Read Phom Naga JOB 32 Bible Online

JOB 32 - Phom Naga bible

JOB 32

¹Hanangkü hathü shennyak jemi Job kü shahlei neaok; mehenangkü büpai laophü nyingi daülangpü shei deih.

²Shejao Buz am Barakhelei cheha Elihu, Ram am phangi Job kü longi mongshih; mehenangkü Jobi Kahvang leimeyü büpa-ang daülangpü shei dah shakei e,

³hatü büpai Jobei küphü jom jemphen kü longi mongshih; mehenangkü jomphongi Job nejiüang shei vüshihhen lem nedangaok shejao hapai Kahvangang nejiüpükei shahlem kü shadai.

⁴Mehenangkü Elihuyü peü mü naü-eepa vaipü nangkü behethüi mangekem thahshi Job mü eteihen danei nyu.

⁵Mechem hathü shennyak jom jemi Job kü shah leihen neshiüi eepa, büpa mongshihteke.

⁶Hanangkü Buz am Barakhelei cheha Elihui ehen chongpang: “Ngeiyü vangbongi hashih, amphongü behe; hanangkü ngei deihpü am kü ekahen nyemei nyudaipeih.

⁷‘Behe-i nyem-ekei; vangbongi behe-i kihikon nyemnyuhkei’ shei ngei deihpeih.

⁸Shejao hapayü shennyak hükei laanghai hatü Jeiyong Kahvangi danaokpeyü shuohnyu khih.

⁹Behe-i mon kon kohpü nevai, nevaijü den lupü ami mon jiüpü danaoknyu nevai.

¹⁰Hanangkü ngeiyao ekününg banghümao; ngei nyingpao amphong kü ephüshah.

¹¹Ngei amphongi epü kü, hatü amphongi kihikon shahthü yemshingkü ngei nenmü bangei nyupeih.

¹²Ngei ammi epü kü kenhingshi bangei nyupeih, shejao amphong üpaiyao Jobi pungpü neyepaok, amphong üpaiyao büpalei shah kü shahlei neaok.

¹³‘Hami kihikon dangtih’ shei amphongi te-ehah; hangkuli nevai, Kahvangi mon Job nyemvüshih.

¹⁴Jobi büpalei shah-ü ngei kü epü nevai, hatü amphongei shah keiha ngei büpa kü shah neleipih.”

¹⁵“Jomphong sheyü ehen shah mah-ei nyüke; ehen shah phahükao neshiü.

¹⁶Sheyü jomphong shah dohdaipheikü, shahnyok shuohhen neshiüi yaongdai pheikü, ngei hei-üng danei nyuhen je?

¹⁷Ngeiyao ngelei shahnyok shuohshah; ngeiyao ngei deihpü eküshah.

¹⁸Mehenangkü ngeiyao ekahen longi nyüpeih; ngelei mongei nyupü laanghai ha ehen kangnyüke.

¹⁹Ngelei mongü yiüi maei yiüshong bhaohen mü nyupükei nyüke.

²⁰Ngei mong hüshemhen shingvaishi ngei eküshah; ngelei ju kaei shahnyok shuohshah.

²¹Ngei üpa kao baong hanei ne-epih, nevaijü üpa kao yawh-eiyangei ne-epih.

²²Mehenangkü mekei yawhshah ehen ngei nenyingnyih, hapakei dükjema ngei Lingbüi ngei lomi yahlanghen”.