Read Phom Naga JOB 40 Bible Online

JOB 40 - Phom Naga bible

JOB 40

¹SHEMBÜPAi Job kü eteke:

²“Jeiyong Kahvang kü nüngi chengteke. Kahvang mü shah dakteipü shennyak nüngi jangtuh.”

³Hahepak kü Jobi SHEMBÜPA kü jangei e:

⁴“Veituh, ngei kei maanpü hüki nüng kü jangei meheephaaokhen? Ngei ngelei ju kü laki shümlangnyeih.

⁵Ngei chem etepih, shejao ngei jangei ehen meheyao neshiü; nyipa etepih, sheyü hajük kü ngei ne-epih.”

⁶Hapheikü alüngleple kübü vamei SHEMBÜPAi Job kü jangei e:

⁷“Shennyak keiha nüngi shünglok loktuh; ngei nüng kü phehen, hatü nüngi ha kü jangtuh.

⁸Nüngi ngei nejiüpü leihühen je? Nüng dah shakhen tata kü ngei nyonghühen je?

⁹Kahvang kü keiha nüngei lak wong kohshi nyüpü je? hatü büpai keiha nüngi vangmuk khunghüaokhen je?

¹⁰Shejema nüng nyingi müknyinshekhang, hatü dhemeilaüma owtuh, dhüm hatü wonghingan thuhtuh.

¹¹Nüngei mongshih aüh-ei yenshi vamtuh, hatü changmeipüthü maanei leihütuh.

¹²Changmeipüthü peü kü veituh, hatü maanei leihütuh; nemeipüthü jom yaongpü shingei la-i shouptüktuh.

¹³Jom peü bhihla mongei dungtüktuh, hatü dipü kahdokei jom shatü tuhphongtuh.

¹⁴Shejüang nüng nyingi laophülei wongi aokpü dangnyüke shei ngei nyinghen.

¹⁵Nüng lingpü keiha ngei lingpü Behemoth kü veihümao; hapai mohoh kei phenha hahnyüke.

¹⁶Pinnyülei wong shüngei nyüke, hatü ngan pinnyülei vom leipü hakbhomei kohshi nyüke.

¹⁷Pinnyülei mei cedar pü keiha wong kohshi haongnyüke, hatü pinnyülei la kübü hakbhomü dhaomü wong kohshi nyüke.

¹⁸Pinnyülei vangthü melangnyiam shong keiha, hatü pinnyülei la nyiamlüng kei nyüke.

¹⁹Hapayü Kahvangi dükpü longpü khongkü shongpü nyüke; hapa Lingbüi mon yani bapei jüaokhen.

²⁰Mehenangkü phaüyemthü ngalepü kahshangthüi pinnyü shing hahying vamhünyüke.

²¹Pinnyü lotus phenha phangkü, hatü pingu yingkü nyaühut mongei lemnyüke.

²²Lotus phenhai pinnyü kü dhüm vainyüke, hatü kahji leipü willowpüthü pinnyü shinei kohnyüke.

²³Mangpü yungmok kao pinnyü nenyemnyu; pinnyülei dhe kü Jordan yung longei hungjao nemoiloi-i nyunyüke.

²⁴Hanei ami hapa nyiamphaak kü manaokhen hiang? nevaijü pinnyülei shongju taikam kü manaokhen hiang?”