Read Phom Naga JOB 5 Bible Online

JOB 5 - Phom Naga bible

JOB 5

¹Shaang nyükeishuoh; nüng kü jangphahen nyüpü je? Daülangpüthü üpa touei nüng daihenang?

²Hingmei mongshihpai ngapa hük jünyüpeih; hatü mükhühmongyungpai ngashi nyupü am lomohnyeih.

³Ngapathü tünglang yüpeyao ngei eetepih, shejao ngangahük kü jom shem thaüvaütükteke.

⁴Jomei hapeüthü yanglem neshiü; shahphen shingei jom khüambakei yaongpü üpayao ne-eeangpih.

⁵Aeipüthüi hühchi kübüao yemei hahying hahnyüke; hatü yunglepükei mop kü changteinyüke.

⁶Mehenangkü shanghah-ü kahdok leipü nengainyih.

⁷Shejao awlah shanglemei piyei aongpükei, hangkuliyü shanghah ponghen bühnyüpeih.

⁸“Ngei paoh nüng vailangmeyü ngei Kahvang yemhah shepeih, hatü büpa kü mongshang ehah shepeih.

⁹Büpai jeni yaoei neaokbenüng yashanyale düknyüke, ieyei neaokbenüng thamapü douthü düknyüke;

¹⁰Büpai kahdok kü vang shomnyüke; büpai kahthü kü yung shomnyüke.

¹¹Munenei maanpü leipüthü büpai shangei anshihnyüke, hatü mahng theppüthü büpai yangei tuhnyüke.

¹²Ühing küpjanthü büpai bentüknyeih,

¹³hatü kon kohpüthü jomei glüp vüshihnyeih, hatü aokpü nedanghünyih.

¹⁴Nyihnüng-üng jom touei vangnyak peinyüke; haümhahphei kü-üng jomi nyak kü kei bomei kamteinyüke.

¹⁵Büpai taopathü mahhen jusha leipao yangnyüke, Büpai jom wong kohpüthülei lak kübüao yangnyüke.

¹⁶Hanangkü taopathü shingvaishi monglemshing nyüke, hatü shahhing ne-epü ju kümtüknyüke.”

¹⁷“Kahvangi yeanhahpü shennyak moihimanpü; hanangkü Jeiyongpai yeanpü teyakphong.

¹⁸Mehenangkü büpai kaw shahünyeih, hatü büpai ma yahhünyeih, shejao büpalei laki-üng hameitüknyeih,

¹⁹Büpai nüng vongshüh vok kübü yangphahen; nyetpabü kü mehe vongshüh-ao nüng kü nehongpih.

²⁰Shaühile hepak kao büpai nüng dihen kübü, hatü vehok nyih-ao mahhen yanlu ngan kübü yangphahen.

²¹Jubenyeijaang ten kübüao nüng jolanghen, hatü mahpüchahpü peijao nüng nenyemhen.

²²Mahpüchahpü hatü shaühile kü nüng nyihen, hatü kahdoknyü kübü phaüyemthü kü nüng nenyemhen.

²³Mehenangkü nüngi kah kübü yaongthü mü vangteihen, hatü phaüyemthü nüng mü chingmei nyuhen.

²⁴Nüngei ashakshem kü nüng nyiushemmei kü nyuhen; nüngei douhinang kü veijü meheyao mahdaitü nechongkahen.

²⁵Nüngei hapeüthü longi nyuhen shei nüngi nyinghen, hatü nüngei hühihathü phenhavunglak kei nyuhen.

²⁶Meishi meandaipü hah manang vetei leipü keiha, nüng yangnyu shoshoei nyuhen.”

²⁷“Hami ha dokei veiphei hih, hatü ha jiüshi. Hanangkü hapa bangtuh, hatü nüngei yangnyu kü noteituh.”