Read Phom Naga JOB 22 Bible Online

JOB 22 - Phom Naga bible

JOB 22

¹Hapheikü Teman am Eliphazi jangei e:

²Shennyak hük Kahvang touei nanglei nyüpü je? Kon kohpü shennyak büpa shing nanglei nyüpü je?

³Nüngü daülangpü shennyak shei ehahpai, Jeiyong Kahvang mongmeihen je? Nüngei lemthü daülangi nyüpeih shei epai büpa shing mehe nanglei nyüpa?

⁴Nüng kü bampü nangkü büpai nüng kü lohnyu khih; hatü nüng khüei büpai shahphennyu khih.

⁵Nüngei mang longpü nevaipü je? Nüngei mang dohshing neshiü.

⁶Shahshemi nüngi nüngei jeihinaüthü leipü lop yahnyüke, hatü nüngi shennyakthü leipü büm-ow nyiukei yahtü bümkong tuhphongnyüke.

⁷Nüng nyiupü am kü yinghen yung neshuoh; hatü aeipü am kü hahhen neshuoh-i shümlangteke.

⁸Wong kohpü ami kahdok angnyüke, hatü dhüm kohpü shennyak halei nyunyüke.

⁹Nüngi vaümnyüthü lakkong deishihteke, hatü hashihhathü kü nemei-i dükteke.

¹⁰Hanangkü nüng shinei aethitai nyüke, hatü ngangahük kü nüng nyemhünyüke,

¹¹nüngi ne-eehen mü vangnyak peinyüke, hatü yungnyü büngi nüng jümlangnyüke.

¹²Kahvangü shaopü vangsholei nenyupü je? Shaopü lithathü kü veituh, jom mekei shaoshi nyupa!

¹³Hanangkü ammi, “Büpai mehe nyingnya? Chülohpü shangmang kü büpai shahphen aokhen je?” shei enyüke.

¹⁴Büpai ne-eehen mü phumthih-i jümlangnyeih, hatü büpai vangsho shingkong kü kamteinyeih.

¹⁵Mangthüi kampü lem kü büpa daikahen je?

¹⁶Hepak mangngoi-i jomphong aetei lüdainyüke; jomei chongnyiam büngi bhongei shanlangnyüke.

¹⁷Jomi Kahvang kü, “Ham mon nyuhen hih, Jeiyong Kahvangi ham kü mehe dükphaaokhen?” shei enyüke.

¹⁸Shejao jom shemmei leihüpeyü Kahvang khih, hanangkü jomei nyuhichong mü ngei hayaoha nyunyeih.

¹⁹Daülangpüthüi ha eenyeih, hatü mongongnyeih; daülangpüthüi hathü kü nyiyei,

²⁰Hingmei jenei vepathü mahdaiteke, hatü jomei mop awi hahtükteke shei enyeih.

²¹Oh Job, Kahvang phang kü shütuh, hatü büpa mü chingmei lingtuh. Hapakei dükjü mon nüng kü moihiman peihen.

²²Büpalei ju kübü shahnying nüngi yahhahtuh, hatü büpalei shah nüngei mongei tuhtuh.

²³Nüng Jeiyong Kahvang touei nyokei leijema nüng meihen; nüngei shem leipü nedaünelangpü daütükjema,

²⁴nüngei hon bhih chi kü yaktükjema, hatü Ophir hon kemei yungnyü mok kü shüktükjema,

²⁵Jeiyong Kahvangpa nüngei honhingin vaihüjema,

²⁶Jeiyong Kahvang touei nüng mongong danghen, hatü büpa touei nüngei dhe ngangei veiaokhen.

²⁷Nüngi büpa kü phopjü büpai jangphahen, hatü nüngi lahtükpü dükaokhen.

²⁸Nüngi mehe dükhen temnya, ha dükaokhen, hatü nüngei lemthü kü vangngai khangphahen.

²⁹Mehenangkü Kahvangi changmeipüthü bhihhah yungyinghünyeih, shejao maanpü leipüthü büpai yangnyüpeih.

³⁰Büpai mang neshiüpüthü yangnyeih, nüngei lak daülangi nyujema nüng yanghen.