Read Phom Naga JOB 33 Bible Online

JOB 33 - Phom Naga bible

JOB 33

¹Shejao shaang, Oh Job, ngelei shahthü banghümao; ngei epü lemphüli kü mong shuoh-ei banghümao.

²Ngelei ju kaei ekününg; ngelei shahthü ngelei yeijaang kübü vamkününg.

³Ngelei shahthüi ngelei mongdang kangshangpü hunyeih, hatü ngei mehe nying, ha ngelei jui jiüshangi enyeih.

⁴Kahvang laanghai ngei ling, hatü Jeiyong Kahvangei ngüi ngei kü yangnyu shuohnyeih.

⁵Nüngi aokjema ngei kü jangshih; nüngi meishi temtü ngei kü ekühümao.

⁶Veituh, Kahvang toueiyü ngei nüng kei-üng nyüpeih; ngeiyao ashemi lingpeih.

⁷Ngei kü nyemei nüng tehan; ngelei lak nüng kü ahshi vihshi nechongküpih.

⁸Ngelei dhaongi danshi nüngi ha shah eteke.

⁹“Ngei mang neshiü, daülangi nyüpeih, ngei pungpü neshiüi jiüshi nyüpeih.

¹⁰Shejao Kahvangi ngei kü mang yemnyeih; büpai ngei kü vepa kü kei düknyeih.

¹¹Büpai ngelei la kü nyiamvüi shanyüke; büpai ngei dailem peü kü mük shahshi veinyüke” shei eteke.

¹²Shejao hapa kü nüng nejiü; ngei nüng kü ephüshah: Kahvangü hangku mü longpüba.

¹³Mehekei nüngi büpa mü dokteiyei, “Büpai ngelei shah hükao nelah shei enya?

¹⁴Mehenangkü Kahvangi lem hük kü nevaijü lem hük kü enyüpeih, shejao shennyaki ha nenyingaoknyih.

¹⁵Mangh hük kü, yanüng manghkhang hük kü, mechem shennyak laophülei shinshingei mükhet meiyei shihenshang,

¹⁶büpai shennyak dhaong aptü lihen shah-i nyem shaonyeih;

¹⁷büpai hayü hangkuthüi laophülei mang lem kübü hatü changmeipü kübü yanhen;

¹⁸laophülei laangha kahsha kübü, hatü yani mahhen kübü yanghen nangkü enyeih.

¹⁹Nevaijü shennyak hanei keyü tüngpü lüngshingei, nedoh-i vang kü ketei tüngpai yeanpü shuohnyeih.

²⁰Ju kü nük nemei-i nükju lepei nyupaiyao Kahvangi yeanpü shuohnyeih.

²¹Büpalei phai sheyei laaidainyeih, hatü büpalei vang chem ne-ee-i nyupü shakei vamnyeih.

²²Büpalei laangha kahsha yopailei heihdainyeih, hatü büpalei yangnyu jüpü am touei dainyüpeih.

²³Mehe jiü, ha shennyak kü ehen shingvaishi, büpa mü vangsho phongshan hük, Kahvang hatü büpa aa kü lembü hük kei nyujema,

²⁴hatü büpai hapa shennyak shinshangei, ‘Kahshalei shüdaihen kübü yangtuh, ngei büpa shing shojeinanglei hük dangtepih’ shei ejema,

²⁵sheyü büpalei phai hashihlei hangphai keiha, hatü büpa nethe hepak kei nyokei leinyüke.

²⁶Sheyü büpai Kahvang kü phopnyeih, hatü büpai phahji dangnyeih; büpai Kahvangei dhe eenyeih, hatü mongongpai lennyüke. Kahvangi büpa kü daülangpü nyokei shuohnyeih.”

²⁷Hapheikü büpa shennyak touei peiyei enyeih, “Ngei mang thahteke, hatü kangshangpü ngei kaoktükteke. Shejao ngelei mang shangshi hanghi neyahphaangpih.

²⁸Ngei kahshalei shüdaihen kübü büpai ngei yangpeih, hatü ngelei yangnyui vangngai eehen.”

²⁹“Kahvangi hathü dou kemei nyipa, jempa thahshi hangku kü düknyüke.

³⁰Hapayü büpai hangkulei laangha kahsha kübü yangei leihen, hatü jomphongi yangnyu vangngai eehühen shingvaishi düknyeih.

³¹Kenhingtuh, Job, ngei epü banghümao nenmü uotuh, ngei ephanüng.

³²Nüngi lemhük dangkao ehen nyujema ngei kü jangshih; mehenangkü nüngi pungpü neshiü shei ngei nüng dah shakhühen.

³³Hei nevaijema, ngei epü banghümao; nenmü uotuh, hatü ngei nüng kü kihikon nyuhphüshah.”