Read Phom Naga JOB 38 Bible Online

JOB 38 - Phom Naga bible

JOB 38

¹Hapheikü SHEMBÜPAi yinglükpalei kübü vamei Job kü eteke:

²Meheyao nyingpü neshiüpü kü ngei venpü shahthü lüktükhen üpaang?

³Shennyak keiha nüngi shünglok loktuh; ngei nüng kü phehen hatü nüngi ngei kü jangshih.

⁴“Ngei kahdoknyü chongnyiam yaong haüshingkü nüng melei nyuhampa? Nüngi ha nyingei nyujema ngei kü eshih.

⁵Hapa bahiyang hajük yahhen shei üpai tempa, nüngi nyingnyüla? Nevaijü üpai hapa shetpü vü kangpa?

⁶Mepa shangkü shemtü hapa lingpa? nevaijü üpai hapalei shongkaong yaong haüei pangpa?

⁷Mechem nepnüng lithathü thaiyei kesho lokpa, hatü vangsho phongshanthü mongongpai lenshingkü;

⁸nevaijü yungchingthü vom mong leipü bhaoei vamshingkü üpai sha küptü tuhpa?

⁹Mechem ngei phum kü büpalei ashak lingpa, hatü vangnyaki jümtü tuhpa,

¹⁰hatü ngei ha kü viong lingei, hatü hapa kü shadenthü hatü lüngi chanei tuhtü,

¹¹‘Hajük thahshi mon nüng heihhen, ha mü lenei neheihkahen, hajük thahshi mon nüngei changmeipü yungmok heihhen’ shei eshingkü nüng melei nyuhampa?”

¹²“Nüngi chemao dhom kü ngeükhüam shuohla, nevaijü vangngai pibom kü hapalei shing hushuohla?

¹³Nüngi chemao dhom kü kahdoknyü shümlangtuh hatü haleipü nemeipüthü dheüei yaktüktuh shei ngeükhüam shuohla?

¹⁴Nyihnüng vangngai-i kahshang, hatü kahji lekei eehüpü keiha, ashem kü füoshang shingjü nyashi vamnyeih.

¹⁵Nemeipüthü leipü vangngai shümei tuhlangnyeih, hatü changmeipü lak bhagtüknyeih.

¹⁶Nüng yungching bhaoshingei shüphei je? nevaijü yungching aangshung shangkü kamphei je?

¹⁷Dipülei penyüshathü nüng kü huphüphei je? nevaijü nüngi dipü vangdhümei penyüsha eephei je?

¹⁸Nüngi kahdoknyü bahiyang kemei yao-aokphei je? Nüngi nyingei nyujema hathü peü eshih.

¹⁹Vangngai nyushingei daipü lem mepaang? hatü vangnyak nyushing melei nyüpa?

²⁰Nüngi hathü jom nyushingei müei leiaoküla? Jom nyushingei leihen lemthü nüngi nyingei nyüla?

²¹Hingmei nüngi nyingnyüke, nüng hahepak keyü angei nyuhampeih! Nüng den longi lushi nyuteke.

²²Nüngi shü tuhpü shingei shüla? nevaijü shüyaong jaopü shem eela?

²³Hapayü ngei shanghah hepak, hatü hokpüheipü nyihthü shingvaishi jaoei tuhpeih.

²⁴Nüngi vanghe dung eela? nevaijü heong shingei vanglük vamshing eela?

²⁵Vang keihen shingvaishi lem üpai shonya? hatü vangmuk vangtengei lem üpai haamnya?

²⁶Üpayao nenyupü kahdok kü, hatü hangku nechingpü bhih kahdok kü;

²⁷lavüngtoiyei nyupü kahdok mongonghühen, hatü hapa kü thüng kohhühen shingvaishi üpai vang keihünya?

²⁸Vangei chepa nyüpü hiang? nevaijü vangsho nyienü üpai büh-eipaümpa?

²⁹Shü üpalei vom mongeipü vampa? hatü phumshangei vüngmaki nyien thenpü üpai bühnya?

³⁰Mechem yung yaong kei haüshaü-i leinya? mechem yungching shak thenei leidainya?

³¹Nüngi lithathü kü nyiamvüi sha-aoküla? nevaijü litbaong leipü vü lai-aoküla?

³²Nüngi hepak vangpan jiüshi litbaongthü thaihüaoküla? hatü sheptao nyühiha chemi müaoküla?

³³Nüngi vangshothülei shahkungnyüthü nyingnyüla? hatü hathü shahkung nüngi kahdoknyülei noaokhen je?

³⁴Nüng kü yungnyü büngi jümhahhen shingvaishi nüngi phumthü kü ngeüwong anei ngeükhüam shuoh-aoküla?

³⁵Nüngi klangthü nyephühen aoküla? hatü hathüi nüng kü, ‘Ham hamü temei nyüpeih’ shei ephahen hiang?

³⁶Mongdang kü kihikon hatü sholi kü danaokpü üpai shihpa?

³⁷Phum ieaokhen mü üpa kü kon nyüpa? Üpai vangsho leipü yungdük yenei kemtükaokhen?

³⁸Mechem bhihla haüshaü-i daodainya? hatü kahdok chemi daoei haüdainya?

³⁹Jomphong jepei nyushingkü, hatü yaongshalei lemshi nyushingkü,

⁴⁰nüngi mailangthü kü het yemei shuoh-aoküla? Nevaijü hapalei chehathü aeipü shümoh meihüaoküla?

⁴¹Asha chehathüi Kahvang kü lenshingkü, hatü het nedangi longteishingkü üpai het shuohnya?”