Read Phom Naga JOB 31 Bible Online

JOB 31 - Phom Naga bible

JOB 31

¹Nela hük kü ten deihshi vaüei neveihen ngei ngelei mük mü vangteitüktih.

²Shangeipü Kahvang leipü ngelei hean, hatü Jeiyong Kahvang leipü mükjüp mehe nyukahen?

³Nedaünelangpü am kü shanghah, hatü mang dükpü am kü vongshüh nepeinyu je?

⁴Büpai ngelei lemthü kü neveinyu je? hatü ngelei lakham peü ne-ienyu je?

⁵Ngei shahshem kü kamei nyujema, hatü lawlüphen ngelei la mokei nyujema,

⁶Kahvangi ngei jiüpü dok kü nyemdokpha, shejüang büpai ngeiyü shahhing kü nyüke shei nyinghen.

⁷Ngelei lakham ngelei lem kübü chaiyei kamei nyujema, hatü ngelei mük kü meipü lem kü ngelei mong kamei nyujema, hatü ngelei lak kü lemhük dangkao kawhikang nyujema;

⁸ngei nyiueinangei sheipü mih-i nyemvethah, hatü ngelei sheili bhiyei nyemyeemtük.

⁹Ngei lebü nyüha yahhüei, nevaijü ngelei chingyowpalei shemshelei büpalei shembünyü mü mükbongjuyunghen danei nyujema,

¹⁰ngelei nyühai lebü baha kü nyemnemno, hatü lebü bahai pinnyü mü shiyei nyemnyu.

¹¹Mehenangkü hapa keipü mangü dihen shangpü mang, hatü ha kü hanghihühen vongbong.

¹²Mehenangkü hayü dipü awi shamtükhen, hatü ngei angpü kemei hahtükhen mon nyüke.

¹³Ngei ngelei nyüha hatü baha aathüi ngei kü jomei tok eshingkü ngei jiüpü nedükshuoh-i nyujema,

¹⁴Kahvang ngei mü pongshingkü, ngei mehe lahshuohhen? Büpai hapa yemjü ngei mehe jangshuohhen?

¹⁵Büpai ngei nyüei vom mongei lingpü keiha, jomphongao nelingangpü je? Hapa aihük Kahvangi nyüei vom mongei jen nelingangpü je?

¹⁶Ngei taopathüi napü lemhük dangkao shümlangei nyujema, nevaijü vaümnyüthü mükyang yunghüei nyujema,

¹⁷hatü ngei angpü hashihhathü kü nehan-i hah-ei nyujema,

¹⁸shejao ngei nethe hepak mebü pa hük leshi hashihhathü haümpeih, hatü onyülei vom mongei-üngvaümnyüthü müpeih,

¹⁹ngei shennyak hanei-i ashakviha neshiüpü eetüktü, nevaijü taopü am büm-ow neshiüi eetüktü,

²⁰büpai ngei kü moihiman neyahphüjao, ngei ngelei mimumi büpa wohong nemeihüi nyujema;

²¹shahphen shingei ngei khüambakhen nyüpeih shei ngei hashihha kü lak shih-ei nyujema;

²²ngelei bhagchong leipü bhagvang bhagei vüdaituh, hatü ngelei lak vangbaong mü vaümei vüdaituh.

²³Mehenangkü ngei Kahvang leipü vongshüh peikahen kü nyemnyeih, hatü büpalei nganhilong kü nyempai ngei henüng dou nedüknyih.

²⁴Ngei hon kü monglemei daülangpü hon kü, “Nüngü ngelei monglem” shei eyei nyujema;

²⁵ngei mop longi angpü nangkü hatü ngelei laki longi latei leiaokpü nangkü mongongei;

²⁶ngei vanghela khangshingkü, nevaijü lenha meipü kü veitü,

²⁷ngelei mongdangei joshi yawh-eiyangei, hatü ngelei lak kü dhüm shuoh-ei jüpjema,

²⁸hathüao shahphenbüthüi hanghi shuohhen shangpümang khih; mehenangkü shangeipü Kahvang kü ngei hingnelem.

²⁹Ngei kü jiühitpüthü lomohpü eetü ngei mongongei nyujema, nevaijü shanghah pongpü eetü ngei phaukteiyei mongongjema;

³⁰büpalei yangnyu khüei thaüvaüpai ngei ngelei jui mang nethah-angpih.

³¹Ngelei shem am shennyak hanei-i, “Jobei phai hahtü hüneshempü üpa nyüpa?” shei eyei nyujema;

³²yenpa oupathü mechemao chingyangshongei nepaüm; mehenangkü ngelei shem düngei yenhiou shingvaishi apshi nyuhampeih.

³³Shennyakthüi kei ngei ngelei mang joshi netuh; ngei pungtükpü ngelei mongei küpshi netuh,

³⁴mehenangkü ngei khong kü nyemei deih, hatü mükhiphangi jiühitphahen kü hanei deih, hanangkü ngei chingyangshongei nedai-i nenmü nyupeih.

³⁵“Oh hanei-i dangkao ngei epü banglang meyo! Hamü ngelei mienshahng tuhnyeih, Jeiyong Kahvangi ngei kü jangshih!” Oh, ngei khüei ngelei vepathüi nyangpü lai deikülangmeyo!

³⁶Hingmei ngei hapayü ngelei bhagchongei paihen, hatü hon athen keiha ngei ha thenhah shepeih.

³⁷Ngei büpa kü ngelei lakham kemei eshuohhen vaipeih; ongpa hük keiha ngei büpa kü eshuohhen vaipeih.

³⁸Ngelei kahdoki ngei khüei lenjema, hatü han hoktükpü kahdoki chemi thepjema,

³⁹hatü halei vampü kü ngei lat neshuoh-i hah-ei nyujema, nevaijü kah lingpü am aeihüei nyujema,

⁴⁰hah nangjei hüh, hatü barley nangjei thüng vamhütuh. Jobei shahthü dohnyeih.