Read Phom Naga MENVIH KESHO 109 Bible Online

MENVIH KESHO 109 - Phom Naga bible

MENVIH KESHO 109

¹Nüng nenmü tenyudai, Oh ngei menvihpü Kahvang.

²Ngei khüei nemeipü hatü lupülempüthülei ju kanyüke, shahshem yeijaangi ngei khüei enyüke.

³Jiühitnalai shah ngei kü enyüke, hatü ten neshiüshiüi ngei khüei enyüke.

⁴Ngei bampü nangjei jomi ngei kü thaüvaünyüke, ngei jom shing phopshing kao hapakei düknyüke.

⁵Hanangkü jomi mei nangjei ten, ngei bampü nangjei jiühitpü nyokei shuohnyüke.

⁶Jomi, “Büpa khüei nemeipü shennyak hük jetuh; büpalei lakdah lemei thaüvaühen hük yaonghütuh;

⁷mechem büpalei shahphenhen, büpa nyonghütuh, büpai phoppeyü mang leihütuh,

⁸büpalei yangnyu nyih shohtüktuh, büpalei mopthü lebü hüki yahlanghütuh,

⁹büpalei hapeüthü hashihha, hatü chenyüha vaümnyü leihütuh;

¹⁰büpalei hapeüthü yühahjaiyingei longteihütuh; jom nyupü shem benei changtükhütuh;

¹¹hang shemhahhen nyupü ami büpalei mop kemei yahlanghütuh; büpai nyiuei ngaihahpü betjük yenpa-oupai gühlanghütuh;

¹²büpa kü phahjihen mü üpayao tenyuhü, nevaijü büpai hashih shihphongpü hapeüthü kü shenshanghen üpayao tenyuhü.

¹³Büpalei hüshom pheinaü li hümtüktuh; den nyipabü kü büpalei men thitei yaktüktuh.

¹⁴SHEMBÜPAi chebü chepa amei mang deih-ei nyemdang, hatü chenyülei mang thitei teyaktük.

¹⁵SHEMBÜPA touei hathü düngei nyuhütuh, hatü kahdoknyü kübü büpa betüktuh.

¹⁶Mehenangkü büpai phahji huhen deih-ei nedang; shejao taopa nehahneyingpüthü, hatü mongdang mangdaipüthü kü dihen mü changhampeih.

¹⁷Büpai thaüvaühen kennyüke, büpa kü thaüvaü hettuh. Büpai moihiman nena, ha büpa touei taishi lüdaituh.

¹⁸Büpayü bhagthuh keiha thaüvaü owtü nyunyüke; hapai büpalei büm yung keiha, hatü vang mongei mainga keiha haümmei shütuh.

¹⁹Hayü büpai büm kü ngeihpü büm-ow kei leihütuh, nyihjeih sheppü shüngshep kei nyuhütuh.

²⁰Hapayü ngei kü thaüvaüpüthü, hatü ngei khüei ten epüthü kü SHEMBÜPAleipü laklei vaihen” shei enyüke.

²¹Shejao nüngi, Oh SHEMBÜPA, ngelei Kahvang! Nüngei men kü ngei leimao ha dükeishuoh; mehenangkü nüngi bampeyü meiangke, ngei yangtuh.

²²Mehenangkü ngeiyü taopa, hatü neaoknethangpü, hatü ha ngelei mongdang kü shiongnyüke.

²³Ngeiyü om kü vangdhüm laang peihdaipükei lüdainyüke, yemhamakha hük kei ngei deilangnyüke.

²⁴Hahying taopai ngelei lashüh wong neshiü, ngelei bümü vang kü shuwi jümdaiteke.

²⁵Ngei kü thaüvaüpüthü touei ngeiyü mihnyi pü leidaiteke; ngei eejü jomi ngaüm dhinyüke.

²⁶Sheühshih, Oh SHEMBÜPA, ngelei Kahvang! Nüngi bampü aimü ngei yangtuh.

²⁷Jomi hayü nüngei lak khih, nüngi ha dükpü khih shei jomi nyinghütuh, Oh SHEMBÜPA.

²⁸Jomi nyemthaüvaü, shejao nüngi moihimanphahen. Ngei kü shüveipüthü veühütuh; nüngei chongphobü mongonghütuh.

²⁹Ngei kü thaüvaüpüthü mongmangi jümhütuh; jomei veüpong büm-ow keiha owhütuh.

³⁰Ngelei jui SHEMBÜPA kü menvih longpü shuohhen; ngei khong chi kü büpa vihhen.

³¹Mehenangkü büpai taopathülei lakdah philei yaongnyeih, hatü dihen mü nyongtükpüthü yangnyeih.