Read Phom Naga MENVIH KESHO 144 Bible Online

MENVIH KESHO 144 - Phom Naga bible

MENVIH KESHO 144

¹SHEMBÜPA ngelei Yaongnyü kü vihtuh; mehenangkü büpai ngelei lak ponghok vanshenghen, hatü ngelei lakjaangthü kü hokeivehen nyuhnyüke.

²Büpayü ngelei bampü Kahvang, hatü ngelei penyüsha; ngei loishing hatü ngei yangbü, ngei loipü ngelei inyüshung, büpai nanglakthü ngei phangkü neühünyeih.

³Oh SHEMBÜPA, nüngi büpa kü hajük taungeimonghen mü shennyakü meheang? nevaijü nüngi büpa kü hajük mong shuohhen mü hangkuyü meheang?

⁴Jomphongü ngü keiha; jomei nyihthüyü vangdhüm laang lüdaipükei nyüke.

⁵Oh SHEMBÜPA, vangsho yamtüktü yiükei; awshit vamhen mü kahshangthü kü hongtuh.

⁶Klang nyephütuh hatü jom yantüktuh; nüngei lahhan shomei jom yantüktuh.

⁷Shangphi leipü nüngei lak yiüei ilangmong kübü, hatü kung amei lak kübü yangtuh;

⁸Jomei jui shahshem enyüke, jomei lakdah-i lueilemei düknyüke.

⁹Oh Kahvang, ngei nüng kü kesho ja hük lokhen; nyiamvü an shenpü harp vüngei ngei nüng kü kesho lokhen.

¹⁰Nüngi ongthü kü aokpü danghü, hatü nüngei chongphobü David yangteke.

¹¹Mangpü yannah kübü, hatü kung amei lak kübü ngei yangtuh. Jomei jui shahshem enyüke, jomei lakdah-i lueilemei düknyüke.

¹²Hamei yeshangthü pühivung longpü keiha thehila leihütuh; hamei yiükhathü ongshem vehen agpü shemnyü kü ow lingpükei nyuhütuh.

¹³Hamei puongmong lemphü hahyingi mahütuh; hamei mi haja haja, hatü haja an lomei daei kahdok mahütuh.

¹⁴Hamei mohohthüi cheha shaanei mahütuh. Hajük kü bham benei wüpküpei nedaihen, hamei chingyangshong kü Shanghahpai theppüyoungpü tevamhüma.

¹⁵Hapa keipü moihiman dangpü nanglakthü moihiman; SHEMBÜPAyü üamei Kahvang vaihenshang moihiman.