Read Phom Naga JOB 9 Bible Online

JOB 9 - Phom Naga bible

JOB 9

¹Hapheikü Jobi jangteke:

²“Hapayü jiüangke shei ngeiyao deihnyüpeih; shejao mekei etü hangkui Kahvang touei daülangpü leiaokhenang?

³Hanei-i büpa mü shah dakteinüng deihjao, büpai haja lomei phejao hük kao shah neleiaokpih.

⁴Büpayü longi nahshi hatü wong kohshi, üpai büpa khüei yaongaokhen hatü neüaokhen?

⁵Shahvüng neshuohpü kü büpai kahshangthü shintüknyeih, hatü büpa mongshihpai hathü shakhimong leitüknyeih.

⁶Büpai kahdoknyü hapalei shing kübü jenhünyeih, hatü hapalei shemnyüthü kheühünyeih.

⁷Büpai ngeükhüam shuohjü vanghenyüao neaongi dohdainyeih, hatü büpai lithathü vangngai nenyahüi dohtüknyeih.

⁸Büpa monhai vangshothü paanei deishihnyeih, hatü yungching yungmokao shouptüknyeih.

⁹Büpayü lithathü litbaong, hatü heshüphi kübü litha khong Lingbü khih.

¹⁰Büpai neyaoaokbenüng thamapü longi düknyüke, hatü iehen neaoki yashanyale longi düknyüke.

¹¹Mechem büpai ngei peih-ei dainya, ngei büpa ne-eeaoknyu; mechem büpa ngei peih-ei lüdaihen, ngei büpa nenyingoaknyu.”

¹²Büpai aetlangjü üpai büpa kü bangaokhen? “Nüngi mehe düknya” shei üpai pheaokhen?

¹³Kahvang mongshihdai pheikü ha yepei netuhlangnyih. Rahab mü sheühteipüthüiyao büpa kü aümei khümteke.

¹⁴Mekei etü ngei büpa mü shah dakteihen mü ngei shah dangaokhen?

¹⁵Ngei pungtükpü neshiüjao, ngei büpa kü shah neleiaokpih; ngeiyü ngelei shahphenbü kü phahji mon yühen hih.

¹⁶Ngei nyükpü kü büpai jangphülangmao, ngelei ngeü danlangphahen shei ngei hingnelemnyih.

¹⁷Büpai ngei yinglükpalei-i ngümtükpeih, hatü meheyao nevaipü kü büpai ngei ma longi yahhüpeih.

¹⁸Büpai sheyü ngei kü yangnyu ngü neyahphahen khih, shejao ngei shahyakpai mahüteke.

¹⁹Wong dokteijao büpa-üng wong kohpüba; Shahhing epü phikü shei ejao, üpai büpa kü chengaokhen?

²⁰Ngei pungpü neshiüjao ngelei jui-üng ngei nyonghen; ngei kü eela neshiüjao ngeiyü pungpeih shei büpai nyongphahen.

²¹Ngei kü eela neshiüjao, ngei ngei nangkü nehakanyih; ngei ngelei yangnyu nevaihüang.

²²Hapayü peü aihük vaipü nangkü, “Büpai nemeipao meipao aihük mü mahtüknyu khih” shei ngei enyüpeih.

²³Mechem vongshüh homei ngangahük kü dihen peinya, büpai nepungpüthü lomohpü küang nyinyüke.

²⁴Mechem kahmük hük nemeipü amei lak kü shuohhen, büpai shahphenbüthü mük phüngtüknyeih, hapayü büpai nevaijema üpai düknya?

²⁵Ngelei nyihthüyü mokpü am mao shangpüba; mongongpü ne-ee-i peihdaikemnyüke.

²⁶Yungnyü hangshah bhongpükei, alangi hahying eeyei laongpükei nyihthü peihdainyüke.

²⁷Ngei eelapü betükshah, mongmang nevai mongong dhe jeishah shei ejao,

²⁸Ngei ponghahpü kü nyemei deih-angke, ngei pungei nyüpeih shei nüngi ne-ephahen shei ngei nying.

²⁹Shejao ngei pungteke shei edaipü nangkü mehekei ngei angsha kü nyiueinanghen?

³⁰Ngei sapon shih-ei hangha lakjao, hatü ngelei lak shüyung yah-ei hühlangmao,

³¹nüngi ngei nyüphinya kü shüktükhen, hatü ngelei ashakviha-i ngei jiühithen.

³²Ngei shah leiteihen mü, hatü shahphen shingei yaongei shah dakteihen mü büpayü ngei kei shennyak nevai.

³³Henji nyiphen kü lak shihhen mü henji aa kü shahphenbü hanei nyulangmeyü,

³⁴ngei toueipü Kahvangei hanbhi yahlangphülang meyü, hatü büpai ngei nyemhüpü dohtüklangmeyü meihen.

³⁵Halangmeyü ngei büpa kü nenyemi eaokhen, shejao shaang ngei nyupü deihshuohjema neaokhen khih.