Read Phom Naga MENVIH KESHO 105 Bible Online

MENVIH KESHO 105 - Phom Naga bible

MENVIH KESHO 105

¹Oh SHEMBÜPA kü menvihshuohtuh, büpalei men kü nyüktuh; büpalei douthü jatthü kü nyinghütuh.

²Büpa kü loktuh, büpa kü menvih loktuh; büpalei thamapü douthü jung etuh.

³Büpalei daülangpü men müknyinshekhangtuh; SHEMBÜPA yempüthülei mong mongonghütuh.

⁴SHEMBÜPA hatü büpalei wong yemtuh; büpa ompü düngei yemtuh.

⁵Büpai dükpü thamapü douthü, yashanyale, hatü büpai shahphenpü deih-ei dangtuh,

⁶Oh büpalei chongphobü Abrahamei hühihathü, Jakob hapeüthü, büpai jelangpüthü.

⁷Büpayü SHEMBÜPA, jenei Kahvang; büpai shahphenpü kahdoknyü peülei nyüke.

⁸Büpalei vangpüshuwpü büpai düngei deihshi nyüke, büpai etükpü shahthü denshem haja thahshi deihshi nyüke.

⁹Büpai Abraham mü vangteipü, büpai Isak mü lahtükpü;

¹⁰büpai ha Jakob kü shahkung hük keiha, Israel am kü nedohnetenpü vangteipü keiha,

¹¹“Ammei mükjüp vaishi ngei am kü Kanan kahdok shuohhen” shei eyei nyüke.

¹²Mechem jom maanei mon nyupa, maani mon yenpa kei nyupa,

¹³jom jat hük kübü hük, ongching hük kübü hük shei longteihampeih.

¹⁴Büpai jom kü üamiyao neshüveihü; jom nangkü büpai ongthü kü loh-ei,

¹⁵“Ngei jelangpüthü kü laki tehong, ngelei thibüthü kü ten tedük” shei ehampeih.

¹⁶Mechem büpai kahdok khüei chamhilem shompa, hatü jomei hahying peü mangtükpa,

¹⁷Joseph, aa hük keiha yuei jom shekü shennyak shomtükpeih.

¹⁸Büpalei la kü nyiamvüi shentü, büpalei üng kü nyiami ngeihtü,

¹⁹büpai mehe e, ha mangjiü thahshi, SHEMBÜPAlei shah-i büpa kü nedoh-i dokei nyuhampeih.

²⁰Ongpai shomei büpai vetükhü; nanglakthülei vanglem lembüi büpa veyei deishih.

²¹Büpai jomei shemei büpa shembü leihü, hatü büpalei mopthü peü kü khei vaihü;

²²büpai mongpükei büpalei lakchongbüthü kü nyuhhen, hatü behethü kü kihikon venbü leihü.

²³Hapheikü Ijiplei Israel yiü; Ham amei kahdokei Jakobü benha kei nyu.

²⁴SHEMBÜPAi büpalei nanglakthü kü hapeüthü longi shuoh, hatü jomei vepathümao wong kohpüba leihü.

²⁵Büpai laophülei nanglak kü Ijip ami jiühithü, hatü laophülei chongphobüthü khüei shah showhü.

²⁶Büpai jepü büpalei chongphobü Mosa hi Aaron nyi shom.

²⁷Büpai jom mü nyangeihepü dük, Ham amei kahdokei yashanyale dükteke.

²⁸Büpai shangmang shomei kahdokü vangnyak leihü, jomi büpalei shah khüei yaong.

²⁹Büpai jomei yung iy leitük, hatü nyahthü ditükkem.

³⁰Jomei kahdok louki mahü, jomei ongshem dangkao mateke.

³¹Büpai shah e, hatü maanha vam, hatü jomei kahmük kü hoiha mateke.

³²Büpai vang nangjei shüyaong vüshih, hatü kahmük peü kü klang nyephü.

³³Büpai jomei nyalingngupai, hatü adhapüthü mangtük, hatü jomei kahmük kübü püthü tentük.

³⁴Büpai e, hatü ieyei neaoki shoukhanbaongthü vamhü.

³⁵Hathüi jomei kahdok kübü phenhavunglak peü hahtük, hatü kahdok kübü betjükvungjük kemtük.

³⁶Büpai jomei kahdok kübü hashongpathü jütük; jomei wong kübü hashongthü ditükhü.

³⁷Hapheikü büpai Israel am hon hi ngin mü müei lei, hatü jomei jatthü kühuluh shuohpü üpayao nenyu.

³⁸Jom lüdaijü Ijip am mongong, jom kü nyempü jom kü pei.

³⁹Büpai jom kü dhümhen phum yaüei deishih, hatü nyak kü vangngai shuohhen aw shuoh.

⁴⁰Jomi yüjü büpai jom kü adhit outhü shuoh, hatü vangsho leipü hahying changshi shuoh.

⁴¹Büpai yaong bhaohütü yung bhaoei vamhü; hatü yungyen kei bhih kahdok kü yenhüteke.

⁴²Mehenangkü büpalei daülangpü lahpü, hatü büpa chongphobü Abraham deih-ei dang.

⁴³Hanangkü büpai mongongpai büpalei nanglak müei lei, büpai jelangpüthü lokyaki leiteke.

⁴⁴Büpai jom kü jatthülei kahdok shuoh, hatü jomi jatthülei mop kemei yah.

⁴⁵Hathü kemei jomi büpalei shahkungthü banghen, hatü dükhen nangkü ha vampeih. SHEMBÜPAlei men longtuh.