Read Phom Naga JOB 6 Bible Online

JOB 6 - Phom Naga bible

JOB 6

¹Hapheikü Jobi jangei eteke:

²“Oh ngei ponghahpü dok kü doklangmeyü, hatü ngelei shanghah peü shetlangmeyü,

³Yungching bhihhiphang mao vihpüba nyuhen, hanangkü ngei shah nemei-i epeih.

⁴Mehenangkü Jeiyong Kahvangei lahhan ngei kü shüei nyüke; ngelei laanghai leü nemeipü yingtükteke; Kahvang nyempühanpü peü ngei khüei mon nyüke.

⁵Phaü gadui phenha hahhen tuhtü vaünyu je? nevaijü mohohbaongi hahhen het tuhtü vaünyu je?

⁶Nevüngpü hahying hüm neshih-i hahnyu je? nevaijü atishang vüngnyangi nyunyu je?

⁷Ngelei jui henüng hahying kü nehonghünyih, henüng hahyingi ngei tünghünyüke.

⁸Ngei monglemei nyupü Kahvangi yahphahen shingvaishi;

⁹Kahvangi ngei ngümei yaktükhen, büpalei lak laiyei deishihtü ngei jütükhah shepeih.

¹⁰Ngei mongongpeyü ha nyuhah shepeih; nenenaoki tüngjao ngei mongonghah shepeih; mehenangkü ngei Daülangpübalei shahthü nelah-i nenyuangpih.

¹¹Ngei monglemei nyuhen mü ngei kü mehe wong nyüpa? Ngei nenteiyei danhen mü ngei omdanhen mehe nyüpa?

¹²Ngei kü yaongei wong nyupü je? nevaijü ngelei bümü nyiam je?

¹³Ngei yanghen mü sheyü ngei kü wong neshiü; dükaokbenüng kemei ngei kübü yahlangteke.

¹⁴Üami küphü kü bampü nehunya, jomi Jeiyong Kahvang kü nyempü yaktükteke.

¹⁵Shejao ngelei mongjempathüi vang nekeijü jepdaipü yungyen keiha ngei kü lueilemteke.

¹⁶Yungyenthü shüdao-i maei nyunyüke,

¹⁷shejao shaamshingkü hathü nyaüei neshiüi leidainyüke, hatü yungyenthü meheyao neshiüi jepdainyüke.

¹⁸Yen daipüthüi lem pungei jahpanei daiyei mahnyüke.

¹⁹Tema am yen daipüthüi yung yemnyüke, Sheba am bhei leih yendaipüthüi monglemei veinyüke.

²⁰Jomi monglemei nyupü nedangjü mongmangnyüke; jomi hatou thah-ei heihjü mongmanghen mon heünyüke.

²¹Hapa keiha amphongao ngei touei leidaiteke; ammi ngei ponghahpü eeyei nyemdaiteke.”

²²“Ngei kü thintho yahshih, nevaijü ammei mop kübü ngei kü yawhdou yahshih” shei ngei am kü ela?

²³“Nevaijü vepalei lak kübü ngei yangtuh, nevaijü ngei kü shüveipü amei lak kübü yangshih” shei ngei am kü ela?

²⁴“Ngei kü nyuhshih, shejema ngei nenmü nyukahen; ngei mekei pungpa ha ngei kü nyinghüshih.”

²⁵Shahhing shah-ü meshük wong kohnya! Shejao amphong langmaanpai mehe vaihen?

²⁶Ngei mehe enya, ha kü ammi yeanhen shei deihpü je? hatü mekei neyahpü shennyaki epeyü vanglük kei deihpü je?

²⁷Ammi hashihhathü shingvaishi phongyomhen, hatü küphü leipü yah-ei shemmei leihen.

²⁸Shejao ammi ngelei dhe kü veishih, ngei shahshem ne-eküpih.

²⁹Shejüang, shahhing ne-epü doktuh, mong yeiyatuh, ngei shaang thahshi jiüshangi nyüpeih.

³⁰Ngelei ju kü nedaüpü hanei dangkao nyüke je? Ngelei jui jiüpü nejiüpü ne-eaokhen shei deihpü je?