Read Phom Naga MENVIH KESHO 139 Bible Online

MENVIH KESHO 139 - Phom Naga bible

MENVIH KESHO 139

¹Oh SHEMBÜPA, nüngi ngei yem hatü nyingteke.

²Nüngi ngei uo ngei yaong nyingei nyüke; tailei-üng nüngi ngelei mongdeih nyingei nyüke.

³Nüngi ngei daipü hatü lempü nyingnyüke, nüngi ngelei lemthü nyingei nyüke.

⁴Ngelei ju kü shah vamshekü nüngi ha meishi nyingei nyüke, Oh SHEMBÜPA.

⁵Nüngü ngelei ngaümphei shelang shinei nyüke, hatü nüngei laki ngei kü shongnyüke.

⁶Hapa keipü kihikonü ngei shingvaishi longi thamashi, ngei danghenü longi shaoshi khih.

⁷Nüngei laangha toueipü ngei melei daihen? Nevaijü nüng toueipü ngei melei mokdaihen?

⁸Ngei vangsholei aongjajao, nüng halei nyüke; ngei Sheolei lemshi nyudaijao nüng haleiyao nyüke.

⁹Ngei nepnüng dhomi yang kohtü piyei daiyei yungching dohpülei nyujao,

¹⁰haleiyao nüngei laki ngei mühen, hatü nüngei lakdah-i ngei kü shonghen.

¹¹“Hingmei shangmangi ngei kü jümphahen, hatü ngei shonei nyupü vangngai vangnyak leidaihen” shei ngei ejao,

¹²vangnyakü nüng keyü vangnyak nevai; vangnyakü vangngai mao nyapüba, vangnyakü nüng shingvaishi vangngai kei nyüke.

¹³Ngelei mongpa phaihan lingpeyü nüng nyuteke. Onyülei vom mongei nüngi ngei hapteiyei lingpeih.

¹⁴Ngei nüng vihnyeih; mehenangkü nüngi ngei nyemshi, hatü thamashi lingpü khih. Nüngei douthü thamashi nyüke; ha ngei meishi nyingnyüke.

¹⁵Ngei jopü shingei lingshing kü ngelei shaohi-ang nüng touei joshi nenyu; ngei halei longshingkü ngei halei nyüke shei nüngi nying;

¹⁶ngei lingpü dak manglangi nüngi ngei eeteke. Nyihthü pangshekü nüngi ngei shing nyih meshük ling, ha nüngi nüngei laithü kü nyangei tuhteke.

¹⁷Ngei shing nüngei chudeih meshük douvangang, Oh Kahvang! Hathüyü meshük longpüang!

¹⁸Ngei hathü itnüng khenyeih, hayü kübhih mao nyeishi; mechem ngei paohen, ngei shaang thahshi nüng mü nyüpeih.

¹⁹Oh nüngi paoh nemeipüthü jütüklangmeyü, Oh Kahvang, iy yenhüpüthü ngei toueipü yandaihah shepeih.

²⁰Jomi nüng jung nemeipü enyüke, nüngei vepathüi nüngei men nemei-i noteinyüke.

²¹Nüng kü jiühitpüthü kü ngei nejiühitnyu je, Oh SHEMBÜPA? Nüng khüei yaongpüthü kü ngei nejiühitnyu je?

²²Ngei hingshangpü jiühitpai ngei jom kü jiühitnyeih; Ngei jom kü ngelei vepathü shei ieyeilemnyeih.

²³Ngei yemtuh, Oh Kahvang hatü ngelei mongdang nyingtuh; ngei kü doktuh hatü ngelei mongdeih nyingtuh.

²⁴Ngei kü nemeipü lemhük dangkao nyülashang veituh, hatü ngei nedohnetenpü lem kü mütuh.