Read Phom Naga MENVIH KESHO 119 Bible Online

MENVIH KESHO 119 - Phom Naga bible

MENVIH KESHO 119

¹Üamei lemthü eela neshiü; üpai SHEMBÜPAlei shahkung kü kam, jom moihiman.

²Üami büpalei shahkungthü notei, hatü mongdang kempai büpa yem, jom moihiman.

³Jomi nejiüpü meheyao nedüknyu, jomi büpalei lemthü kü kamnyüke.

⁴Kenhingei dükhen shingvaishi nüngi nüngei shahkungthü shuoh.

⁵Oh ngei kenhingei nüngei shahkungthü banglang meyo!

⁶Mechem ngei nüngei shahkung peü deih-ei danghenshang, ngei neveühühen.

⁷Ngei nüngei daülangpü shahkungnyü nyingpükei ngelei mongdang kangshangpai ngei nüng vihhen.

⁸Ngei nüngei shahkungthü banghen, nüngi ngei chemjalak kü tetuhphongma.

⁹Nethe hük laophülei lem mekei etü daülangi tuh-aokhen? Nüngei shahkungnyü kü jiüshi nyupü homei.

¹⁰Ngelei mong kempai ngei nüng yemnyeih; nüngei shahkung kübü ngei lemnyong kü tedeitük.

¹¹Ngei nüng khüei mang nethahhen shingvaishi nüngei shah ngelei mong kü jaoei tuhnyeih.

¹²Nüng moihimanpü, Oh SHEMBÜPA, nüngei shahkungthü nyuhshih.

¹³Ngelei jui nüngei ju kübü shahkungthü baongnyüpeih.

¹⁴Mophimo longi angpü mao ngei nüngei shahkungnyü leipü lemthü kü mongongnyeih.

¹⁵Ngei nüngei shahkungthü yemnyeih, hatü nüngei lemthü kü ngelei müki chinyeih.

¹⁶Ngei nüngei shahkungthü kü mongongnyeih, ngei nüngei shahthü nebepih.

¹⁷Ngei nüngei shah kü nyuei ha dükhen shingvaishi nüngei chongphobü kü mei dükshih.

¹⁸Nüngei shahkungnyü kübü thamapü douthü kü veiaokhen shangmü ngelei mük apshih.

¹⁹Ngei hapa kahdok kü yenpa hük kei nyunyeih; ngei toueipü nüngei shahkung tejolang.

²⁰Hepak peü kü nüngei shahkungnyü ongyangpai ngelei mong kü tüngnyüke.

²¹Nüngei shahkung kübü nyaidaipü changmeipüthü kü nüngi lohnyeih, hatü thaüvaünyeih.

²²Jomi yaüeilungpü, depünaampü ngei toueipü yahlangshih; mehenangkü ngei nüngei shahkung bangei düknyüpeih.

²³Ongthüi ngei khüei shah showjao, nüngei chongphobüi nüngei shahkungthü yemhen.

²⁴Nüngei shahkungü ngelei mongong, hathüyü ngelei shahnying venbüthü.

²⁵Ngei bhihla kü lemshi nyüpeih; nüngei shah aimü ngei yangtuh.

²⁶Mechem ngei düktükpü nüng kü lah-ei epa, nüngi ngei kü jangteke; nüngei shahkungnyü ngei kü nyuhshih.

²⁷Nüngei shahkungnyü lem ngei kü nyinghütuh, hatü ngei nüngei thamapü douthü jung yemhen.

²⁸Mongmangpai ngelei laangha nyaüdainyüke, nüngei shah aimü ngei wong kohhütuh.

²⁹Ngei toueipü shahshem lemthü yaktükshih; hatü phahjipai nüngei shahkungthü nyuhshih.

³⁰Ngei shahhing lem jetepih; nüngei shahkungthü ngei touei tuhnyüpeih.

³¹Ngei nüngei shahkungthü kü wongshongi shoungnyeih, Oh SHEMBÜPA; nüngi ngei teveühüma.

³²Nüngei shahkungnyü lem kü ngei moknyüpeih; mehenangkü nüngi ngei bümei leihü.

