Read Phom Naga MENVIH KESHO 118 Bible Online

MENVIH KESHO 118 - Phom Naga bible

MENVIH KESHO 118

¹SHEMBÜPA kü menvih shuohtuh; mehenangkü büpa meiangpeih; büpa bampü den kü nyunyeih.

²Israel ami, “Büpa bampü den kü nyunyeih” shei etuh.

³Aaron am shemi, “Büpa bampü den kü nyunyeih” shei etuh.

⁴SHEMBÜPA kü nyempüthüi, “Büpa bampü den kü nyunyeih” shei etuh.

⁵Shanghah homei ngei SHEMBÜPA kü nyük; SHEMBÜPAi ngei kü jang, hatü büpai ngei bümei leihü.

⁶SHEMBÜPA ngei mü nyüpeih; ngei makao nenyemhen. Hangkui ngei kü mehe dükaokhen?

⁷SHEMBÜPA ngei mü nyüpeih; büpayü ngelei sheühbü. Ngei ngelei vepathü kü aokpü dangei veihen.

⁸Shennyak kü mongnyang leimeyü SHEMBÜPA kü loipü-üng meipüba.

⁹Ongpa kü mongnyang leimeyü SHEMBÜPA kü loipü-üng meipüba.

¹⁰Jatthü peüi ngei tapteke; shejao SHEMBÜPAlei men kü ngei jom jütükpeih.

¹¹Jomi lem peü philei ngei tapteke, shejao SHEMBÜPAlei men kü ngei jom jütükpeih.

¹²Jomi ngei shonei nyahnyüthü kei thaiteke, shejao hüh kü aw bahpükei hahtük; SHEMBÜPAlei men kü ngei jom jütük.

¹³Ngei dohen mü ngei kü hungphüteke, shejao SHEMBÜPAi ngei kü sheühpeih.

¹⁴SHEMBÜPAyü ngelei wong, hatü ngelei kesho; büpayü ngei yemleipüba.

¹⁵Daülangpüthülei ashakshemei aokpü dangpü mongong kesho loknyüke. SHEMBÜPAlei lakdah phi-i wong kohpü douthü dükteke.

¹⁶SHEMBÜPAlei lakdah shaoshi haongnyüke, SHEMBÜPAlei lakdah phi-i wong kohpü douthü dükteke.

¹⁷Ngei nedihen shejao yemmü nyuhen, SHEMBÜPAi mehe dük ha baonghen.

¹⁸SHEMBÜPAi ngei kü hanghi nemei-i shuohpeih, shejao büpai ngei nejütük.

¹⁹Ngei shingvaishi daülangpü shaden apshih; ngei halei shüei SHEMBÜPA kü menvih shuohhen.

²⁰Hapayü SHEMBÜPAlei shaden, daülangpüthü ha homei shühen.

²¹Nüngi ngei kü jangpü nangkü hatü ngelei yemleipüba vaipü nangkü ngei nüngeimen vihnyeih.

²²Shem vepüthüi yaktükpü yaong shongkaong yaong longpü leipeih.

²³Hapayü SHEMBÜPAi dükpeih, hatü hapayü jenei mük kü thamashi nyüke.

²⁴Hapayü SHEMBÜPAi lingpü nyih jeni hapa kü mongongshah.

²⁵Ham yangshih shei hami khümnyeih, Oh SHEMBÜPA! Oh SHEMBÜPA, ham aokpü danghütuh shei hami khümnyeih.

²⁶SHEMBÜPAlei men kü üpa peinya, moihiman. SHEMBÜPAlei shem kübü hami nüng kü moihimannyeih.

²⁷SHEMBÜPAyü Kahvang, büpai jen kü vangngai shuohteke. Phenhavunglak bhagei notü mohitap pangei moidü shinei daituh.

²⁸Nüngü ngelei Kahvang, ngei nüng kü menvih shuohhen; nüngü ngelei Kahvang, ngei nüng vihhen.

²⁹Oh SHEMBÜPA kü menvih shuohtuh; mehenangkü büpa meiangpeih; büpa bampü den kü nyunyeih.