Read Phom Naga MENVIH KESHO 147 Bible Online

MENVIH KESHO 147 - Phom Naga bible

MENVIH KESHO 147

¹SHEMBÜPA vihtuh! Jenei Kahvang kü menvih kesho lokhenü meshük meipüang; mehenangkü büpayü phahjipü, hatü menvih kesho lokhenü shangpeih.

²SHEMBÜPAi Jerusalem lingnyeih; büpai Israel am wüpküp leipü müei leinyeih.

³Büpai mongdang mangdaipü meihünyeih; hatü jomei makaw phüngtüknyeih.

⁴Büpai lithathü meshük nyu ietüktü nyüke; büpai jom peü kü men mentüktü nyüke.

⁵Longpübayü jenei SHEMBÜPA, hatü ngan kü changpüshapü nyüke; büpalei kihikonü neshet-aoki nyüke.

⁶SHEMBÜPAi phangpalei nyupüthü phuknyeih; büpai nemeipüthü kahdokei shüktüknyeih.

⁷SHEMBÜPA kü menvih kesho lokeishuoh; lyre vüngei jenei Kahvang kü ünghinyah meipai lokeishuoh.

⁸Büpai vangshothü kü phumi jümhünyeih, Kahdoknyü shing vang temnyeih, hatü shangtaothü kü thüng kohhünyeih.

⁹Büpai yemhimakthü kü hahying shuohnyeih, hatü asha chehathü vaüshingkü het shuohnyeih.

¹⁰Büpa mongongpeyü koyeilei wong kü nenyu, nevaijü mokbü hük shangshi mokpü kü mong nemeinyih,

¹¹shejao büpa kü nyempüthü kü, büpa bampü kü monglempüthü kü SHEMBÜPAi mongongnyeih.

¹²SHEMBÜPA vihtuh, Oh Jerusalem! Ammei Kahvang vihtuh, Oh Zion!

¹³Mehenangkü büpai ammei penyüsha kübü shalatmüü wong kohhünyeih; büpai ammei hapeüthü kü moihimannyeih.

¹⁴Büpai viong mü shükei am kü chingmei shuohnyüke; büpai am atta hah meipai mahhünyüke.

¹⁵Büpai kahdoknyü kü shahkung shomnyeih; büpalei shah longi shülangi dainyeih.

¹⁶Büpai phümphah keiha shü shuohnyüke; büpai awshit keiha nyaühiphum yantüknyeih.

¹⁷Büpai nük anpükei shüyaong vühünyeih hapa kaongpü sheüpü kü üpa yaongaokhen?

¹⁸Büpai büpalei shah shomei hathü nyaütüknyeih; büpai büpalei vanglük lükhünyeih, hatü yung yenhünyeih.

¹⁹Büpai büpalei shah Jakob kü; büpalei shahkung hatü vanglemthü Israel am kü baongnyeih.

²⁰Büpai hapakei lebü jatthü kü nedük; jomi büpalei vanglemthü nenyingnyih. SHEMBÜPA men longtuh!