Read Phom Naga JOB 24 Bible Online

JOB 24 - Phom Naga bible

JOB 24

¹Mehekei Jeiyong Kahvangi shahphenhen hepak vangpan ne-itnya? Mehekei büpa nyingpüthü kü büpalei nyihthü ne-eehünya?

²Nemeipü shennyakthüi viong yaong yeiyatüknyüke; jomi mi güh-ei jomei mithü mü vuklangnyüke.

³Jomi hashihhathülei gadu yahlangnyüke; hatü vaümnyülei mohohbaong bheishe kü yahlangnyüke.

⁴Jomi ne-angpüthü kü jiüpü nedüknyu; hatü taopathü kahdok kübü nyaiyei daiyei jodaihen changnyüke.

⁵Hanangkü taopathüyü phaü gaduthü kei jahpanei longteiyei hapeüthü shinghahying yemnyüke.

⁶Jomi mih-ei kah kübü hah vetnyüke, hatü nemeipü amei nyalingngupai kah leipü betjük vaümnyüke.

⁷Jomi vangnyak bümkong ashakviha neshiüi paümnyüke, hatü haong kü ümhen meheyao neshiü.

⁸Kahshang leipü vang kü jom hainyüke, hatü loishing neshiüi yaongnyü kü bakshi paümnyüke.

⁹“Nyühaüm kübü hashihha aetei yahteipü shennyak hanei nyüke; taopalei naü bheishe hang kü yahlangnyüke.

¹⁰Jom büm-ow neshiüi bümkong angnyüke; hah kotü nük aeiyei nyunyüke.

¹¹Jomi kahthü kübü olive mainga, hatü yiü linghen nyalingngupai ngümnyüke, shejao jom yung leyei nyunyüke.

¹²Chingnyü kü mahhen nyupüthüi vaünyüke, hatü ma yahtü nyupüthüi sheühpü naei lennyüke, shejao Kahvangi jomi phoppü kü nejangnyu.

¹³Vangngai khüei yaongpü hanei nyüke; hapalei lem nenyingpü hatü ha kü nekampü hanei nyüke.

¹⁴Omdhümbaong kü shennyak jüpü ami taopathü jühen dainyüke, hatü nyak kü büpai gühnyüke.”

¹⁵Mükbongjuyungpüthüiyao om hepak dannyüke. “Üpaiyao ngei ne-eepih” shei deihnyüke, hatü büpalei dhe joshi nyunyüke.

¹⁶Nyak kü jomi shem vaüpei shünyüke; nyihnüngü shem küptü themnyüke. Jomi vangngai kü meheyao nedükhünyu.

¹⁷Mehenangkü nyakha shangmang jom peü shing nepnüng kei; mehenangkü jomü shangmangei küphüthü khih.

¹⁸Jomü yungnyü büngi bhongei lomi shanlangnyüke; kahdok kü jomei heanü thaüvaü nyüke; jomei kahlei üpayao neshanyu.

¹⁹Vanghe nyah-ei shaampai shüdao nyaüpükei, mang shennyakthü mahngchongi aetei lüdainyeih.

²⁰Hümlungnyüi dangkao jom betüknyeih; laongi jom hahtüknyeih. Üpaiyao jom deih-ei nedangnyih; nemeipüthüyü pü keiha bhagdainyeih.

²¹Jomi nyülanthü kü nemei-i düknyeih, hatü vaümnyüthü kü phahji nehunyu.

²²Shejao Kahvangi büpalei ngani wong kohpüthü-ao mahtüknyeih. Jom wong kohshi nyulangmao didainyeih.

²³Büpai jom nyiumei kü yangei tuhhen aok, shejao büpai jom kü hingmei veishi nyunyeih.

²⁴Kansho hük shing jom longei anshihnyeih, hapheikü jom nyadainyeih; hatü thüng keiha vandainyeih; hahmoung daklangpü keiha jom daktüknyeih.

²⁵Hapayü hapakei nevaijema, üpai ngeiyü shahshem shei denpü shuoh-aokhen? hatü ngelei shah angkong leitükhen?