Read Phom Naga MENVIH KESHO 18 Bible Online

MENVIH KESHO 18 - Phom Naga bible

MENVIH KESHO 18

¹Ngei nüng kü bamnyeih, Oh SHEMBÜPA, ngelei wong.

²SHEMBÜPAyü ngelei yaong, ngelei penyüsha hatü ngei yangbü; ngelei Kahvang, ngei loipü yaongnyü, ngelei inyüshung, ngelei yemleipü vaung hatü ngelei penyüsha.

³Vihhen shangpü SHEMBÜPA kü ngei nyüknyüpeih, hatü ngei vepathülei lak kübü yangei nyüpeih.

⁴Dipü vü-i ngei kü ngeihteke, mangpü yungmoki ngei lümlangteke.

⁵Mahngchong vü-i ngei kü ngeihteke; dipü aethitai ngei heüteke.

⁶Shanghahpai ngei SHEMBÜPA kü nyük; ngelei Kahvang kü sheühshih shei lenteke. Büpalei phopshem leipü büpai ngelei ngeü dan, hatü ngei lenpü büpalei dhaongi dan.

⁷Hahepak kü kahdokü kheüei jen, kahshang chongnyiamthü kheüei jen, mehenangkü büpa mongshih anteke.

⁸Büpalei shongsha leipü awshit an; hatü büpalei ju leipü laiyei laungei hahtükhen aw vamteke; awtao kübü awlom büpa leipü vamteke.

⁹Büpai vangsho hanphongtü yiü; vangnyakü büpalei la phangei nyu.

¹⁰Büpai cherub kü uotü piyei dai; büpai vanglükei yang kü uotü piyei aong.

¹¹Büpai shangmang yah-ei jümhah; yung kohpü phumthih-i büpa kü shonhah.

¹²Büpa nyangnyangpü kübü phum, shüyaong hatü klang vamnyüke.

¹³SHEMBÜPAi vangshothü leipü vangmuk khungnyüke, hatü Jaipübai büpalei ngeü annyüke.

¹⁴Büpai laophülei lahhan kap, hatü jom yantük, büpai klang nyephü, hatü hathü changtük.

¹⁵Oh SHEMBÜPA, nüngi lohpü kü, hatü nüngei shongsha leipü, hatü nüngei shongsha leipü ngü vampai yungching aangshungao heeyei yeemtük, hatü kahdoknyü chongnyiam shakei yeemtük.

¹⁶SHEMBÜPA shang phileipü yiüei ngei kü shongteke; büpai ngei yungching ilangmong leipü shüei an.

¹⁷Büpai ngei wong kohpü vepathü, hatü ngei kü jiühitpüthü kübü yang; mehenangkü jomü ngei shingvaishi ahshi wong kohshi nyuteke.

¹⁸Ngei shanghah pongpü nyih jomi ngei mü hokteke, shejao SHEMBÜPAi ngei kü sheühpeih.

¹⁹Büpai ngei lem bhashahpülei müei dei; büpai ngei yang; mehenangkü büpai ngei kü mongong.

²⁰Ngei daülangshemshepü aimü büpai ngei kü laklei shuoh; ngelei lak daüshi nyupü aimü büpai ngei kü moihimanpeih.

²¹Mehenangkü ngei SHEMBÜPAlei lem kü kam; ngelei Kahvang toueipü yanei ngei mang dou nedük.

²²Büpalei shahkungthü peü ngei touei nyüpeih, hatü ngei toueipü büpalei vanglemthü neyaktükangpih.

²³Ngei büpa touei eela nekoh-i nyupeih, hatü ngei nyingi mang kübü yanei nyupeih.

²⁴Ngei daülangshemshepü shangshi, hatü büpa touei ngelei lak daülangi nyupü aimü ngeikü SHEMBÜPAi laklei shuohpeih.

²⁵Hingshangi nyupüthü touei nüngi hingshangi hunyeih, eela neshiüpüthü touei nüngi eela neshiüi hunyüke.

