Read Phom Naga MENVIH KESHO 108 Bible Online

MENVIH KESHO 108 - Phom Naga bible

MENVIH KESHO 108

¹Ngei nüng kü monglemnyeih, Oh Kahvang! Ngei lokhen hatü ngelei laanghai ünghinyah meipai lokhen. Paotuh, ngelei laangha.

²Paotuh, ngelei harp hatü lyre! Ngei vanghenyü shin phukhen.

³Nanglakthü khongkü ngei nüng kü menvih shuohhen, Oh SHEMBÜPA, jatthü touei ngei nüng menvihpü lokhen.

⁴Nüngi bampü vangshothü mao shaoshi, hatü nüng shahhing epü vangshang ngoishi nyüke.

⁵Oh Kahvang, vangshothü shak kü nüng longei aongtuh, hatü nüngei müknyinshekhang kahdok peü shak kü nyuhütuh.

⁶Nüngei lakdahphi-i aokpü yahshih, hatü ngei kü jangshih, shejüang nüngi bampüthüyangaokhen.

⁷Kahvangi büpalei daülangpü shing leipü hapakei lahteke: “Aokpü dangpai ngei Shekhem hantükhen, hatü Sukkoth Kahji demei shuohtükhen.

⁸Gileadü ngelei, Manasseh-ao ngelei; Ephraimü ngelei nyiam athen; Judahyü ngelei lenshuoh.

⁹Moabü ngelei la paüteipü chilimji; Edom kü ngelei lathuh hukei shükhen; Philistia am shak kü ngei aokpü dangei lenhen.

¹⁰Üpai ngei penyü showtükpü chingei müei peihen? Üpai ngei Edomei müei deihen?

¹¹Nüngi ham neyaktükangpü je, Oh Kahvang? Nüngi hamei veshanthümü chemi nedainyu je, Oh Kahvang?

¹²Oh vepathü khüei ham kü sheühshih; hangkui sheühpeyü yahlak neshiü.

¹³Kahvang mü ham aokpü danghen, hamei vepa ngümtükhenü büpa.”