Read Phom Naga JOB 39 Bible Online

JOB 39 - Phom Naga bible

JOB 39

¹Meiyah-i mechem cheha shaannya, nüngi nyingnyu hiang? Nevaijü shaoki cheha shaanpü nüngi eela?

²Hathü-i len meshük cheha konya nüngi ienyu hiang? Hatü jom mechem cheha shaannya, nüngi ha hepak nyingnyu hiang?

³Jom mechem lemei shatü cheha shaannya?

⁴Chehathü wong koh-ei leinyüke, hatü phaümongei longnyüke. Hathü lüdainyüke hatü nyokei neleijanyu.

⁵Phaü gadu kü üpai veshuohpa? nevaijü üpai vü laiyei deishuohpa?

⁶Büpalei shemü yingnyü yingmong, hatü büpa nyushingü hüm kahdok shuohpeih.

⁷Hapayü chingei vaüpü eepü kübü taishi yanei nyunyeih, hatü üpaiyao hathü yepei nehaümaoknyih, hatü dou nedükhüaoknyih.

⁸Hathü kahshangthülei het yemnyeih, jomi phenthüng mon hahhen yemnyeih.

⁹Nyaya-i nüng chongphoaokhen je? Büpai nüngei khaokei yanüng paümhünyu je?

¹⁰Nüngi büpa kü vü hüki shentü kah haokhüaokhen je? Kah haokei mükahen je?

¹¹Büpa wong kohpü nangkü nüngi hapa kü mongnyanghen je? nevaijü nüngei dousho büpa kü tuhphongaokhen je?

¹²Büpai hah tenshingei manang paiyei leikahen shei nüngi hinglemaokhen je?

¹³Ostrikh ou-i hapalei yang dheünyüpeih, shejao yungou kei piyei neaoknyih.

¹⁴Mehenangkü pinnyüi ati tiyei kahdokei tuhphongnyeih, hatü bhih-i hapa shaamhühen tuhphongnyeih.

¹⁵Hapa kü la-i shouptükhen shei nedeih-i; yemhimaki bhaotükhen shei nele-i tuhphongnyeih.

¹⁶Pinnyüi cheha kü laophülei hapeü nevaipükei, nevaijü laophülei dou angsha leidaihen shei nedeih-i nejungnelangi tuhnyeih.

¹⁷Mehenangkü Kahvangi pinnyü kü kihikon neshuoh; nevaijü danaokpü kon neshuoh.

¹⁸Shejao mechem pinnyüi moknüng yang paanhenshang, pinnyüi koyei hatü halei uopü shennyak kao nyinyüpeih.

¹⁹Koyei kü pinnyülei wong nüngi shuohpü hiang? nevaijü pinnyülei üng kü mum nüngi shihpü hiang?

²⁰Pinnyü shoukhanbaong kei nüngi phaukhünyu hiang? hatü jom ngü heepai shennyak nyemhünyu hiang?

²¹Pinnyüi monglongshi wong kempai phaukteinyeih, hatü thepjulei dainyüpeih.

²²Pinnyü kü nyempü lanshei neshiü; pinnyüi yanlu eejao dok nelepnyih.

²³Nyonghidah kü lahhan, phung hatü atep shühpü ngeü danshi peihnyüpeih.

²⁴Mongongpai kheüei koyeiyü shelei moknyeih; mechem amit vünghen, pinnyü nenmü yaongshi nenyuaoknyih.

²⁵Mechem amit vünghen, pinnyüi, “Aha!” shei vaünyeih; nenei mangheih-i-üng vehok büdainyüpeih. hatü veshan mübüi ngeüthüng anpü dannyeih.

²⁶Langda-i nüngei kihikon yah-ei pinyu hiang? hatü pehe philei pinyu je?

²⁷Nüngei shahkung homei alangi shangei aongei jep lingnyu hiang?

²⁸Pinnyü yaongvakei nyunyeih hatü halei shemvenyeih; hatü shangchingü pinnyülei veyomdü khih.

²⁹Halei uotü pinnyüi hahying yemnyeih; tailu leipü-üng pinnyülei müki eenyüpeih.

³⁰Melei mahng nyu, halei alangthü thainyeih, hatü alang chehathüi iy chüpnyüpeih.