Read Phom Naga MENVIH KESHO 116 Bible Online

MENVIH KESHO 116 - Phom Naga bible

MENVIH KESHO 116

¹Ngei SHEMBÜPA kü bamnyüpeih; mehenangkü büpai ngelei ngeü hatü ngei yüpü danteke.

²Büpalei dhaong ngei philei meepü nangkü ngei yemmü nyupü thahshi ngei büpa kü nyükhen.

³Dihen aethitai peü lemei ngei shinei nyuteke; nyempühanpü mahngsha ngei ngoidaitü nyuteke; ngeiyü nyempü hatü mongshangi maei nyuteke.

⁴Hahepak kü ngei SHEMBÜPAlei men kü, “Oh SHEMBÜPA, ngei phopnyüpeih, ngei yangtuh!” shei nyük.

⁵Phahjipü hatü daülangpeyü SHEMBÜPA; jenei Kahvangü phahjinyeih.

⁶SHEMBÜPAi lapja nyupüthü yangnyeih; ngei mekei neyah-i nyushingkü büpai ngei yangpeih.

⁷Leptuh, ngelei laangha, nüng nyiushemmei kü nyukei; mehenangkü SHEMBÜPAi nüng kü meishi dükteke.

⁸Mehenangkü nüngi ngelei laangha dihen kübü, ngelei mük mükphi yenhen kübü, hatü ngelei la huluh shuohhen kübü yangteke.

⁹Yemmü nyupü kahdok kü ngei SHEMBÜPA mü kamnyeih.

¹⁰“Ngei ponghahnyeih” shei epü hepak kao ngei hinglemnyeih.

¹¹Ngei longi mongshang kü nyushing kü, “Peü shahshem khih” shei epeih.

¹²SHEMBÜPAi lemphü mei dükpü kü ngei büpa kü mehe shemshuohhen?

¹³Ngei yemleipü yungshong noei anhen, hatü SHEMBÜPAlei men kü nyükhen.

¹⁴Büpalei nanglak peü nyupü touei ngei SHEMBÜPA kü lahhen.

¹⁵SHEMBÜPA kü hinglempü shennyak hük dipeyü büpa touei douvang hih.

¹⁶Oh SHEMBÜPA, ngei nüngei chongphobü; Ngei nüngei chongphobü; nüng chongphonyülei hapeü. Nüngi ngei nyiamvü kübü laiyei deishihpeih.

¹⁷Ngei nüng kü menvihpü moila shuohhen, hatü SHEMBÜPAlei men kü nyükhen.

¹⁸Büpalei nanglak peü nyupü touei ngei SHEMBÜPA kü lahpü dükhen.

¹⁹SHEMBÜPA nyushing shemei Oh Jerusalem, jiamei ngei lahpü shuohhen. SHEMBÜPA men longtuh.