Read Phom Naga JOB 8 Bible Online

JOB 8 - Phom Naga bible

JOB 8

¹Hahepak kü Shuh am Bildadi jangei eteke:

²Nüngi meshükpa henüng keipü shah ehenang? hatü yinglükpalei kei nüngi meshükpa ehenang?

³Kahvangi shahhing nyonghünyu je? Nevaijü Jeiyong Kahvangi jiüpüang nyonghünyu je?

⁴Nüngei hapeüthüi büpa khüei mang thahpü nangkü büpai jom jomei mang nangkü mahtükpü khihma.

⁵Shejao nüngi Kahvang yemjema, hatü Jeiyong Kahvang kü yüjema,

⁶nüng daülangi hatü jiüshangi nyujema, hingmei büpai nüng kü sheühphahen, hatü büpai nüng kü nüngei heanthü nyokei yahphahen.

⁷Shelei nüngi angpü maani mon vaijao, pheilei nüngi nyeinya anghen.

⁸“Sheleipü pahijeithü kü phehümao, hatü jomei bühipathüi mehe yemei dangaokpa dokhümao;

⁹mehenangkü jenphongü menyih-üng bühpü khih, hatü meheyao nenying. Kahdoknyü kü jenei nyihthüyü vangdhüm laang peihpükei peihdainyüke.

¹⁰Jomi nüng kü nenyuhphahen hatü ne-ephahen je? Jomi nüng kü jomi danaokpü leipü shah ne-ephahen je?

¹¹Nyaühut neshiüpü shing kü yeih longaokhen je? Yung neshiüpü shingei nyiamthüng vamaokhen je?

¹²Manglongpü vaijao yung üdaijema, nedehshuohjao lebü phenha mü ha shong vandainyeih.

¹³Hapa keiha Kahvang betükpüthülei yangnyu nyunyeih, hatü Kahvang nenyingpüthü monglem neshiüi mahnyeih.

¹⁴Büpai monglempeyü lomi phendainyeih; büpai mongnyangpeyü maknyim kü kei nyüke.

¹⁵Büpai maknyim kü mongnyangjema, hapai büpa yepei tuh-aokhen je? Büpai ha shoungshi nyujao ha netuh-aokhen.

¹⁶Nemeipüthüyü vanghenyü kü phenha nipükei vamnyeih, hatü pemong maei bannyeih,

¹⁷jomei tünglang yaong kü banei dainyeih, hatü yaong kü bakshi nyunyeih.

¹⁸Shejao hapa bhitükhen, üpayao ha hatouei nyupü khih shei nenyingaokhen.

¹⁹Hih, nemeipüthülei mongong lemü hapa mon, hatü hapa shing kü lebü phenha vamnyüpeih.

²⁰Hingmei Kahvangi eela neshiüpü yangnyu netuhphongnyih, nevaijü nemeipüthü kü nesheühnyih.

²¹Büpai nüngei ju kü nyipai mahühen, hatü mongongpai lenhühen.

²²Üami nüng kü jiühitnya jom hai danghen, hatü nemeipü amei shem mahdaihen.”