Read Phom Naga JOB 30 Bible Online

JOB 30 - Phom Naga bible

JOB 30

¹Shejao shaangü ngelei naüeethüi ngei kü naamnyüke; jomei chepapa amü mi yompü shithü kei tuhhampeih.

²Jomei lak kü wong nyujao sheyü jomei wong komdaipheikü ha ngei shingvaishi mehe nadang nyüpa?

³Taopü aeipülepai vandaikemtü, kahdokvan hatü pütüngvunglang tukei hah-ei nyuhamteke.

⁴Jomphongü phenlakvungpha shükei, alla hangha tünglang shüei hahhampeih.

⁵Jomphongü hangku noknyü kübü changtük; nanglakthüi jom kü gühpa kü kei lenhampeih.

⁶Jomü yaongvak yaongsha hatü kahshalei nyuhampeih.

⁷Yingmongei jomü phaüyemthü kei vaü, hatü püdhüm phangkü dukshi paümhampeih.

⁸Jomphongü ngapa, chingshonghathü; jomphongü kahmük kübü changtük,

⁹hatü shaang jomei hapeüthüi kesho mü venei ngei kü nyinyüke; ngeiyü jomphongei shahsho kü shihteipü shennyak leidaiteke.

¹⁰Jomi ngei kü jiühitnyüke, hatü khaatdainyüke; jomi nejü-üi ngelei dhe kü yu-op shaonyeih.

¹¹Mehenangkü Kahvangi ngelei pülah vü shetük, hatü ngei shangponghüteke; jom mongshih-ei ngei khüei yaongteke.

¹²Ngelei lakdah philei jomi ngei khüei yaongnyeih; jomi ngelei lalem kü aethitai haennyüke, hatü ngei vüshihhen banghsha shonyeih.

¹³Jomi ngelei lem mangtüknyeih, jomi ngelei shanghah nyeinya longhünyüke, üpaiyao jom kü nekhüamnyu.

¹⁴Jomi bham lowei ngei shangkü ngümei shünyüke.

¹⁵Nyempühanpü ngei touei peiteke; jomi ngelei dhüm vanglüki keiha piyei deilangteke, hatü ngelei mophimo phum keiha peih-ei lüdaiteke.

¹⁶Shaang ngelei yangnyu-ü yung kei leidaiteke; shangpong yakyingpü nyihthüi ngei shümlangteke.

¹⁷Nyak kü ngelei vang kemei kü tüngnyüke, ngei kü ketei dhawei tüngpü nedohnyu.

¹⁸Kahvangi ngelei bhagthuhdhaong kü düktü veihen nemei-i yüptüknyüke.

¹⁹Büpai ngei nyühut chongei hungtü shüktük, hatü ngei kübhih hatü depla leitük.

²⁰Ngei nüng kü nyüknyüpeih, Oh Kahvang, shejao nüngi ngei kü nejangphünyu; ngei yaongküjao nüngi vei mon veinyüke.

²¹Nüngi ngei kü nephahji-i düknyüke; nüngei lak wong kempai nüngi ngei kü shüvei.

²²Nüngi ngei vanglük kü noei domtüknyeih, hatü ngei piyei deitüknyüke, hatü nüngi ngei yinglükpalei kü yüteihünyeih.

²³Nüngi ngei ditükhühen, hatü hangkuli peü shing temtükpü shingei ngei mülanghen shei ngei nyingnyüke.

²⁴Mekei neyahpü shennyaki shanghah kü sheühshih shei mih kü yüjü üpaiyao lak nelainyu.

²⁵Shanghahpüthü shingvaishi ngei mechemao nethepangpü je? Taopathü shingvaishi ngelei laangha mongneshangangpü je?

²⁶Shejao mechem ngei meipü naei veihenshang ten peikünyüke! mechem ngei vangngai danhenshang, vangnyak peikünyüke.

²⁷Ngelei mongkü mongshangpü, hatü tüngpü mechemao nedohnyu; shanghah nyihthüang ngei heünyüke.

²⁸Ngei vanghela neshiüpü mongshang kü longteinyeih; ngei khong thaishingei yaongtü sheühpü yünyüpeih.

²⁹Ngeiyü mahuthülei jeihinaü, hatü ostrikh oulei küphü.

³⁰Ngelei hangshuw nyakei bhaonyüke, hatü tüngpai ngelei vang shaamnyüke.

³¹Ngelei kongkoih-i mahng kesho loknyüke, hatü ngelei lipingü mahng theppü ngeü kei vamnyüke.