Read Phom Naga MENVIH KESHO 145 Bible Online

MENVIH KESHO 145 - Phom Naga bible

MENVIH KESHO 145

¹Ngei nüng vihhen, ngelei Kahvang, ngelei ongpa, hatü düngei ngei nüngei men longhen.

²Nyihjeih ngei nüng vihhen, hatü düngei nüngei men longhen.

³SHEMBÜPAyü longpü, hatü longi vihhen nyüke; büpa longpü jung üpaiyao yemei neaokpih.

⁴Denshem hük kübü hük kü jaaiyei nüngei doumei kü vihhen, hatü nüngei thamapü douthü baonghen.

⁵Jomi nüng müknyinshekhang nethe meipü jung ehen, hatü nüngei yashanpü douthü jung deih-ei yemhen.

⁶Nüngei wong kohpü douthü jung baonghen, hatü nüng longpü jung ngei baongeiyaühen.

⁷Jomi nüng meipü changpüshapü jung ehen, hatü nüng daülangshemshepü jung kesho lokhen.

⁸SHEMBÜPAi phahjinyeih, hatü shinshangei deihnyeih; mongshihhen yung mü, hatü bampü kü changshishashi nyüke.

⁹SHEMBÜPAyü peü meinyüpeih; büpai lingpü peü kü büpai bamnyeih.

¹⁰Nüngi lingpü douthüi nüng kü vihhen, Oh SHEMBÜPA, hatü nüng kü hinglempüthü peüi nüng kü moihimanhen.

¹¹Jomi nüngei ongching müknyinshekhangpü jung, hatü nüngei ngan jung ehen,

¹²shejüang shennyak peüi nüngei wong kohpü douthü, hatü nüngei ongching müknyinshekhang nethe meipü jung ehen.

¹³Nüngei ongchingü nedohnetenpü ongching, hatü nüng vanglem lempü hüdenhalenshi nyunyeih. SHEMBÜPAi büpalei shahthü peü jiüshi düknyeih, hatü büpai phahjipai douthü peü düknyeih.

¹⁴Dodaipüthü peü büpai shümei tuhnyeih, hatü maanpü leipüthü büpai longei anshihnyeih.

¹⁵Peüei müki nüng kü veinyeih, hatü nüngi hepak jiüpü kü jom kü hahying shuohnyeih.

¹⁶Yemmü nyupü lemphüi lümpü hüshemhen mü nüngi nüngei lak lainyeih.

¹⁷SHEMBÜPAi büpalei lemthü peü kü shahhing enyeih, hatü büpai dükpü lemphü kü bampü kohshi düknyeih.

¹⁸Büpa kü nyükpüthü peü; shahhing kü büpa kü nyükpüthü peü touei SHEMBÜPA yopailei nyüke.

¹⁹Büpa kü nyempüthüi lümpü peü büpai jiühünyeih; jomi nyükpü büpai danei büpai jom yanglangnyeih.

²⁰SHEMBÜPAi büpai bampüthü kü veishi nyunyeih, shejao nemeipüthü peü büpai mahtükhen.

²¹Ngelei jui SHEMBÜPA menvihpü jung ehen, hatü phai peüi büpalei daülangpü men den dok kü den moihimanhen.