²⁶daüshi nyupüthü touei nüngi daülangi hunyeih. shejao laülüki nenyupüthü touei nüngi kon kohshi düknyüke.

²⁷Nüngi maanpü leipü am yangnyüke, shejao changmeipüthü maanhütüknyeih.

²⁸Oh SHEMBÜPA, nüngi ngelei awdük jakshi tuhnyeih, ngelei Kahvangi ngelei shangmang vangngai leihüpeih.

²⁹Nüngi sheühpai ngei veshanthü ngümtükaokhen, ngelei Kahvangi sheühpai ngei bham homei daiaokhen.

³⁰Hapa Kahvangei lemü den ngoishi; SHEMBÜPAlei shah-ü eela neshiü. Büpa kü loipüthü peü shingvaishi büpayü inyüshung.

³¹SHEMBÜPA mü nyeiyei Kahvang üpa nyüpa? Jenei Kahvang mü lenei üpa yaongnyü nyüpa?

³²Hapayü ngei wong kohhüpü, hatü ngelei lem yangei tuhpü Kahvang khih.

³³Büpai ngelei la shaokei la kei leihünyeih; büpai kahshangei ngei yangei tuhnyeih.

³⁴Büpai ngei kü vehok hokhen nyuhphünyeih; shejüang ngelei laki melangnyiam lah küaokhen.

³⁵Nüngi ngei kü yemleipü inyüshung shuoh, hatü nüngei lakdah-i ngei kü sheühpeih; nüngi sheüh-ei ngei longpü leihüpeih.

³⁶Nüngi ngelei la shoupshing lemba longhü, hatü ngelei la nekük.

³⁷Ngei vepathü kü changei daiyei jomei she yeipeih; hatü jom mangjükem thahshi nyokei nelei.

³⁸Jom paoei neyaongaokhen mü ngei jom ngümtükpeih; jom ngelei la phangei dopeih.

³⁹Mehenangkü nüngi ngei kü vehok shingvaishi wong kohhen shünglok lokhü; nüngi ngelei vepathü ngei phangkü dungtükpeih.

⁴⁰Nüngi ngelei vepathü ngei toueipü nyaihütük; hatü ngei kü jiühitpüthü ngei jütük.

⁴¹Jomi sheühpü yüei len, shejao jom yanghen hükao nenyu; Jomi SHEMBÜPA kü nyük, shejao büpai jomi nyükpü kü nejang.

⁴²Vanglük shaw kü ngei jom kü bhihla kü kei bheitü deishih; ngei jomphong chingshong leipü nyaühut kei yaktükpeih.

⁴³Ngei khüei yaongpü nanglakthü kübü nüngi ngei yang; nüngi ngei jatthülei shangjing leihüteke; ngei nenyingpü nanglakthüi ngei chongphonyüke.

⁴⁴Jomi ngei jung danhinüng, jomi ngelei shah bangnyüke; kung ami nyemei kheüyaki ngei touei peikünyüke.

⁴⁵Jom mong mahdaitü nyemei kheüyaki penyüsha leipü peikünyüke.

⁴⁶SHEMBÜPA yemmü nyüpeih, Ngelei yaongnyü kü vihtuh! Ngelei Yemleipüba Kahvangei men longhütuh.

⁴⁷Büpayü ngelei med kü bhüh yempü Kahvang, ngei jatthü kü neühüpü Kahvang.

⁴⁸Büpai ngei vepathü kübü yangnyüpeih. Nüngi ngelei vepathü shak kü ngei longei anshih; nemeipüthü kübü nüngi ngei yang.

⁴⁹Ha tata kü jatthü khongkü ngei nüngei men vih-ei lokhen.

⁵⁰Büpai laophülei ong kü aokpü danghü; büpai laophüi jehahpü David, hatü büpalei hühihathü kü den kü bampü hupeih.