Read Phom Naga MENVIH KESHO 19 Bible Online

MENVIH KESHO 19 - Phom Naga bible

MENVIH KESHO 19

¹Vangshothüi Kahvang müknyinshekhang jung enyüke, hatü vangshangthüi büpalei lakdou jung baongnyüke.

²Nyihjeih jomi ngaiyei enyüke; yajeih jomi kihikon hunyüke.

³Hathüi ne-enyu nevaijü shah neshiü; jomei ngeü nedanaoknyu.

⁴Jomei ngeü kahdok peü lemei dainyüke; jomei shah kahdok dohpü lemei yannyüke. Vangshothülei büpai vanghenyü shing ashakshem veteke,

⁵hapayü yiük yahbü hük laophülei shem leipü vamküpü keiha, hatü ngapüjapü shennyak hük mokhen monghumpü keiha nyüke.

⁶Hapayü vangsho jung hük kübü vamnyüke, hatü jung hük lemei shinnyüke. Hapa shaampü kübü meheyao nejoaoknyu.

⁷SHEMBÜPAlei shahkungnyü den ngoipü, laangha jatonghünyeih. SHEMBÜPAlei shahkungü hinglembenüng; ngashi nyupüthüao nahhünyeih.

⁸SHEMBÜPAlei vanglemü jiüshi nyüke; hapai mongkü mongong shuohnyeih. SHEMBÜPAlei shahkungü shahhing, hatü hapai danaokpü kon shuohnyeih.

⁹SHEMBÜPA nyempeyü daülangpü; hapa den kü nyunyeih. SHEMBÜPAlei vanglemü shahhing, hatü dhaomü daülangi nyüke.

¹⁰Hathüyü longi daülangpü hon mao douvang, hatü nyahdük leipü nyahjiü mao vüngnyangpüba.

¹¹Hathüi nüngei chongphobü kao kihikon shuohnyeih; hathü noteijü laklei nyüpeih.

¹²Büpai pungpü üpai yepaokhen? Joshi nyupü ngelei mang tükshih.

¹³Ngam epü mang kübü nüngei chongphobü yangtuh, hathüi ngei shak kü vanglem telemhü. Shejüang ngei eela neshiüi, hatü mang longpü nethah-i nyuhen.

¹⁴Ngelei ju kübü shahthü, hatü ngelei mongdangei phoppü nüng touei yahhübenüng vaihütuh, Oh ngelei yaongnyü hatü ngei angei leipüba.