Read Phom Naga MENVIH KESHO 104 Bible Online

MENVIH KESHO 104 - Phom Naga bible

MENVIH KESHO 104

¹SHEMBÜPA kü moihimantuh, Oh ngelei laangha. Oh SHEMBÜPA ngelei Kahvang, nüng ahshi longshi nyüke. Nüngü dhüm hatü müknyinshekhangi maei nyüke.

²Ashak ümpü keiha vangngai-i jümshi nyüke. Nüngi ashakshem paanpü keiha vangshothü paanei deishih;

³nüngi yung shangkü laophülei shem veteke, nüngi phumthü koyei khari vaihü, nüngi phumei yang kü uotü longtei;

⁴nüngi vanglükü nüngei phongmokbü, aw hatü awlomü nüngei chongphobüthü leihü.

⁵Nejenlenhen mü nüngi kahdoknyü hapalei chongnyiam kü lingteke.

⁶Ashaki jümpükei nüngiha kü yungchingi jüm, kahshangthü kao yungi jümteke.

⁷Mechem nüngi yung kü lohshuohpa, jom nyaidaikem; nüngei vangmuk ngeü kü jom mokdainyüke.

⁸Jomi kahshangthülei aongnyüke, nüngi jom shing itei tuhpü shing kahjilei yemei shadainyüke.

⁹Jomi shao kahdoknyü kü nejümhen, hatü ha lenei neheihhen shingvaishi nüngi viong lingei shuoh.

¹⁰Nüngi kahjithü kü yunglok bhaoei vamhü, jom kahshangthü aa kü yennyüke.

¹¹Hapai phaüyemthü kü yinghen shuohnyüke, phaü gaduthüi yungle meinyüke.

¹²Yungyen yopailei phaüouthü jep lingnyüke, hatü haleipü pükaothülei kesho loknyüke.

¹³Nüngei shem shangpa leipü nüngi kahshangthü kü yung shomnyüke; kahdoknyü-ü nüngeilakdou kübü betjüki hüshemnyüke.

¹⁴Nüngi yemhimakthü shing thüng vamhünyeih, hatü shennyakthüi hahhen phenlak kohhünyeih. Nüngi kahdok kübü hahying,

¹⁵hatü hangku mongonghühen yiü, dhe nyanghen mainga, hatü hangkulei mongdang wong kohhühen hahying vamhünyeih.

¹⁶SHEMBÜPAi sheipü Lebanon leipü cedar püthüi yung changshi dangnyüke.

¹⁷Hathü kü outhüi jep lingnyeih; awkaongpüthü kü yungouthüi jep lingnyeih.

¹⁸Shaopü kahshangthüyü meiyahthü shing nyüke; yaongvakü jom joshing nyüke.

¹⁹Nüngi lennyüyü hepak vangpan ithen lingei tuh; vanghenyüi hapa shühen hepak nyingei nyüke.

²⁰Nüngi vangnyak ling, hatü nyak kü phaüyemthü kemei het yemhah dainyeih.

²¹Mailang chehathüi het yüei ngüngnyeih, Kahvang leipü het danghen veinyeih.

²²Mechem vanghe aonghen, jomi jepei leiyei lemshi nyunyeih.

²³Shennyakthüi jomei douei dainyeih, hatü om dhüshi jomi dou düknyeih.

²⁴Oh SHEMBÜPA, nüngi douthü longi lingteke! Kihikon kü nüngi hathü peü ling; kahdoknyü-ü nüngei yemhimakthüi maei nyüke.

²⁵Halei ba longpü yungching nyüke; ieyei neaoki yemhamakha maei nyüke; yemmü nyupü yemthü longpü maanpü nyüke.

²⁶Ha kü jahas kamteinyüke, hatü nüngi lingpü Leviathan halei ngalenyüke.

²⁷Jom hahshan ieyei nüng leipü het danghen shei veinyüke.

²⁸Mechem nüngi shuohhen, jomi ha hahnyüke; mechem nüngi lak laihen, jom doumei-i maei nyunyüke.

²⁹Mechem nüngei dhe jodaihen jom nyemnyeih; mechem nüngi jomei ngü yahlanghen, jom diyei kahdok leidainyeih.

³⁰Mechem nüngi nüngei ngü duhenshang jom vamnyeih; hatü nüngi kahdok shak ja leihünyüke.

³¹SHEMBÜPA müknyinshekhang den kü nyuhen; SHEMBÜPAi büpalei dou kü mongmeihen.

³²Üpai kahdoknyü kü veijü kheünya, üpai kahshangthü kü hongjü awshit vamnya?

³³Ngei yemmü nyupü thahshi SHEMBÜPA kü kesho lokhen; ngei yangnyu nyupü thahshi ngelei SHEMBÜPA kü ngei kesho lokhen.

³⁴Ngei phoppütupü kü büpai mong hahhen, mehenangkü ngei SHEMBÜPA kü mongongnyeih.

³⁵Mangthüyü kahdoknyü leipü mahtükhüte, hatü nemeipü am tenyuhü. SHEMBÜPA kü moihimantuh, Oh ngelei laangha, SHEMBÜPA men longtuh!