Read Phom Naga MENVIH KESHO 22 Bible Online

MENVIH KESHO 22 - Phom Naga bible

MENVIH KESHO 22

¹Ngelei Kahvang, ngelei Kahvang, mehekei nüngi ngei yakphongnya? Mehekei nüngi ngei kü sheühhen dohdainya? Mehekei ngei theppüyoungpü shahthü kübü taidainya?

²Oh ngelei Kahvang, ngei nüng kü nyihnüng nyüknyeih, shejao nüngi ngei kü nejangnyu, hatü yanüngao nyüknyeih, shejao nyiushemmei nedangnyu.

³Shejao nüngü Daülangpü Hük keiha ong uoshing kü uonyüke; nüngü Israel ami vihpüba.

⁴Nüng kü hamei bühipai hinglem; jomi hinglem hatü nüngi jom yangteke.

⁵Nüng kü jomi len hatü yangteke; Nüng kü jomi hinglem hatü jom veü nedang.

⁶Shejao ngeiyü laonghiyak hük, hangku nevai; shennyaki yaüeilungtükpü, hatü hangkui ne-ienelemtükpü shennyak hih.

⁷Ngei eepü peüi ngei kü naamnyüke; jomei ngaüm dhiyei ngei kü yaüeilungnyüke.

⁸“Büpai SHEMBÜPA kü hinglemnyüke; SHEMBÜPAi büpa nyemyangshuoh. Büpai büpa kü monghahnyüke; hanangkü büpai büpa nyemyangshuoh” shei jomienyüke.

⁹Shejao nüngi ngei vom mongeipü ngaiteke; ngei onyülei amma yingei nyushiyao nüngi ngei yangei tuhteke.

¹⁰Ngei bühpü nyih kübü ngei nüng kü mongnyangshi nyu; ngei onyülei vom mongei nyushi mebü nüngü ngelei Kahvang nyuhampeih.

¹¹Nüng ngei toueipü taishi telüdai; mehenangkü shanghah yopailei peikünyüke, hatü ngei kü sheühphahen üpayao neshiü.

¹²Mohohbaongthüi ngei shonlangteke; wong kohpü Bashan mohohbaongthüi ngei shinlangteke.

¹³Ngüngpü mailangthüi yemhimak shaakpü keiha jomi ngei khüei ju kanyüke.

¹⁴Ngeiyü yung kei langtük, hatü ngelei vangbaong yandaiteke; ngelei mongdangü püjiü keiha, ngelei mongei nyaüei yennyüke.

¹⁵Dükbhaok keiha ngelei wong kemdai, ngelei yei shaapdokei khadai; nüngi ngei mahng mü bhihla kü shükphong.

¹⁶Shithü ngei shonei thai, nemeipü shennyakthü ngei shonei thai; jomi ngelei lakhila bhagtükkem.

¹⁷Ngelei vangtao peü ieaoknyüke; jomi ngei kü mük taangei veinyüke, hatü hahtüknyüke.

¹⁸Jomi ngelei ashakviha hanteinyüke, hatü ngelei owhiai hanteihen phongyomnyüke.

¹⁹Shejao nüng, Oh SHEMBÜPA, ngei toueipü teyandai. Oh ngelei sheühbü, lomi peiyei ngei kü sheühshih.

²⁰Ngelei yangnyu yan kübü, hatü ngelei douvan yangnyu shithülei wong kübü yangtuh.

²¹Mailangei ju kübü ngei yangtuh. Nyayalei vaungjaang kübü ngei yangtuh.

²²Ngei ngelei jeihinaüthü kü nüngei men baonghen; thaihiyu kü ngei nüng vihhen.

²³Am üami SHEMBÜPA kü nyemnya, büpalei men longtuh! Jakobei lihilathü am peüi büpa vihtuh! Israel hühihathü peüibüpa kü nyemei dhüm shuohtuh.

²⁴Mehenangkü büpai shanghahpüthü, hatü ponghahpüthü kü ne-ienelemi yaktükei neshiü. Büpai büpalei dhe ngei toueipü nejodai. Shejao ngei büpa kü nyükjü büpai ha danlangpeih.

²⁵Khonghiyow longpü kü nüng kü vihhenü nüng leipü peinyüke; Nüng kü nyempüthü touei ngei lahtükpü jiühühen.

²⁶Taopathüi hahhen hatü shümoh meihen, SHEMBÜPA yempüthüi büpa vihhen. Jom düngei moihimanpü leihütuh!

²⁷Kahdok dohpü peüi deih-ei dangtü SHEMBÜPA touei mong lepei leihen, hatü jatthü phanghiyang kemei büpa kü khümhen.

²⁸Mehenangkü vanglem lemhenü SHEMBÜPAlei; hatü büpai jatthü kü vanglem lemnyeih.

²⁹Changmeipüthü peüi büpa kü khümhen, hatü yemmü nenyui kahmongei shüei nyupüthüi büpa kü aümei khümhen.

³⁰Pheinaüi büpa chongphohen; ngoikahen hüshom pheinaüi SHEMBÜPA jung ehen.

³¹Jomi mangbüh mangpaümpü kahmong nyemha kü büpa daülangshemshepü jung ehen; mehenangkü büpai ha dükteke.