³³Nüngei shahkungnyü lem nyuhshih, Oh SHEMBÜPA, hatü ngei ha kü dohpü thahshi mühen.

³⁴Ngelei mong kempai nüngei shahkungnyü bangei dükhen ngei kü danaokpü kon yahshihma.

³⁵Nüngei shahkungnyü lem kü ngei mütuh; mehenangkü ngei ha kü mongongnyeih.

³⁶Nüngei shahkungnyü philei ngelei mong lepei leituh; shejao ngei lomja nanglei danghen lem kü nevai.

³⁷Angsha kü veipü ngelei mük lepei leituh; nüngei lemthü kü ngei kü yangnyu yahshih.

³⁸Nüngei chongphobü kü nüngi lahpü jiühütuh, shejüang nüng kü nyemhen.

³⁹Ngei nyempü mongmang yahlangshih; mehenangkü nüngei shahkungthü meiangpeih.

⁴⁰Ngei mekei nüngei shahkungthü ongyangpüang! Nüngei daülangshemshepai ngei yangei tuhte.

⁴¹Nüngi bampü ngei kü peihüshih, Oh SHEMBÜPA, nüngi lahpükei nüngei yemleipü ngei kü yahshih.

⁴²Shejüang ngei kü yaüpü am kü ngei shah leihen danghen; mehenangkü ngei nüngei shah kü hinglemnyeih.

⁴³Ngelei ju leipü shahhing shah te-aetlangma; mehenangkü nüngei shahkungnyü kü ngei monglemnyeih.

⁴⁴Ngei düngei nüngei shahkung banghen denden kü.

⁴⁵Ngei bümeiyangma leiyei kamteihen; mehenangkü ngei nüngei shahkung yemtepih.

⁴⁶Ongthü touei ngei nüngei shahkungthü jung ehen, hatü ngei veü nedanghen.

⁴⁷Nüngei shahkungthü kü ngei mongong dangnyeih; mehenangkü ngei hathü kü bamnyeih.

⁴⁸Ngei bampü nüngei shahkungthü kü ngei dhüm shuohnyeih, hatü ngei nüngei shahkungthü yemhen.

⁴⁹Nüngei chongphobü kü epü nüngei shah deih-ei dangtuh; hapai nüngi ngei monglemhüpeih.

⁵⁰Hapayü ngei shanghah shingkü nyiushemmei; nüngi lahpü homei ngeikü yangnyu shuohnyeih.

⁵¹Changmeipüthü ngei kü düngei yaünyüke, shejao ngei payü nüngei shahkungnyü kübü nelepdainyih.

⁵²Mechem ngei aivang mebü nüngei shahkungnyü deih-ei danghen, ngei ha kü nyiumeinyeih, Oh SHEMBÜPA.

⁵³Nemeipüthüi nüngei shahkungnyü mangtükpü eejü ngei kü mongshih nemei-i vamkünyeih.

⁵⁴Melei ngei paümeithemei nyuhen, nüngei shahkungthüyü ngelei kesho vaihampeih.

⁵⁵Ngei nüngei shahkungthü nyak kü deihnyüpeih, Oh SHEMBÜPA, hatü ha shahkung düknyüpeih.

⁵⁶Hapa moihimanü ngei kü peipeih; mehenangkü ngei nüngei shahkungthü düktepih.

⁵⁷SHEMBÜPAyü ngelei lompü; ngei nüngei shahthü banghen lahnyeih.

⁵⁸Ngelei mong kempai nüngei phahji yünyeih, nüngi lahpü aimü ngei kü phahjishih.

⁵⁹Mechem ngei nüngei lemthü deih-ei danghen, ngelei la nüngei shahkungthü lemei lepnyüpeih.

⁶⁰Ngei shaoksheüei nepheidai-i nüngei shahkungthü düknyüpeih.

⁶¹Nemeipüthülei vü-i ngei kü ngeihjao ngei nüngei shahkungthü nebenyih.

⁶²Nüngei daülangpü shahkungthü nangkü ngei nyak jiamkao nüng men vihhen paonyeih.

