Read Phom Naga JOB 23 Bible Online

JOB 23 - Phom Naga bible

JOB 23

¹Hapheikü Jobi jangei e:

²Shinnyih-ao ngei shahyaki eelanyüpeih; ngei tüngei hümjao büpalei lak ngei shangkü vihheki nyüke.

³Büpa metouei heühen ha ngei nyingaoklangmeyü, büpa nyushingei ngei daiaoklangmeyü,

⁴ngei ponghahpü nang büpa kü eshuohhen, hatü shah kü dakteihah shepeih,

⁵Büpai mehe shahnyok yahphahen ha ngei nyinghah shepeih, hatü büpai mehe ehen ha ngei danaokhah shepeih.

⁶Büpalei wong kempai ngei khüei yaonghen je? Nevai, ngei epü büpai banglangphahen.

⁷Daülangpü shennyak hüki laophülei nang büpa tou kü eaokhen; hatü ngei shahphenpü kübü den shing ngei yanglanghen.

⁸Shejao ngei heong philei daijajao, büpa halei nenyu; ngei heshü lemei daijajao, büpa haleiyao neshiü.

⁹Mechem büpa pehe philei dou dükhen, ngei büpa ne-eenyu; mechem büpa apsha philei dou dükhen, haleiyao büpa ne-eenyu.

¹⁰Shejao ngei daipü lemshong peü büpai nyingnyeih; mechem büpai ngei kü dokhen, ngei hon keiha leidaihen.

¹¹Ngei büpalei lameen dhaümei kamnyüpeih, hatü lembien lem kü ngei nekam.

¹²Büpalei shahkungnyüthü kübü ngei neyan; Büpalei shah ngelei mongei jaoei nyüpeih.

¹³Shejao büpa mechemao neyeiyanyih; üpai büpa khüei yaongaokhen? Büpai mehe mong, ha düknyüpeih.

¹⁴Ngei shing mehe küpjan tem, büpai hapa dükhen; hatü hapa keipü küpjanthü dükhen büpai longi temei nyüke.

¹⁵Hanangkü ngei büpa kü nyemnyeih; mechem ngei hathü peü deihhen, ngei büpa kü nyemnyeih.

¹⁶Kahvangi ngelei mongdang maanhütükteke; Jeiyong Kahvangi ngei nyemhüteke.

¹⁷Vangnyaki ngei jümlangjao, ngei vangnyak kü nevai, Kahvang kü nyempeih.