Read Phom Naga MENVIH KESHO 107 Bible Online

MENVIH KESHO 107 - Phom Naga bible

MENVIH KESHO 107

¹Oh SHEMBÜPA kü menvihshuohtuh; mehenangkü büpa meiangpeih; büpa bampü denden kü nyunyeih.

²SHEMBÜPAi anglangpüthü, shanghah kübü anglangpüthü;

³kung kahdokthüheong, heshü, apsha pehe kübü leilangpüthüi hapakei etuh.

⁴Haneiyü jahpanei paüshi shennyak nyushing nedangi longtei.

⁵Aeipü lepai monglemhen neshiüi mong mahdai.

⁶Hahepak kü jom shanghahpai SHEMBÜPA kü nyük, hatü büpai jom shanghah kübü yang.

⁷Shennyak nyushing mangngoi thahshi büpai jom kangshangpü lem kü mü.

⁸SHEMBÜPAi bampü shingvaishi, hatü hangku kü büpalei thamapü douthü shing jomi menvih shuohhütuh.

⁹Mehenangkü büpai yungle meihünyeih, hatü aeipüthü doumei-i mahünyeih.

¹⁰Haneiyü shangmang kü mongmangei nyiamvüi shatü khoklatei uoshi nyu;

¹¹mehenangkü jomi Kahvang shahthü khüei yaong, hatü Jaipübai shahnying venpü yaktük.

¹²Douwong dükpai jom nyiudai, üpaiyao sheühhen neshiüi jom doteke.

¹³Hahepak kü jom shanghahpai SHEMBÜPA kü nyük, hatü büpai jom shanghah kübü yang.

¹⁴Büpai jom shanghah, hatü mongmang kübü yang, hatü jomei nyiamvü phentük.

¹⁵SHEMBÜPAi bampü shingvaishi, hatü hangku kü büpalei thamapü douthü shing jomi menvih shuohhütuh.

¹⁶Mehenangkü büpai melangnyiam shadenao bentüknyeih, hatü nyiamlüngao nyi anei tettüknyeih.

¹⁷Haneiyü jomei mang nangkü tüng, hatü jom pungpü nangkü shanghah pong.

¹⁸Jomi mepa hahyingao nehah-aok, hatü jom dipü shaden yodaitü nyu.

¹⁹Hahepak kü jom shanghahpai SHEMBÜPA kü nyük, hatü büpai jom shanghah kübü yang.

²⁰Büpai shah shomei jom meihü, hatü mahhen kübü jom yang.

²¹SHEMBÜPAi bampü shingvaishi hatü hangku kü büpalei thamapü douthü shing jomi menvih shuohhütuh.

²²Jomi menvih shuohpüjakpü moila shuohhütuh, hatü mongong kesho homei büpalei douthü jung ehütuh.

²³Haneiyü yungchingei jahas kü longteiyei bhei leihteke;

²⁴Jomi SHEMBÜPAlei douthü, büpalei thamapü douthü yungching ilangmongei eeteke.

²⁵Büpai ngeükhüam shuohtü yinglükpalei vamhü, hapai yungching yungmok domei anshih.

²⁶Jom vangsholei domei anshih, hatü ilangmongei leidai. Henüng vongshüh kü jom mong mahdai.

²⁷Yiüi chokpükei huluh shuoh-ei tüngtüngmüngi nyu, hatü jomei kon kemdai.

²⁸Hahepak kü shanghahpai jomi SHEMBÜPA kü nyük, hatü büpai jom shanghah kübü yang.

²⁹Büpai yinglükpalei nenhü, hatü yungching yungmok dohtük.

³⁰Hathü dohdaipü nangkü jom mongong, hatü jomi lümpü shingei büpai jom müei lei.

³¹SHEMBÜPAi bampü shingvaishi hatü hangku kü büpalei thamapü douthü shing jomi menvih shuohhütuh.

³²Nanglakthü thaishingei jomi büpa vihhütuh, hatü behethü thaishingei jomi büpalei men longhütuh.

³³Büpai yungnyü ütüktü bhih kahdok leitüknyeih, yunglok vamshing kahvan leitüknyeih.

³⁴Shennyakthü nemeipü nangkü büpai betjük jükpü kahdok hüm kohpü kahdok leitüknyeih.

³⁵Büpai shao bhih kahdok yungkuk leitüknyeih, hatü kahvan kahdok yunglok vamshing leitüknyeih.

³⁶Büpai halei aeipüthü nyuhünyeih, hatü jomi nyuhen jila agei dainyeih.

³⁷Jomi sheili sheinyeih, nyalingngupai sheinyeih, hatü betjük meipü dangnyeih.

³⁸Büpalei moihimani jom longi daeishenyeih, hatü büpai jomei yemhimak nyokei neleitüknyih.

³⁹Mechem jom shüveipü, shanghah hatü mongmang homei maanei leihen,

⁴⁰büpai jom kü shüveipü ongthü nyonghünyeih, hatü jahpanei paüeiyonei longteihünyeih.

⁴¹Shejao büpai nehahneyingpüthü shanghah kübü yanglangnyeih, hatü jomei shemong mithü kei dahünyeih.

⁴²Daülangpüthüi ha eetü mongongnyeih; shejao nemeipü amei ju kümdainyeih.

⁴³Kon kohpüthüi ha nyingei lituh, hatü SHEMBÜPAi bampü deih-ei dangtuh.