⁶³Ngeiyü nüng kü nyempüthü, hatü nüngei shahkung bangpüthülei küphü.

⁶⁴Kahdoknyü-ü nüngi bampai maei nyüke, Oh SHEMBÜPA; nüngei shahkungthü nyuhshihma.

⁶⁵Nüngei shah aimü nüngei chongphobü kü mei dükshih, Oh SHEMBÜPA.

⁶⁶Ngei kü nyingpühingpü, hatü kihikon nyuhshih; mehenangkü ngei nüngei shahkungthü kü hinglemnyeih.

⁶⁷Nüngi ngei kü hanghi shuohshekü ngei lemnyong kü daipeih, shejao shaang ngei nüngei shah bangei düknyeih.

⁶⁸Nüngü meiangke hatü mei dükshih, nüngei shahkungthü ngei kü nyuhshih.

⁶⁹Changmeipüthüi ngei kü shahshemi ngei nang ejao, ngelei mong kempai nüngei shahkungthü bangnyüpeih.

⁷⁰Jomei mongdangü chetshi, hatü danaokpü neshiü; shejao ngeiyü nüngei shahkungthü kü mongongnyeih.

⁷¹Nüngei shahkung nyinghen shangmü ngei kü hanghi shuohpeyü meipü khih.

⁷²Ngei keyü hon hi ngin haja leimao nüngei ju kübü shah-üng meipü khih.

⁷³Nüngei laki ngei ling, hatü yeanei lingpeih. Nüngei shahkungnyü nyinghen ngei kü danaokpü kon yahshih.

⁷⁴Nüng kü nyempüthüi ngei eetü mongonghen; mehenangkü ngei nüngei shah kü monglempeih.

⁷⁵Nüngi shahphenpeyü jiüpü khih shei ngei nyingnyüke, Oh SHEMBÜPA; hatü nüng shahhing epai ngei kü hanghi shuohpeih.

⁷⁶Nüngei chongphobü kü lahpü aimü nüng bampeyü ngelei nyiushemmei vaihütuh.

⁷⁷Ngei yemmü nyuhen shingvaishi nüngei phahji ngei kü peihütuh; mehenangkü nüngei shahkungü ngelei mongong.

⁷⁸Changmeipüthü veü ponghütuh; mehenangkü jomi ngei angkü nyonghüteke; ngei payü nüngei shahkung yemhen.

⁷⁹Jomi nüngei shahkungthü nyinghen shingvaishi nüng kü nyempüthü nüng touei lephütuh.

⁸⁰Ngei veü nedanghen shingvaishi nüngei shahkung kü ngelei mongkü eela neshiüi nyuhütuh.

⁸¹Nüngei yemleipü kü ngelei laanghai ongyangnyeih; ngei nüngei shah kü monglemnyeih.

⁸²Nüngi lahpü omdanei ngelei mükyang yungdaiteke; “Nüngi mechem ngei nyiumeihühen?” shei ngei phenyeih.

⁸³Awshit lem kübü phaishuw kei ngei leidaiteke, shejao ngei nüngei shahkungthü nebetüknyih.

⁸⁴Nüngei chongphobü meshük lushi nenaokhen? Ngei kü shüveipüthü kü nüngi mechem shahphenhen?

⁸⁵Changmeipüthüi ngei shing kahsha shoteke; jomi nüngei shahkungthü nebangang.

⁸⁶Nüngei shahkungthü peü hinglembenüng, ten neshiüshiüi ngei kü shüveiteke, ngei kü sheühshihma.

⁸⁷Kahdoknyü kü ngei mahtükhen mü lingteke; shejao ngei nüngei shahkungthü nebetük.

⁸⁸Nüngei ju kübü shahkung dükhen shingvaishi nüng bampai ngei yangei tuhtuh.

⁸⁹SHEMBÜPA den kü nyunyeih; nüngei shah vangsholei wongshongi lingei nyüke.

⁹⁰Nüng shahhing epü hüdenhalenshi nyunyeih; nüngi kahdoknyü ling, hatü ha wongshongi nyüke.

