Read Phom Naga MENVIH KESHO 25 Bible Online

MENVIH KESHO 25 - Phom Naga bible

MENVIH KESHO 25

¹Nüng kü, Oh SHEMBÜPA, ngei ngelei laangha ngangei veinyeih.

²Oh ngelei Kahvang, nüng kü ngei hinglemnyeih. Nüngi ngei veü teponghü; ngelei vepathüi ngei te-aokhü.

³Nüng kü monglemei omdanpüthü teveühü, shejao lanei neshuohpüthü veühütuh.

⁴Nüngei lemthü ngei kü nyinghütuh, Oh SHEMBÜPA, nüngei lemthü ngei kü nyuhshihma.

⁵Nüngei shahhing kü ngei mütuh hatü nyuhshih; mehenangkü nüngü ngei yemleipü Kahvang, helushoei ngei nüng omdannyeih.

⁶Oh SHEMBÜPA, nüngei phahji, hatü bampü jung deih-ei dangtuh; mehenangkü hathüyü aivang den mebü nyuteke.

⁷Ngelei nethe hepak kübü mangthü, hatü pungpü shaipü deih-ei tedang. Nüng meipü men kü nüngi bampü shangshi ngei deih-ei dangtuh, Oh SHEMBÜPA.

⁸Meipü hatü kangshangpeyü SHEMBÜPA; hanangkü büpalei lemthü kü kamhen büpai nyuhnyeih.

⁹Büpai maanpü leipüthü jiüpü kü mülangnyeih, hatü büpalei lemthü nyuhnyeih.

¹⁰Büpalei vangpüshuwpü dükpüthü shingvaishi SHEMBÜPAlei lemthü peü bamhüshi hatü hingshangi nyüke.

¹¹Ngelei mang ahshi longshi nyujao nüngei men kü ngelei mang tükshih, Oh SHEMBÜPA.

¹²Shejema, SHEMBÜPA kü nyempü shennyakü üpaang? Büpa daihen lem kü büpai büpa kü nyuhhen.

¹³Büpalei nyihthü moihiman shangkü peihhühen, hatü büpalei hühihathüi kahdok mükjüp danghen.

¹⁴SHEMBÜPAi büpa kü nyempüthü kü shahmong ngaiyei enyeih. SHEMBÜPAi laophülei vangpüshuwpü nyinghünyeih.

¹⁵Ngelei mük düngei SHEMBÜPA kü chishi nyunyeih; büpai ngelei la tai kübü tuklanghen.

¹⁶Ngei lemei lepkei hatü ngei kü phahjishih; mehenangkü ngei monha shangpongpü kü nyüpeih.

¹⁷Ngelei mong kübü mongshang meitükshih, hatü ngei shanghahpü kübü ngailangtuh.

¹⁸Ngelei shanghah hatü mongshang deih-ei dangtuh, hatü ngelei mangthü tükshihma.

¹⁹Ngelei vepathü meshük nyu, hatü jomi meshük nemei-i ngei kü jiühitnya deih-ei dangtuh.

²⁰Ngelei yangnyu yomtuh hatü yangtuh, hatü ngei teveühüma; mehenangkü ngei nüng kü loinyeih.

²¹Shahhing hatü kangshangpai ngei yangeituhshih; mehenangkü ngei nüng kü hinglemnyeih.

²²Shanghah peü kübü Israel am angei leituh, Oh SHEMBÜPA.