Read Phom Naga JOB 41 Bible Online

JOB 41 - Phom Naga bible

JOB 41

¹Nüngi nyahyep nyiamphaak yah-ei Leviathan manaokhen je? nevaijü vü hüki büpalei yei kü sha-aokhen je?

²Nüngi büpalei shong kü vüi shenaokhen je? nevaijü büpalei ju kü nyiamphaak hümaokhen je?

³Büpai nüng kü phahji yüei khümphahen je? Büpai nüng kü inyainyiami shah ephahen je?

⁴Düngei nüng chongphobü leihen shingvaishi büpai nüng mü vangeishuwpü linghen je?

⁵Nüngi ouha mü kei büpa yepei shenaokhen je? Nevaijü nüngei yiükhathüi mongongei ngateihen mü yepei haümaokhen je?

⁶Nyah yeppü ami büpa yepei bhei komshi yuaokhen je? Bhei leihpü ami khih mü dehtü yuaokhen je?

⁷Nüngi büpalei hangshuw kü lahhan, nevaijü büpalei shangjing kü atepi luei shüh-aokhen je?

⁸Nüngi chem hongei veihümao, nüngi ne-yei nehonghükahen; nüngi hokhen deihkahen.

⁹Büpa yepaokhen shei monglempeyü angsha vaihen; Vei mon veipai aükahen.

¹⁰Büpa kü üpaiyao nehongaokhen mü büpa longi mangshi nyüke. Üpai hapa khüei yaongaokhen?

¹¹Vangsho phangkü nyupü üpai ha khüei yaongaokhen hatü yemmü nyuaokhen?

¹²Büpalei lakhila jung, nevaijü hapalei wong hatü bümhishao meipü nang ne-e-i nenmü nenyupih.

¹³Üpai büpalei dok leipü ow nyiuk-aokhen? nevaijü büpalei ju kü nyiam mahününg üpa heih-aokhen?

¹⁴Üpai büpalei jusha apaokhen? Büpalei bha shinei nyembenüng mon nyüke.

¹⁵Büpalei dokü ii laap longi, laap mü laap mü dheanei lingei nyüke.

¹⁶Vanglükao neshüaokhen mü hüki hük mü longi büngshi dheanei nyüke.

¹⁷Jom hüki hük mü dheanteiyei neyanhen mü dhienei nyüke.

¹⁸Büpa hahshü shüpai awlah vamnyüke, hatü büpalei mük vanghe aongpükei nyüke.

¹⁹Büpalei ju kübü awlom vamnyüke, hatü awlah phaatei aongnyüke.

²⁰Dük mongei thüng jakpü keiha, büpalei shongsha leipü awshit vamnyeih.

²¹Büpai ngü heepai awtao kü aw bahnyüke, hatü büpalei ju kübü awlom vamnyeih;

²²Büpalei wong üng kü kohshi nyüke; büpa touei peü nyemei nyaidainyeih.

²³Büpalei hakbhom hüki hük mü dheanei nyüke; hapayü nyiam kei longi wong kohshi nyüke.

²⁴Büpalei mongdangü yaong kei haüshi; yaonglang kei haüshi nyüke.

²⁵Mechem büpa pheüei yaonghen, wong kohpüthüao nyemnyeih; büpa kü nyemei nyokei leidainyeih.

²⁶Yani bapjao neshünyu; nevaijü phung, lahhan, nyiam lahhaniyao büpa kü neshünyu.

²⁷Büpai nyiam keyü hahtang kü kei, hatü melangnyiam keyü püdi kü kei deihnyüke.

²⁸Lahhaniyao büpa nechangtükaoknyu; büpa shingvaishi yaongao hahbhang kei leidainyüke.

²⁹Nyiamlüng kao hahtang kü kei deihnyüke; büpai nyiam lahhan kü nyiyei yaünyeih.

³⁰Büpalei vom phangei dükbhaok nahpükei nyüke; büpa shipü nyaühut chongü daomü daomü lokei yaüshi nyunyüke.

³¹Büpai yungchingao yungdük keiha laukei anshihnyeih; büpai ilangmongao mainga keiha laukei anshihnyeih.

³²Büpa daipü pheikü shotoh-i lem vamnyüke; shennyaki yungchingao shosho pungnyüke shei deihhen mü yung-oop laukhünyüke.

³³Büpa mü hükkeipü kahdoknyü kü meheyao neshiü; büpayü mehe kao nenyempü yem.

³⁴Büpai changmeipü yemthü peü kü naamei deihnyüke; büpayü yemhathü peü shak kü ongpa.