⁹¹Nüngei ngeükhüam homei hathü shinnyih-ao yaongshi nyüke; mehenangkü dou peü nüngei chongphobüthü.

⁹²Nüngei shahkung paoh ngelei mongong nevailangmeyü, ngeiyü mongshangpai mahdaitü nyuhah shepeih.

⁹³Ngei nüngei shahkungthü nebehen; mehenangkü hathü homei nüngi ngei kü yangnyu shuohpeih.

⁹⁴Ngei nüngei shing; ngei yangtuh; mehenangkü ngei nüngei shahkungthü yemtepih.

⁹⁵Nemeipüthüi ngei mahtükhen danei nyüke, shejao ngei nüngei shahkungthü deih-ei dangnyeih.

⁹⁶Den ngoipü lemphü kü hapalei dohshing ngei eetepih, shejao nüngei shahkungthüyü shapü neshiü.

⁹⁷Oh, nüngei shahkung kü ngei meshük bamhüpüang! Helushoei ngei ha deih-ei dangnyeih.

⁹⁸Nüngei shahkungthü homei ngei ngelei vepathü mao nahpüba leihünyüke; mehenangkü hayü düngei ngei mü nyüke.

⁹⁹Ngelei nyuhbüthü peü mü ngei kü-üng danaokpü kon nyüpeih; mehenangkü nüngei shahkungthü ngei deih-ei dangnyüpeih.

¹⁰⁰Nüngei shahkungthü dükpü nangkü viüpathü mao ngei kü-üng kon nyeinya nyüpeih.

¹⁰¹Nüngei shah banghen shingvaishi ngelei la ten lem peü kübü yepei tuhlangnyeih.

¹⁰²Nüngi ngei kü nyuhpü nangkü ngei nüngei shahkung kübü lepei nelüdainyih.

¹⁰³Ngei chepjü nüngei shah mekei vüngnyangpüang! Ngelei ju kü nyahjiü mao vüngpüba shüke.

¹⁰⁴Nüngei shahkungthü homei ngei kihikon dangnyeih; hanangkü ngei shahshem lem peü kü jiühitnyeih.

¹⁰⁵Nüngei shah ngelei la shing awdük; ngelei lem kü vangngai.

¹⁰⁶Nüngei daülangpü shahkungthü dükhen ngei lahtüktih.

¹⁰⁷Ngei nemei-i shangpongteke; nüngei shah aimü ngei kü yangnyu yahshih, Oh SHEMBÜPA.

¹⁰⁸Ngei menvihpü moila yahtuh, Oh SHEMBÜPA, hatü nüngei shahkungthü nyuhshih.

¹⁰⁹Ngelei yangnyu ngelei lakei noshi nyüpükei ngei deihjao, ngei nüngei shahkungnyü nebepih.

¹¹⁰Nemeipüthüi ngei kü tai haenteke, shejao ngei nüngei shahkung kübü lepei nedaipih.

¹¹¹Nüngei shahkungthüyü düngei ngelei mükjüp; hathüyü ngelei mongdangi mongongpü.

¹¹²Dohpü thahshi düngei nüngei shahkung banghen ngelei mong kü temtüktih.

¹¹³Ngei mong nyi kohpü am kü jiühitnyeih, shejao ngei nüngei shahkung kü bamnyeih.

¹¹⁴Nüngü ngei joshing hatü inyüshung; ngei nüngei shah kü monglemnyeih.

¹¹⁵Ngelei Kahvangei shahkungthü banghen shingvaishi ten dükpüthü ngei toueipü lüdaituh.

¹¹⁶Ngei yemmü nyuhen shingvaishi nüngi lahpüaimü ngei yangei tuhshih, hatü ngei monglemei nyujü veü teponghüma.

¹¹⁷Ngei yanghen shingvaishi ngei shoungei tuhshih, hatü nüngei shahkungnyü kü nedoh-i mong shuohshah.

¹¹⁸Nüngei shahkung kübü yandaipüthü peü nüngi yaktüknyeih; mehenangkü jom lueilempeyü angsha.

¹¹⁹Kahdoknyü kü nemeipüthü peü kü büpai nyüphinya kei deihnyüke: hanangkü ngei nüngei shahkungthü kü bamnyeih.

