Read Phom Naga MENVIH KESHO 103 Bible Online

MENVIH KESHO 103 - Phom Naga bible

MENVIH KESHO 103

¹SHEMBÜPA kü moihimantuh, Oh ngelei laangha, ngelei thentoimongdang kempai büpalei daülangpü men moihimantuh.

²SHEMBÜPA kü moihimantuh, Oh ngelei laangha, hatü büpai shuohpü nangleithü tebetük.

³Büpai nüngei mang kemei tüknyeih, nüngei din kemei meitüknyeih.

⁴Büpai nüngei yangnyu kahsha leipü angei leinyeih, hatü büpa bampü hatü phahjipai athen thenhünyeih.

⁵Nüng nyupü thahshi büpai doumei-i nüng hüshemhünyeih; hanangkü alang keihanethe leiyei ja leihünyeih.

⁶SHEMBÜPAi ponghahpüthü dah shakhünyeih, hatü peü kü shahhing düknyeih.

⁷Büpai Mosa kü büpalei lemthü, hatü Israel nanglak kü büpalei douthü nyinghüteke.

⁸SHEMBÜPAyü shinshangpü, hatü phahjipü, mongshihhen youngmü, hatü bampü kü bhashahshi nyüke.

⁹Büpai düngei nethaüvaühen, nevaijü büpalei mongshih düngei nenyuhen.

¹⁰Jenei mang aimü büpai jen kü nedüknyih, nevaijü jeni pungpü aimü büpai nekhangnyih.

¹¹Kahdok shak kü vangsho shaopü keiha, büpa nyempüthü kübüpa bampü longshi nyüpeih.

¹²Heong kübü heshü taipü keiha büpai jenei mang taishi yaktükteke.

¹³Pa-i hapeüthü kü kenpü keiha, SHEMBÜPAi büpa kü nyempüthü kü bamnyüpeih.

¹⁴Jen mekei lingpa ha büpai nyingei nyüke; büpai jenü bhihla khih shei deihnyüke.

¹⁵Hangkulei nyihthüyü phenha keiha lingteke, phaü leipü chü keiha koh-ei longnyüke;

¹⁶Vanglüki ha kü lükshuohjü, ha kaongdainyüke; hatü hapalei shing nenyingi leidainyüke.

¹⁷Shejao SHEMBÜPA bampeyü nedohnetenpü kübü nedohnetenpü ngoishi büpa nyempüthü shing nyüke, hatü büpa daülangshemshepü hüdenhalenshi;

¹⁸büpalei vangpüshuwpü noteipüthü, hatü büpalei shahkungthü dükhen deihpüthü shing nyüke.

¹⁹SHEMBÜPAi büpalei ong uoshing vangshothülei lingei nyüke, hatü büpalei ongchingipeü kü vanglem lemnyüke.

²⁰SHEMBÜPA kü moihimantuh, Oh am vangsho phongshanthü, am wong kohpü büpai kangpü dou dükpüthü, büpai epü shah ven danpüthü.

²¹SHEMBÜPA kü moihimantuh, am vangsho shanthü; büpai mongpü dükpü chongphobüthü.

²²SHEMBÜPA kü moihimantuh, büpalei douthü, büpai vanglem lempüshing peü SHEMBÜPA kü moihimantuh, Oh ngelei laangha.