Read Phom Naga JOB 42 Bible Online

JOB 42 - Phom Naga bible

JOB 42

¹Hapheikü Jobi SHEMBÜPA kü jangei e:

²“Nüngi lemphüli dükaokhen, hatü nüngei mükhong mepayao bangei tuhnüng neaokpih shei ngei nyingnyüke.

³‘Meheyao nenyingpü kü ngei deihpü joei tuhpü üpaang?’ shei nüngi pheteke. Hingmei, ngei nenyingpü shah; ngei shingvaishi longi thamapü douthü jung ngeietükteke.

⁴‘Bangtuh, ngei ekününg: Ngei nüng kü phehen, hatü nüngi jangshih’ shei nüngi ngei kü eteke.

⁵Ngelei dhaongi mon ngei nüng jung danpeih, shejao shaang ngelei müki nüng eeteke.

⁶Hanangkü ngei etükpeyü nejiü shei ngei lahnyeih, hatü ngei bhihla hatü depla kü hoiyei mong lepnyeih.”

⁷SHEMBÜPAi Job kü hathü shah epheikü SHEMBÜPAi Teman am Eliphaz kü, “Ngei nüng hatü nüngei küphüpa nyi kü mongshihnyeih; mehenangkü ngelei chongphobü Jobi epü keiha ammi ngei nang jiüshi ne-eang.

⁸Hanangkü shaang mohoh chebaong nyet, mi chebaongha nyet yah-ei ngei chongphopü Job touei heihtuh, hatü amphongi laophü shing moila shuohtuh, hatü ngelei chongphobü Jobi am shingvaishi phophen; mehenangkü ammei ngadou shangshi ngei nephahji-i nedükhen shingvaishi ngei ha moila yahhen; mehenangkü amphongi ngei chongphopü Jobi keiha ngei nang mehe jiü, ha ne-eang” shei e.

⁹Hanangkü Teman am Eliphaz, Shuh am Bildad, hatü Naamath am Zophar hathü daiyei SHEMBÜPAi jomphong kü epükei dük, hatü SHEMBÜPAi Jobi phoppü yah.

¹⁰Hapheikü Jobi küphüthü shing phopshingkü SHEMBÜPAi Job kü shelei angpü kü shao shing nyi üei moihimanshuoh.

¹¹Hapheikü shelei büpa nyingei nyupüthü hatü jeihinaü nyahinaüthü peü peiyei büpalei shemei hahying; jomi büpa mü mongshang hantei, hatü Kahvangi büpa kü shanghah shuohpü nangkü mong nyiushemmei shah eshuoh. Jom peüi büpa kü lop maanbaong, hatü hon anguti hükbaong shuoh.

¹²SHEMBÜPAi Jobei yangnyu kü shongei moihimanpü mü pheishiüng nyeinya moihimanshuoh, hatü büpalei mi 14, 000, ut 6, 000, mohoh jora 1, 000, hatü gadu 1, 000 nyuteke.

¹³Shao büpalei yeshangthü jom nyet, yiükha jom jem nyu.

¹⁴Büpai hashongnyü kü Jemimah, naüjinyü kü Keziah, hatü shombünyü kü Keren-Happukh shei men.

¹⁵Kahdoknyü kempülei Jobei yiükhathü nela meipükei meleiyao nenyu, hatü chepai jomphong kao yeshangthü kü keiha mükjüp hanteke.

¹⁶Hapheikü Job vangbong kho hük mü pinyi thahshi nyu, hatü büpai hapeü hüpeüthü eeshi denshem ali thahshi nyu.

¹⁷Job den lushi viüei nyutü di.