohshi yemmü nyunya?

⁸Jomei hühihathüi jom eeshi shingnüng chongkhenei nyunyüke.

⁹Jomei shemongthü kü meheyao nyempü neshiü, Kahvangiyao jomei shemong kü mehe shanghah-ao neshuohnyu.

¹⁰Jomei mohoh chebaongthü li neda-i nenyunyu; jomei mohoh chebithüi cheha tenei neyaktüknyu.

¹¹Jomei hühihathü mi khong kei shomnyüke; jomei naüthü phaukteiyei ngateinyüke.

¹²Jomi tambourin hatü harp vüngei kesho loknyüke; jomi liping vüngei mongongnyüke.

¹³Jomei den kemei angeideiyei peihnyüke, hatü nyiushemmei kü nyuei dinyüke.

¹⁴Jomphongi Kahvang kü, “Ham mongpükei nyuhen hih! Hami nüngei lemthü nyinghen napü neshiü,

¹⁵hami chongphohenü üpa Kahvang nyüpa? Büpa kü phoppai ham mehe nanglei danghen?” shei enyüke.

¹⁶Shejao jom angeideipeyü jomei lakei neshiü; hanangkü jomei nyuhichong mü ngei hayaoha nyunyeih.

¹⁷Meshükpa nemeipü amei awdük mettüknya? Meshükpa jom kü vongshüh peinya? Meshükpa Kahvangi mongshih-ei shanghah shuohnya?

¹⁸Meshükpa jomphong vanglük shaw kübü hahtang nevaijü hahbhang kei piyei deilangpa?

¹⁹“Kahvangi jomei hühihathü shing hanghi jaoei tuhnyeih” shei nüngi enyüke. Jomi nyinghen shangmü hapa Kahvangi jom kü nyemshuoh.

²⁰Jom lomohpü jomei müki nyem-eehah, hatü Jeiyong Kahvang mongshihpü nyemponghah.

²¹Laophülei yangnyu hantet kemei didaiphei kü üpai laophülei shem am jung deihnya?

²²Lupülongpüthü kü shahphenpai shennyak hanei-i Kahvang kü nyuh-aokhen je?

²³Shennyak hanei-i angeideiyei, nyiushemmei kü hüshemei,

²⁴moh-eileyei hah-eiyingei vang kü vangni maei nyutü didainyeih.

²⁵Haneiyü chemao mei nedangi den kemei shahyaki nyutü didainyeih.

²⁶Shejao jom peü aihük mü kahmongei vütüknyeih, hatü peü laongi hahtüknyeih.

²⁷Nüngi mehe deih, ha ngei nyingnyüke; ngei nyonghühen tempü küpjan yaoteke.

²⁸Longpü shennyakei shem melei nyüpa? nemeipüthülei ashakshem melei nyüpa? shei nüngi enyüke.

²⁹Yen daipü shennyakthü mü nüngi ne-eteiangpü je? Jomi leipü shah-om nüngi nenyingangpü je?

³⁰Nemeipüthü ang vongshüh nyih kü, hatü Kahvang mongshihpü kübü yangdainyüke.

³¹Üpai büpalei dhe kü khangshi büpalei lem eshuohhen, hatü üpai büpai dükpü kü nyokei shuohhen?

³²Mechem büpai mahng vütükhen, büpalei mahng yomei tuhnyüke.

³³Kahji kahdokü büpa shing longi meishi, iehen neaoki khong longi büpa mahng jingei dainyüke.

³⁴Hanangkü mekei etü yahlak neshiüpü shah-i nüngi ngei nyiumeihühenang? Nüngi shuohpü shahnyok kemei angsha hatü shahshem mon khih!