Read Phom Naga JOB 34 Bible Online

JOB 34 - Phom Naga bible

JOB 34

¹Hapheikü Elihui e:

²“Ngelei shah banghümao, am nahpü hatü nyingpühingpüthü, ngei epü banghümao.

³Jepei veijü yei-i hahying meipü nemeipü nyingpü keiha, dhaongi epü shahthü kü doknyüpeih.

⁴Jen shingvaishi mehe jiüpü nyüpa, ha jeni yaoshah; mehe meipü nyüpa, ha jeni chemi nyingshah.

⁵‘Ngei mang neshiüpih, shejao Kahvangi ngei kü jiüpü nedükpeih’ shei Jobienyüke.

⁶Ngei jiüshi nyujao ngei shahshem leiteke; ngei nepungjao büpalei lahhani nemeiaokhen mü ngei ma yahhüteke.

⁷Yung keiha eelanyongnya shah yingpü shennyak üpa Job kei nyüpa?

⁸Büpai mang dükpü shennyakthü mü jemteinyüke.

⁹‘Kahvang mongmeihününg shennyaki kheteipü kü nanglei neshiüpih’ shei büpai enyüke.

¹⁰Hanangkü amphong sholi kohpüthü, Kahvangi nemeipü düknyeih, Jeiyong Kahvangi nejiüpü dou düknyeih shei mechemao tedeih.

¹¹Shennyaki mehe dük, ha kü büpai nyokei shuohnyeih, hatü laophülei doui shangpü kei büpai shuohnyeih.

¹²Hingmei, Kahvangi nemeipü nedüknyih, hatü Jeiyong Kahvangi shahhing nyongnyongi neleitüknyih.

¹³Kahdoknyü kü veihen üpai büpa kü shuohpa? nevaijü kahdoknyü kempülei hanggo üpai büpa kü nyanphongpa?

¹⁴Büpai büpalei laangha laophü touei leilangjema, hatü büpalei ngü laophü touei mülangjema,

¹⁵hangkuli peü chem kü mahdaihen, hatü jom peü nyokei kahdok leidaihen.

¹⁶Nüng kü danaokbenüng nyujema hapa bangtuh; ngei mehe enya, ha bangtuh.

¹⁷Shahhing kü jiühitpü shennyaki vanglem lemaokhen je? Nüngi shahhing epü hatü wong kohpü vüshih-aokhen je?

¹⁸Ong hük kü, ‘Nüngü yahlak neshiüpü!’ hatü long hük kü, ‘Nüngü shennyak ten!’ shei epü;

¹⁹Longhiong baong hanei nenopü, shemmei-i taopa aa kü hayaoha nedeihpü, shejao jom peü kemei büpalei laki lingpeyü büpanevaipü je?

²⁰Ngangahük kü nyak jiam kü jom didainyeih; büpai hongjü shennyakthüao mahdaikemnyeih, hatü wong kohpüthüao hangkulei laki nevaipü küyahlangnyüke.

²¹Mehenangkü shennyak dailem kü büpalei mük chishi nyüke, hatü büpai jomei lakham peü eenyeih.

²²Mang dükpüthü jehen mü shangmang nevaijü shangmang vangnyak meleiyao neshiü.

²³Shennyakthüi büpa touei peiyei shahphenhen shingvaishi Kahvangi hepak ithen napü neshiü.

²⁴Büpai wong kohpü mübüthü nüngtüktü lebü jeiyei tuhhen shingvaishi phehenyohen napü neshiü.

²⁵Mehenangkü jomphongi mehe dük ha büpai nyingei nyupü nangkü büpai jom nyak kü shüei yaktüknyeih, hatü ngümtüknyeih.

²⁶Mih peüi veishi jomi mang dükpü nangkü büpai jom kü üpnyüke;

²⁷mehenangkü jomi büpa phei nemü-i lepdai, hatü büpalei lem mepa kao ieyeilemei neyah,

²⁸shejao jom homei taopathü theppüyoungpü büpalei dhaongi danhü, hatü nehahneyingpüthüi lenpü büpai danhü.

²⁹Büpa nenmü nyudaijoong üpai büpa nyonghüaokhen? Büpalei dhe jodaijoong üpai büpa eeaokhen? Jat hük vaijao, lomja vaijao aihük mon.

³⁰Hanangkü Kahvang nenyingpüthü, nevaijü mih kü tai haenpüthüi vanglem nelemhünyih.

³¹Job, nüngi Kahvang kü, ‘Ngei pungteke, shejao ne-yei hajük kü huluh neshuohpih;

³²Ngei mehe ne-eeaok ha nüngi ngei kü nyuhshih; ngei pungei paoh nyujao ngei ne-yei nepungpih shei mang lahla?

³³Büpai mehe dük, ha nüngi yaktükpheikü, nüngi napükei büpai nüng kü yahphahen deihnyu je? Ngei nevai, nüngi jehahtuh, hatü nüngi mehe nying, ha ngei kü eshih.’

³⁴Üam kü sholi koh, hatü üami ngei epü kü bangnya, jomi ngei kü,

³⁵‘Jobi meheyao nenyingi enyüke; hatü büpalei shah kü yahbenüng neshiü’ shei ekahen.

³⁶Jobi mehe enya, ha kü büpa nyingi dokei veilangmeyü meihen; mehenangkü büpai nemeipü am kei shah leinyüke.

³⁷Büpai laophülei mang dok kü shao khüei ehahnyüke; jen touei büpai lak apei ne-ienelem shah enyüke, hatü Kahvang khüei epai nyeinya mang ühahnyüke.”