Read Phom Naga JOB 28 Bible Online

JOB 28 - Phom Naga bible

JOB 28

¹Hingmei, ngin yahpü shing nyüpeih; hatü hon daüshing hük nyüpeih.

²Nyiamü kahdok leipü yahnyüpeih, hatü chünyiamü laktetnyiam yaong kübü hienei yahnyüpeih.

³Shangmangi vangngai leihütü hangku-i chülohpü shangmang kahmong shoei shünyüke; hatü manghtangpü yaonglaap vaüpei yemnyüke.

⁴Hangku nyushing kübü taishi yanei, hangkuli la neshouppü shingei kahsha vaüpei shüei halei monha vü kü sheüshi dou düknyüke.

⁵Kahdoknyü leiyü hahying haleipü vamnyeih, shejao kahmong leiyü awsham kei nyüke.

⁶Sapphir-ü yaong leipü vamnyüpeih, hatü hapa kü hon kohshi nyüpeih.

⁷Mepa oulemiyao hapa kahmong lem nenyingnyih, hatü alang mükiyao hapa ne-eeangpih.

⁸Mangpü yemhathüiyao hapa kü la-i neshoup, hatü mepa mailangiyao halei peih-ei nedai.

⁹Hangkulei laki yaonglangao bhaoktüknyeih, hatü kahshangthüyao shoeilamei yeemtüknyeih.

¹⁰Jomi yaonglaap vaüpei shünyeih, hatü douvang yaongthü jomei müki eenyeih.

¹¹Jomi yungchingao jümlangnyeih, hatü ilangmong leipü joshi nyudaipü douthü kahshakei ngainyüpeih.

¹²Shejao kihikon melemei danghenang? Danaokpü melei nyunya?

¹³Hangkui hapalei dailem neyaoaoknyu; hapayü jennyu jenchong kahdokei nedangnyu.

¹⁴Ilangmongi “Ha ngei mü neshiüpih”, hatü yungchingi, “Ha ngei mü nenyupih” shei enyüke.

¹⁵Hapayü honiyao neshakaok; hapalei bhei vaishi ngin dokeiyao neshuoh-aokpih.

¹⁶Hapalei bhei Ophir hon, onyx nevaijü Sapphir douvang yaong mao neshet-aok.

¹⁷Hapayü hon nevaijü chüshaüiyao neshetnephenaok, nevaijü daülangpü hon mao nejeiteiaokpih.

¹⁸Koral nevaijü Jasper nangü eteihenao napü neshiü; kihikonei bheiyü yüknyü mao nyeipüba.

¹⁹Ethiopia amei topaz douvang yaongiyao hapa mü neshetteiaok, nevaijü daülangpü honiyao hapa neshakaokpih.

²⁰Shejema kihikon meleipü peinya? hatü danaokpü vamshing melei nyüpa?

²¹Kahdoknyü kübü mepa yemhimakei mükiyao ha ne-eeaok; hatü hapayü piteipü shangouthülei mük kübüao jolangteke.

²²Benpülangpü hatü Dipaiyao ha jungü shahjang mon danpeih shei enyüke.

²³Kahvangi mon hapalei lem nying, hatü hapa melei nyu büpai mon nyingnyeih.

²⁴Mehenangkü büpai kahdok dohpü junghijang peü kü veinyüke, hatü lemphüli vangsho phangkü eenyüke.

²⁵Mechem büpai vanglük kü wong shuohpa, hatü yungchingthü dok kü dokpa;

²⁶mechem büpai vang shingvaishi shahkung lingpa, hatü vangmuk vangteng kü lem lingpa;

²⁷büpai hahepak kü kihikon eeteke, büpai hapa yowei tuh, büpai hapalei bhei dokei vei, hatü yemei dang.

²⁸Hatü hangku kü büpai, “SHEMBÜPA nyempeyü kihikon, hatü ten kübü yangpeyü danaokpü” shei eteke.