¹²⁰Nüng kü nyempai ngelei büm kheünyüke, hatü ngei nüngei shahphenpü kü nyemnyeih.

¹²¹Ngei mehe shahhing hatü jiüpü nyüpa ha düktepih; ngei kü shüveipüthü touei ngei tetuhphong.

¹²²Nüngei chongphobü kü mei dükhen shei lahshih; Kahvang nenyingpüthüi ngei kü teshüveihü.

¹²³Nüngei yemleipü omdanei, hatü nüngei daülangpü lahpü jiükahen ngei mükyang yungdaiteke.

¹²⁴Nüngi bampü aimü nüngei chongphobü kü dükshih, hatü nüngei shahkungthü nyuhshih.

¹²⁵Ngeiyü nüngei chongphobü; nüngei shahkung aimü ngei kü kihikon yahshih.

¹²⁶SHEMBÜPAi dou dükhen hepakü shaang khih; mehenangkü nüngei shahkungthü mangtükteke.

¹²⁷Hingmei hon, meipü hon mao ngei nüngei shahkungthü kü bamnyeih.

¹²⁸Nüngei shahkungthü kü jiüshi ngei münyüpeih; shahshem lem peü kü ngei jiühitnyeih.

¹²⁹Nüngei shahkungthü thamashi; hanangkü ngelei laanghai ha bangnyeih.

¹³⁰Nüngei shah shakei vampai vangngai shuohnyeih; lapja-i nyupüthü kü hapai kihikon shuohnyeih.

¹³¹Nüngei shahkung ongyangpai ngei ju kashi ngüshoh heenyeih.

¹³²Nüngei men kü bampüthü kü nüngi noteipükei ngei lemei lepkei, hatü ngei kü phahjishih.

¹³³Nüngi lahpü aimü ngelei lakham ieyei nüngi müshih, hatü mangi ngei shak kü vanglem telemhü.

¹³⁴Hangku-i shüveipü kübü ngei angei leituh, shejüang ngei nüngei shahkung bangei dükaokhen.

¹³⁵Nüngei chongphobü kü nüngei dhe-i khanghütuh, hatü nüngei shahkungthü nyuhshih.

¹³⁶Nüngei shahkung nedükpü nangkü ngelei mükphi yungyen leiyei yennyüke.

¹³⁷Nüngü daülangpü, Oh SHEMBÜPA, hatü nüngei shahkungü shahhing.

¹³⁸Nüngi shuohpü shahkung kemei daülangpü, hatü hayü hinglemhen nyüke.

¹³⁹Ngelei vepathüi nüngei shah betükpü nangkü ngei nyakpükenpai ngei nyiudaiteke.

¹⁴⁰Nüngi lahpüthü kü ngei dokei veitih, hatü nüngei chongphobüi ha kü bamnyeih.

¹⁴¹Ngei maanpü am hatü phangpa kü nyupü hük, shejao ngei nüngei shahkungthü nebetüknyih.

¹⁴²Nüngei daülangshemsheyü nedohnetenpü daülangshemshepü, hatü nüngei shahkungü shahhing.

¹⁴³Shanghah hatü mongshang ngei kü peiteke, shejao nüngei shahkungü ngelei mongong.

¹⁴⁴Nüngei shahkungü den kü daülangpü; ngei yemmü nyuhen shing ngei kü kon yahshih.

¹⁴⁵Ngelei mong kempai lennyeih, jangshih, Oh SHEMBÜPA. Ngei nüngei shahkung banghen.

¹⁴⁶Ngei nüngei shahkung bangei dükhen shangmü ngei nüng kü lennyeih, ngei yangshihma.

¹⁴⁷Vanghe aongshekü ngei paoei sheühpü yüei lennyeih, nüngei shah kü ngei monglemnyeih.

¹⁴⁸Nüngei shahkung deih-ei yemhen shingvaishi vangnyak yemmü lemshi paümnyeih.

¹⁴⁹Nüng bampai ngelei ngeü bangtuh; Oh SHEMBÜPA, nüngei shahhingi ngei yangei tuhte.

¹⁵⁰Mükhong ten tuhtü ngei kü shüveipüthü yopailei peikünyüke; jomü nüngei shahkung kübü taishi lüdaiteke.

¹⁵¹Shejao nüng yopailei nyüke, Oh SHEMBÜPA, hatü nüngei shahkungthü peü shahhing nyüke.

¹⁵²Hepak luangi daiteke, nüngi den kü nyuhen shingvaishi hathü lingei tuhpeih shei nüngei shahkung leipü danpeih.

¹⁵³Ngelei shanghah kü veituh, hatü ngei yangtuh; mehenangkü ngei nüngei shahkung nebenyih.

¹⁵⁴Ngei nang khüambaktuh, hatü ngei angei leituh; nüngi lahpükei ngei kü yangnyu yahshih.

¹⁵⁵Yemleipeyü nemeipüthü toueipü taishi nyüke; mehenangkü jomi nüngei shahkung neyemnyu.

¹⁵⁶Nüngei phahji longshi, Oh SHEMBÜPA; nüngei shahhing aimü ngei kü yangnyu yahshih.

¹⁵⁷Ngei kü shüveipüthü, hatü ngelei vepathü longi nyüke, shejao nüngei shahkungthü kübü ngei lepei nedai.

¹⁵⁸Ngei hingnelempüthü kü nelümi veihahnyeih; mehenangkü jomi nüngei shahkungthü nedüknyu.

¹⁵⁹Nüngei shahkung kü ngei mekei bamnya deih-ei dangtuh; nüngi bampü aimü ngelei yangnyu yangtuh.

¹⁶⁰Nüngei shahthü kemei shahhing; nüngei daülangpü shahkung kemei den kü nyunyeih.

¹⁶¹Ten neshiüpü kü ongthüi ngei kü shüveinyüke, shejao ngelei mongdangi nüngei shah kü nyemei yaongnyeih.

¹⁶²Mop longi dangpü am keiha ngei nüngei shah kü mongongnyeih.

¹⁶³Ngei shahshem kü jiühitnyeih hatü yaktüknyeih, shejao ngei nüngei shahkung kü bamnyeih.

¹⁶⁴Nüngei daülangpü shahkung shingvaishi ngei nyih kü nyetpa nüng vihnyeih.

¹⁶⁵Nüngei shahkung kü bampüthü kü chingmei longpü nyüpeih; mepaiyao jom huluh neshuohhen.

¹⁶⁶Nüngei yemleipü kü ngei monglemnyeih, Oh SHEMBÜPA, hatü ngei nüngei shahkung jiühünyeih.

¹⁶⁷Ngelei laanghai nüngei shahkung bangei düknyeih; ngei hathü kü nyeishi bamnyeih.

¹⁶⁸Ngei nüngei shahkungthü düknyeih; mehenangkü ngelei lemthü peü nüng touei nyüke.

¹⁶⁹Ngei lenpü nüng touei peihütuh, Oh SHEMBÜPA, nüngei shah aimü ngei kü kihikon yahshih.

¹⁷⁰Ngei phoppü nüng touei peihütuh; nüngi lahpü aimü ngei yangtuh.

¹⁷¹Ngelei ju-i nüng kü vihhen; mehenangkü nüngi nüngei shahkungthü nyuhnyüke.

¹⁷²Ngelei ju-i nüngi lahpü jung lokhen; mehenangkü nüngei shahkungthü peü jiüshi nyüke.

¹⁷³Ngei kü sheühphahen nüngei lak temtüktü nyutuh; mehenangkü ngei nüngei shahkung jetepih.

¹⁷⁴Ngei nüngei yemleipü ongyangnyeih, Oh SHEMBÜPA, hatü nüngei shahkungü ngelei mongong.

¹⁷⁵Ngei nüng kü vihhen shangmü ngei yemmü tuhte, hatü nüngei shahkungi ngei kü sheühshih.

¹⁷⁶Ngeiyü mahdaipü mi keiha lembien kü daipeih; nüngei chongphobü yemtuh; mehenangkü ngei nüngei shahkungthü nebetüknyih.